ମହାପ୍ରଭୁ ଶ୍ରୀଜଗନ୍ନାଥଙ୍କ ପହଣ୍ଡି ବିଜେ; ରଥରେ ବିରାଜିବେ କଳା ସାଆନ୍ତ
ପୁରୀ: ଆରମ୍ଭ ହେଲା ମହାପ୍ରଭୁ ଶ୍ରୀଜଗନ୍ନାଥଙ୍କ ପହଣ୍ଡି ବିଜେ ନୀତି । କି ମନୋରମ ଦୃଶ୍ୟ ସେ। ଭକ୍ତଙ୍କ ମେଳିରେ ଝୁଲି ଝୁଲି ଆସୁଛନ୍ତି କଳା ସାଆନ୍ତ। ଦିବ୍ୟ ଟାହିଆରେ ସୁଶୋଭିତ ହୋଇ କି ସୁନ୍ଦର ଲାଗୁଛନ୍ତି ମହାପ୍ରଭୁ। ଘଣ୍ଟ ଶଙ୍ଖ ଧ୍ବନିରେ ଦୁଲୁକୁଛି ଶ୍ରୀକ୍ଷେତ୍ର। ହରିବୋଲ, ହୁଳହୁଳିରେ ଚତୁର୍ଦ୍ଦିଗ କମ୍ପୁଛି । ଭକ୍ତଙ୍କୁ ଟିକେ ଦେଖିବେ ବୋଲି ରତ୍ନବେଦୀରୁ ଓହ୍ଲାଇ ଆସିଛନ୍ତ ମହାପ୍ରଭୁ। ନନ୍ଦିଘୋଷ ରଥରେ ବିଜେ କରିବେ ପ୍ରଭୁ ଶ୍ରୀ ଜଗନ୍ନାଥ ।
ଏହି ଦିବ୍ୟ ଦୃଶ୍ୟ ଦେଖିବାକୁ କାହିଁ କେବେଠୁ ଅପେକ୍ଷା କରି ରହିଛନ୍ତି ଭକ୍ତ। ଟାହିଆ ହଲେଇ ଝୁୁଲି ଝୁଲି ଆସୁଥିବା କଳା ଶ୍ରୀମୁଖକୁ ଦେଖି ବିଭୋର ହୋଇପଡୁଛନ୍ତି ଶ୍ରଦ୍ଧାଳୁ। ଏହାପୂର୍ବରୁ ବଡଭାଇ ବଳଭଦ୍ର ଓ ମା ସୁଭଦ୍ରାଙ୍କ ପହଣ୍ଡି ବିଜେ ନୀତି ସରିଛି । ପ୍ରଥମେ ଚକ୍ରରାଜ ସୁଦର୍ଶନ ପରେ ପ୍ରଭୁ ବଳଦେବ ଓ ପରେ ପରେ ଦେବୀ ସୁଭଦ୍ରା ପହଣ୍ଡିରେ ବାହାରିଥିଲେ। ଶେଷରେ ରଥରେ ବିଜେ କରିବା ଲାଗି ପହଣ୍ଡିରେ ବାହାରିଛନ୍ତି ମହାପ୍ରଭୁ ଶ୍ରୀଜଗନ୍ନାଥ। ଶ୍ରୀଜଗନ୍ନାଥଙ୍କ ଦର୍ଶନ ପାଇଁ ଭକ୍ତିମାନଙ୍କ ମଧ୍ୟରେ ରହିଛି ଅଦମ୍ୟ ଉତ୍ସାହ।
