NIA Spy Network: ଭାରତୀୟ ସିମ୍ରେ ପାକିସ୍ତାନରେ ଚାଲୁଥିଲା ହ୍ୱାଟସଆପ୍, ୪ ଅଭିଯୁକ୍ତଙ୍କ ବିରୋଧରେ ତଦନ୍ତ
ନୂଆଦିଲ୍ଲୀ: ଭାରତୀୟ ସିମ୍ କାର୍ଡ ବ୍ୟବହାର କରି ପାକିସ୍ତାନରେ ହ୍ୱାଟସଆପ୍ ଆକାଉଣ୍ଟ ଚାଲୁଥିବା ଏକ ସନ୍ଦିଗ୍ଧ ଗୁଇନ୍ଦା ନେଟୱର୍କର ତଦନ୍ତ ଆରମ୍ଭ କରିଛି ଜାତୀୟ ତଦନ୍ତକାରୀ ସଂସ୍ଥା (NIA)। ପଶ୍ଚିମବଙ୍ଗର ପଶ୍ଚିମ ମେଦିନୀପୁର ଓ ମୁର୍ଶିଦାବାଦ ଜିଲ୍ଲାରେ ଏହି ମାମଲା ସହ ଜଡ଼ିତ ଚାରି ଜଣଙ୍କ ନାଁ ସାମ୍ନାକୁ ଆସିଛି। ଅଭିଯୋଗ ଅନୁସାରେ, ସେମାନେ ଭାରତୀୟ ସିମ୍ କାର୍ଡ ସକ୍ରିୟ କରି ଏହାର ଓଟିପି ପାକିସ୍ତାନରେ ଥିବା ହ୍ୟାଣ୍ଡଲରମାନଙ୍କୁ ଦେଉଥିଲେ। ଏହା ଦ୍ୱାରା ଭାରତୀୟ ମୋବାଇଲ୍ ନମ୍ବରରେ ପାକିସ୍ତାନରୁ ହ୍ୱାଟସଆପ୍ ଆକାଉଣ୍ଟ ପରିଚାଳନା କରାଯାଉଥିବା ସନ୍ଦେହ କରାଯାଉଛି।
ପଶ୍ଚିମ ମେଦିନୀପୁରର ଶେଖ ମୁରସାଲିନ୍ ଓ ଗୌତମ ଖାନରା ଏବଂ ମୁର୍ଶିଦାବାଦର ଶେଖ ଜୁହାବ ଓ ଶେଖ ସୁମନ ଏହି ମାମଲାରେ ଅଭିଯୁକ୍ତ ବୋଲି ରିପୋର୍ଟରେ ଉଲ୍ଲେଖ ରହିଛି। ସିମ୍ କାର୍ଡ ପିଛା କିଛି ହଜାର ଟଙ୍କା ନେଇ ସେମାନେ ଏହି କାମ କରୁଥିବା ଅଭିଯୋଗ ହୋଇଛି। ଏହି ଆକାଉଣ୍ଟଗୁଡ଼ିକ ମାଧ୍ୟମରେ ଦେଶର ସୁରକ୍ଷା ସମ୍ବନ୍ଧୀୟ ସମ୍ବେଦନଶୀଳ ତଥ୍ୟ ପଠାଯାଉଥିଲା କି ନାହିଁ, ତାହା ମଧ୍ୟ ତଦନ୍ତର ପରିସରରେ ରହିଛି। ଗୃହ ମନ୍ତ୍ରଣାଳୟର ନିର୍ଦ୍ଦେଶ ପରେ ପଶ୍ଚିମବଙ୍ଗ STF ନିକଟରୁ ଏହି ଦୁଇଟି ମାମଲା NIA ହାତକୁ ନେଇଥିବା ସୂଚନା ମିଳିଛି।
NIAର ସନ୍ଦେହ ଅନୁସାରେ, ଗତ କିଛି ବର୍ଷ ମଧ୍ୟରେ ଏହି ପଦ୍ଧତିରେ ୪୦୦ରୁ ଅଧିକ ଭାରତୀୟ ସିମ୍ କାର୍ଡ ସକ୍ରିୟ କରାଯାଇ ପାକିସ୍ତାନୀ ହ୍ୟାଣ୍ଡଲରଙ୍କୁ ଦିଆଯାଇଥାଇପାରେ। ତେବେ ଏହି ସଂଖ୍ୟା ଓ ଅଭିଯୋଗଗୁଡ଼ିକର ସତ୍ୟତା ତଦନ୍ତ ପରେ ସ୍ପଷ୍ଟ ହେବ। ଏହି ନେଟୱର୍କ ପଛରେ ଅନ୍ୟ କେହି ଜଡ଼ିତ ଅଛନ୍ତି କି ନାହିଁ ଏବଂ ଭାରତର ସୁରକ୍ଷା ସହ ଜଡ଼ିତ ତଥ୍ୟ ଆଦାନପ୍ରଦାନ ହୋଇଛି କି ନାହିଁ, ସେନେଇ ତଦନ୍ତ ଜାରି ରହିଛି।
