DDA vs BDA Flat Price: ଦିଲ୍ଲୀରେ ୧୪.୯୫ ଲକ୍ଷରୁ ଫ୍ଲାଟ୍,ଭୁବନେଶ୍ୱରରେ ଏକାମ୍ର ରେସିଡେନ୍ସିର ଫ୍ଲାଟ୍ ର ଦାମ ଦାମ ପାଖାପାଖି କୋଟିଏ!
ଭୁବନେଶ୍ୱର: ଦିଲ୍ଲୀରେ ନିଜ ଘର କିଣିବାକୁ ଚାହୁଁଥିବା ଲୋକଙ୍କ ପାଇଁ ଦିଲ୍ଲୀ ବିକାଶ ପ୍ରାଧିକରଣ (DDA) ନୂଆ ସୁଯୋଗ ଆଣିଛି। ନରେଲା ଅଞ୍ଚଳରେ ୨,୫୧୬ଟି LIG ଫ୍ଲାଟ୍ ବିକ୍ରି ପାଇଁ ‘DDA Awas Nivesh Yojana 2026’ ଅଧୀନରେ ୨୫ ପ୍ରତିଶତ ରିହାତି ଘୋଷଣା କରାଯାଇଛି। ଏହାପରେ ଫ୍ଲାଟ୍ର ପ୍ରାରମ୍ଭିକ ମୂଲ୍ୟ ୧୪.୯୫ ଲକ୍ଷ ଟଙ୍କା ରହିଛି। ଅନଲାଇନ୍ ପଞ୍ଜୀକରଣ ଅକ୍ଟୋବର ୧୪ରୁ ଆରମ୍ଭ ହେବାକୁ ଥିବା ବେଳେ ଅକ୍ଟୋବର ୨୦ ଦିନ ୧୨ଟାରୁ ବୁକିଂ ଆରମ୍ଭ ହେବ। ବୁକିଂ ପାଇଁ ୧ ଲକ୍ଷ ଟଙ୍କା ଜମା କରିବାକୁ ପଡ଼ିବ। ତେବେ ଅନ୍ତିମ ମୂଲ୍ୟ ଓ ଅତିରିକ୍ତ ଦେୟ ଜାଣିବା ପାଇଁ ଆବେଦନକାରୀମାନେ DDAର ଅଧିକାରିକ ବିବରଣୀ ଯାଞ୍ଚ କରିବା ଆବଶ୍ୟକ।
ଅନ୍ୟପଟେ, ଭୁବନେଶ୍ୱରରେ ଘର କିଣିବାକୁ ଚାହୁଁଥିବା ଲୋକଙ୍କ ନଜର ବିଡିଏର ସୁବୁଦ୍ଧିପୁରସ୍ଥିତ ଏକାମ୍ର ରେସିଡେନ୍ସି ପ୍ରକଳ୍ପ ଉପରେ ରହିଛି। ବିଡିଏର ଅଧିକାରିକ ତଥ୍ୟ ଅନୁସାରେ, ଏହି ପ୍ରକଳ୍ପରେ ୪୧୬ଟି ୨-BHK ଏବଂ ୨୮୮ଟି ୩-BHK ଫ୍ଲାଟ୍ ରହିଛି। ପ୍ରକାଶିତ ରିପୋର୍ଟ ଅନୁଯାୟୀ, ଏଠାରେ ୨-BHK, ଷ୍ଟଡି ରୁମ୍ ସହ ୨-BHK ଏବଂ ୩-BHK ଫ୍ଲାଟ୍ର ମୂଲ୍ୟ ପ୍ରାୟ ୭୮.୩ ଲକ୍ଷରୁ ୯୬.୮ ଲକ୍ଷ ଟଙ୍କା ମଧ୍ୟରେ ରହିଛି। ଏହି ଦାମ ଫ୍ଲାଟ୍ର ପ୍ରକାର ଅନୁସାରେ ଭିନ୍ନ ହୋଇଥାଏ।
ଦୁଇଟି ଯୋଜନାର ମୂଲ୍ୟ ତୁଳନା କଲେ, DDAର ଘୋଷିତ ପ୍ରାରମ୍ଭିକ ଦାମ ଏକାମ୍ର ରେସିଡେନ୍ସିର ଦାମଠାରୁ ବହୁତ କମ୍। କିନ୍ତୁ ଏହି ତୁଳନାକୁ ସିଧାସଳଖ ସମାନ ଧରିବା ଠିକ୍ ନୁହେଁ, କାରଣ DDA ଯୋଜନାରେ LIG ଶ୍ରେଣୀର ଫ୍ଲାଟ୍ ଥିବାବେଳେ ଏକାମ୍ର ରେସିଡେନ୍ସିରେ ୨-BHK ଓ ୩-BHK ଭଳି ଭିନ୍ନ ପ୍ରକାରର ଫ୍ଲାଟ୍ ରହିଛି। ଫ୍ଲାଟ୍ର ଆକାର, ଅବସ୍ଥାନ, ସୁବିଧା, ଯୋଗ୍ୟତା ଓ ଅତିରିକ୍ତ ଖର୍ଚ୍ଚକୁ ବିଚାର କରିବା ପରେ ହିଁ ଉଭୟ ପ୍ରକଳ୍ପର ପ୍ରକୃତ ଖର୍ଚ୍ଚ ତୁଳନା କରାଯାଇପାରିବ।
