Festive Sales Slump: ଚଳିତ ବର୍ଷ ପାର୍ବଣ ବଜାରରେ ମୋବାଇଲ୍ ଓ ଟିଭି ବିକ୍ରି କମିଲା, ଉତ୍ପାଦନ ୨୦% ହ୍ରାସ ଆଶଙ୍କା
ନୂଆଦିଲ୍ଲୀ: ଚଳିତ ପାର୍ବଣ ଋତୁରେ ସ୍ମାର୍ଟଫୋନ୍ ଓ ଟେଲିଭିଜନ୍ ବିକ୍ରି ଆଶାଠାରୁ କମ୍ ରହିବାରୁ ଇଲେକ୍ଟ୍ରୋନିକ୍ସ ବଜାରରେ ଚିନ୍ତା ବଢ଼ିଛି। ବିକ୍ରି ହ୍ରାସ ଯୋଗୁଁ ଦୋକାନୀ ଓ ବିକ୍ରେତାଙ୍କ ପାଖରେ ଅଧିକ ପରିମାଣର ଅବିକ୍ରିତ ସାମଗ୍ରୀ ଜମା ହୋଇରହିଛି। ଫଳରେ ସ୍ମାର୍ଟଫୋନ୍ ଓ ଟିଭି ନିର୍ମାତା କମ୍ପାନୀଗୁଡ଼ିକ ଉତ୍ପାଦନ କମାଇବାକୁ ଯୋଜନା କରୁଛନ୍ତି।
ପ୍ରମୁଖ ବ୍ରାଣ୍ଡ୍ ଓ ଉତ୍ପାଦନ ସହଯୋଗୀ କମ୍ପାନୀଙ୍କ ସୂଚନା ଅନୁସାରେ, ଚଳିତ ପାର୍ବଣ ଋତୁରେ ଏପର୍ଯ୍ୟନ୍ତ ମୋବାଇଲ୍ ଓ ଟିଭି ବିକ୍ରିର ପରିମାଣ ଗତବର୍ଷ ତୁଳନାରେ ପ୍ରାୟ ୨୫ ପ୍ରତିଶତ କମିଛି। ଏହି ସ୍ଥିତିକୁ ଦେଖି ଆଗାମୀ ଦୁଇରୁ ତିନି ମାସ ମଧ୍ୟରେ ଉତ୍ପାଦନ ଧାର୍ଯ୍ୟ ଲକ୍ଷ୍ୟଠାରୁ ୨୦ ପ୍ରତିଶତ ପର୍ଯ୍ୟନ୍ତ କମ୍ ରହିପାରେ। ଏହାଦ୍ୱାରା କମ୍ପାନୀଗୁଡ଼ିକ ନିଜର ଉତ୍ପାଦନ ଯୋଜନାରେ ପରିବର୍ତ୍ତନ କରିବାକୁ ବାଧ୍ୟ ହେଉଛନ୍ତି।
ସାଧାରଣତଃ ପାର୍ବଣ ସମୟକୁ ମୋବାଇଲ୍ ଓ ଟିଭି ବିକ୍ରି ପାଇଁ ବର୍ଷର ସବୁଠାରୁ ବଡ଼ ବଜାର ଭାବେ ଦେଖାଯାଏ। କିନ୍ତୁ ଏଥର ବିକ୍ରି ହ୍ରାସ ହେବାରୁ ଶିଳ୍ପ ଜଗତର ଆଶା ମୁତାବକ ବ୍ୟବସାୟ ହୋଇପାରିନାହିଁ। ପୂର୍ବରୁ ଦୁର୍ବଳ ବଜାର ସ୍ଥିତିରେ ଥିବା ଏହି ଶିଳ୍ପ ପାଇଁ ପାର୍ବଣ ବିକ୍ରିର ମନ୍ଥରତା ଆଉ ଏକ ଚ୍ୟାଲେଞ୍ଜ ସୃଷ୍ଟି କରିଛି।
