Telangana Hostel News: ଚିକେନ୍ ଖାଇବା ପରେ ଅସୁସ୍ଥ ହେଲେ ୨୨ ଛାତ୍ରୀ, ହଷ୍ଟେଲର ଖାଦ୍ୟ ଗୁଣବତ୍ତା ଓ ପାଣି ଉପରେ ଉଠିଲା ପ୍ରଶ୍ନ
ତେଲେଙ୍ଗାନା: ତେଲେଙ୍ଗାନାର ୱାନାପାର୍ଥି ଜିଲ୍ଲାର ପବ୍ବେରୁସ୍ଥିତ ସରକାରୀ ମହିଳା ପଲିଟେକ୍ନିକ୍ କଲେଜର ହଷ୍ଟେଲରେ ଅନେକ ଛାତ୍ରୀ ଅସୁସ୍ଥ ହୋଇପଡ଼ିଥିବା ଖବର ସାମ୍ନାକୁ ଆସିଛି। ରିପୋର୍ଟ ଅନୁସାରେ, ଅକ୍ଟୋବର ୭ ତାରିଖ ବୁଧବାର ରାତିରେ ଚିକେନ୍ ତରକାରି ଖାଇବାର କିଛି ଘଣ୍ଟା ପରେ ଛାତ୍ରୀମାନଙ୍କୁ ବାନ୍ତି ଓ ପେଟ ଯନ୍ତ୍ରଣା ହୋଇଥିଲା। କେତେକ ଛାତ୍ରୀଙ୍କୁ ଚିକିତ୍ସା ପାଇଁ ନିକଟସ୍ଥ ହସ୍ପିଟାଲ ନିଆଯାଇଥିଲା। ଏକ ରିପୋର୍ଟରେ ୨୨ ଜଣ ଛାତ୍ରୀ ଅସୁସ୍ଥ ହୋଇଥିବା କୁହାଯାଇଛି।
ଛାତ୍ରୀମାନେ ଅସୁସ୍ଥ ହେବା ପରେ ହଷ୍ଟେଲରେ ଦିଆଯାଉଥିବା ଖାଦ୍ୟ ଓ ପିଇବା ପାଣିର ଗୁଣବତ୍ତାକୁ ନେଇ ପ୍ରଶ୍ନ ଉଠିଛି। ଅଧିକାରୀଙ୍କ ଅନୁସାରେ, ଖାଦ୍ୟଜନିତ ସଂକ୍ରମଣ ସହିତ ଦୂଷିତ ପାଣି ମଧ୍ୟ ଅସୁସ୍ଥତାର ସମ୍ଭାବ୍ୟ କାରଣ ହୋଇପାରେ। ହଷ୍ଟେଲରେ ଥିବା ଜଳ ବିଶୋଧନ ଯନ୍ତ୍ର ଗତ କିଛି ଦିନ ଧରି ବନ୍ଦ ଥିବା ନେଇ ମଧ୍ୟ ରିପୋର୍ଟ ଆସିଛି। ତେବେ ଚିକେନ୍ କିମ୍ବା ପାଣି ଯୋଗୁଁ ହିଁ ଛାତ୍ରୀମାନେ ଅସୁସ୍ଥ ହୋଇଥିଲେ ବୋଲି ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ।
ଘଟଣା ପରେ ୱାନାପାର୍ଥି ଜିଲ୍ଲାପାଳ ଆଦର୍ଶ ସୁରଭି ହଷ୍ଟେଲ ପରିଦର୍ଶନ କରି ଛାତ୍ରୀମାନଙ୍କ ସହ କଥା ହୋଇଥିବା ଜଣାପଡିଛି। ସେ ଖାଦ୍ୟର ଗୁଣବତ୍ତା, ପିଇବା ପାଣି ଓ ପରିମଳ ବ୍ୟବସ୍ଥାର ଯାଞ୍ଚ କରିବା ସହ ଦାୟିତ୍ୱରେ ଅବହେଳା କରିଥିବା ଅଧିକାରୀଙ୍କ ବିରୋଧରେ ପଦକ୍ଷେପ ନିଆଯିବ ବୋଲି କହିଛନ୍ତି। ଛାତ୍ରୀମାନଙ୍କ ସ୍ୱାସ୍ଥ୍ୟ ଓ ଚିକିତ୍ସା ସମ୍ପର୍କରେ ତେଲେଙ୍ଗାନା ମାନବାଧିକାର କମିଶନ ମଧ୍ୟ ଜିଲ୍ଲାପାଳଙ୍କଠାରୁ ରିପୋର୍ଟ ମାଗିଛନ୍ତି। ଅସୁସ୍ଥତାର ପ୍ରକୃତ କାରଣ ଯାଞ୍ଚ ପରେ ସ୍ପଷ୍ଟ ହେବ।
