UP Viral Love Story: ୭୫ ବର୍ଷୀୟ ବୃଦ୍ଧଙ୍କ ସହ ୩୦ ବର୍ଷୀୟ ଇନ୍ଷ୍ଟାଗ୍ରାମ ବ୍ଲଗରଙ୍କ ନିର୍ବନ୍ଧ! ଜୋର ଧରିଛି ଚର୍ଚ୍ଚା
ଉତ୍ତରପ୍ରଦେଶ: ଉତ୍ତରପ୍ରଦେଶର ଔରୈୟା ଜିଲ୍ଲାର ୭୫ ବର୍ଷୀୟ ରାମସୁଗର ଓ ୩୦ ବର୍ଷୀୟ ଇନ୍ଷ୍ଟାଗ୍ରାମ ବ୍ଲଗର ରାଣୀ ରାଜପୁତଙ୍କ କଥିତ ପ୍ରେମ ସମ୍ପର୍କକୁ ନେଇ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି। ଦୁହିଁଙ୍କ ବୟସ ମଧ୍ୟରେ ପ୍ରାୟ ୪୫ ବର୍ଷର ତଫାତ ରହିଛି। ଭାଇରାଲ ଦାବି ଅନୁସାରେ, ପ୍ରାୟ ଏକ ସପ୍ତାହ ପୂର୍ବରୁ ଦୁହିଁଙ୍କ ନିର୍ବନ୍ଧ ହୋଇଥିବା ବେଳେ ଏବେ ବିବାହ ପାଇଁ ପ୍ରସ୍ତୁତି ଚାଲିଛି। ରାଣୀ ପ୍ରାୟ ଦୁଇ ବର୍ଷ ଧରି ରାମସୁଗରଙ୍କ ଘରକୁ ଯାଆସ କରୁଥିଲେ ଏବଂ ଏହି ସମୟରେ ଦୁହିଁଙ୍କ ମଧ୍ୟରେ ନିକଟତା ବଢ଼ିଥିବା କୁହାଯାଉଛି। ତେବେ ସମ୍ପର୍କ ଓ ବିବାହ ସମ୍ପର୍କିତ ଖବରର ସ୍ୱାଧୀନ ପୁଷ୍ଟି ହୋଇନାହିଁ।
ରାମସୁଗରଙ୍କ ଝିଅ ରାଧାଙ୍କ କହିବା ଅନୁସାରେ, ରାଣୀ ପରିବାରର ଯୋଗାଯୋଗରେ ଥିଲେ ଏବଂ ସମସ୍ତେ ମିଶି ଭିଡିଓ ମଧ୍ୟ ସୁଟ୍ କରୁଥିଲେ। ରାଧାଙ୍କ ଦାବି ଅନୁଯାୟୀ, ଔରୈୟାର ଏକ ବ୍ୟୁଟି ପାର୍ଲରରେ ଦୁହିଁଙ୍କ ରିଙ୍ଗ୍ ସେରିମୋନି ହୋଇଥିଲା। ଏହି କଥିତ ସମ୍ପର୍କକୁ ନେଇ ସୋସିଆଲ ମିଡିଆରେ ଭିନ୍ନ ଭିନ୍ନ ମତ ଆସୁଛି। କେତେକ ଏହାକୁ ବୟସର ତଫାତକୁ ଖାତିର ନକରି ଗଢ଼ିଉଠିଥିବା ପ୍ରେମ ସମ୍ପର୍କ ବୋଲି କହୁଥିବା ବେଳେ ଅନ୍ୟ କେତେକ ଏହାକୁ ଲୋକପ୍ରିୟତା ପାଇବାର ଉଦ୍ୟମ ବୋଲି ମତ ଦେଉଛନ୍ତି।
ଏହି ମଧ୍ୟରେ ନିର୍ବନ୍ଧର ଭିଡିଓ ସୁଟ୍ ସମୟରେ ରାମସୁଗରଙ୍କ ସ୍ୱାସ୍ଥ୍ୟ ବିଗିଡ଼ିବା ଏବଂ ତାଙ୍କୁ ହସ୍ପିଟାଲରେ ଭର୍ତ୍ତି କରାଯିବା ନେଇ ମଧ୍ୟ ଦାବି ସାମ୍ନାକୁ ଆସିଛି। ତେବେ ଏହି ଖବରକୁ ନେଇ ସ୍ପଷ୍ଟ ସୂଚନା ମିଳିନାହିଁ | ତେଣୁ ଭାଇରାଲ ପୋଷ୍ଟ ଓ ସୋସିଆଲ ମିଡିଆର ଚର୍ଚ୍ଚାକୁ ଆଧାର କରି ନିର୍ବନ୍ଧ, ବିବାହ କିମ୍ବା ହସ୍ପିଟାଲରେ ଭର୍ତ୍ତି ହେବା ଘଟଣାକୁ ନିଶ୍ଚିତ ଖବର ଭାବେ ଗ୍ରହଣ କରିବା ଉଚିତ୍ ନୁହେଁ।
