Odisha Bandh: ଓଡ଼ିଶା ବନ୍ଦ ଡାକରା ବେଳେ ଲୋୟର ପିଏମ୍ଜିରେ ପୋଲିସର ଆକ୍ସନ, ଭକ୍ତ ଦାସଙ୍କ ସମେତ ୩ କଂଗ୍ରେସ ନେତାଙ୍କୁ ଉଠାଇନେଲା
ଭୁବନେଶ୍ୱର: ଓଡ଼ିଶା ବନ୍ଦକୁ ନେଇ ଭୁବନେଶ୍ୱରର ଲୋୟର ପିଏମ୍ଜିରେ ଚାଲିଥିବା ପ୍ରତିବାଦ ବେଳେ ଭକ୍ତ ଚରଣ ଦାସ, ଜୟଦେବ ଜେନା ଓ ସୁର ରାଉତରାୟଙ୍କୁ ପୋଲିସ ଉଠାଇ ନେଇଯାଇଥିବା ସୂଚନା ମିଳିଛି। ବନ୍ଦ ସମର୍ଥନରେ ଚାଲିଥିବା ପ୍ରତିବାଦ ମଧ୍ୟରେ ପୋଲିସର ଏହି କାର୍ଯ୍ୟାନୁଷ୍ଠାନ ପରେ ଘଟଣାସ୍ଥଳରେ ଚର୍ଚ୍ଚା ବଢ଼ିଛି। ପୂର୍ବରୁ ମଧ୍ୟ ଭୁବନେଶ୍ୱରରେ ଇଣ୍ଡିଆ ବ୍ଲକ୍ର ପ୍ରତିବାଦ ବେଳେ ଅନେକ ନେତା ଓ କର୍ମୀଙ୍କୁ ପୋଲିସ ହେପାଜତରେ ନେଇଥିବା ଖବର ଆସିଥିଲା।
ସେହିପରି ହିଞ୍ଜିଳିରେ ମଧ୍ୟ କିଛି କଂଗ୍ରେସ ନେତାଙ୍କୁ ପୋଲିସ ନେଇଥିବା ସୂଚନା ମିଳିଛି। ବନ୍ଦ ପାଳନ ସମୟରେ କିଛି କଂଗ୍ରେସ ନେତା ଓ ପୋଲିସ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହେବା ପରେ ଏହି ପଦକ୍ଷେପ ନିଆଯାଇଥିବା କୁହାଯାଉଛି।
ଆଜିର ଓଡ଼ିଶା ବନ୍ଦ ନୂଆ MMDR ସଂଶୋଧନ ଆଇନ ପ୍ରତ୍ୟାହାର, ସ୍କୁଲ୍ ପାଠ୍ୟପୁସ୍ତକର ତ୍ରୁଟିକୁ ନେଇ ଶିକ୍ଷାମନ୍ତ୍ରୀଙ୍କ ଇସ୍ତଫା ଏବଂ SIRକୁ ନେଇ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଡକାଯାଇଛି। ବିଭିନ୍ନ ସ୍ଥାନରେ ପ୍ରତିବାଦ ଓ ରାସ୍ତା ଅବରୋଧ ଯୋଗୁଁ ଯାତାୟାତ ସମେତ ସାଧାରଣ ଜୀବନ ପ୍ରଭାବିତ ହୋଇଥିବା ସୂଚନା ମିଳିଛି। ତେବେ ଏହି ପ୍ରତିବାଦ କେତେ ମାତ୍ରାରେ ଶାସକ ଦଳ ଉପରେ ପ୍ରଭାବ ପକାଇବ ତାହା ଆଗାମୀ ସମୟରେ ଜଣାପଡ଼ିବ।
