ରାଜୀବ ଲୋଚନ ମିଶ୍ର

5/07/2023 at 10:01 PM

ଗୋପାଳପୁର,୦୫/୦୭ ଚିକିଟି ନିର୍ବାଚନ ମଣ୍ଡଳୀ ତଥା ଗୋଳନ୍ଥରା ଥାନା ଅନ୍ତର୍ଗତ ପିତାତଳି ଗ୍ରାମରେ ବୁଧବାର ସକାଳୁ ବିଜେଡି ନେତା ତଥା ସରପଞ୍ଚ ଏ.ରାଙ୍ଗାରାଓଙ୍କ ଜ୍ୱାଇଁ ଏସ.କାମେସୁକୁ ସଂଘବଦ୍ଧ ଭାବେ ମରଣାନ୍ତକ ଆକ୍ରମଣ ହୋଇଛି । ରାଜନୈତିକ ଉର୍ଦ୍ଧେଶ୍ୟ ରଖି ଏକାଧିକ ବ୍ୟକ୍ତି ଖଣ୍ଡା, କାତି ଧରି କାମେସୁଙ୍କୁ ଗୁଡ଼ାଇ ଗୁଡ଼ାଇ ତାଙ୍କ ଦୁଇ ଗୋଡ଼କୁ ହାଣିବା ସହିତ ମୁଣ୍ଡକୁ ମଧ୍ୟ ଆକ୍ରମଣ କରିଛନ୍ତି । ସର୍ବଦା ରାଜନୈତିକ ହିଂସାକୁ ନେଇ ଚର୍ଚ୍ଚିତ ରହି ଆସିଥିବା ପିତାତଳି ଗାଁ ପୁଣି ଥରେ ଅସ୍ଥିର ହୋଇ ଉଠିବା ପୋଲିସ ପାଇଁ ମୁଣ୍ଡ ବ୍ୟଥାର କାରଣ ସାଜିଛି । ଗୁରୁତର ଅବସ୍ଥାରେ କାମେସୁଙ୍କୁ ପ୍ରଥମେ ବ୍ରହ୍ମପୁର ବଡ ମେଡିକାଲ ନିଆଯାଇ ଆଶୁ ଚିକିତ୍ସା ପରେ ଅବସ୍ଥା ସଙ୍କଟାପନ୍ନ ହେବାରୁ ବିଶାଖାପାଟଣା ସ୍ଥାନାନ୍ତରିତ କରାଯାଇଛି । ଆଗକୁ ନିର୍ବାଚନ ରହିଥିବା ବେଳେ ପିତାତଳିରେ ଏଭଳି ରାଜନୈତିକ ଗଣ୍ଡଗୋଳ ରାଜନୈତିକ ପାଣିପାଗ କୁ ଉଷ୍ମ କରିଦେଇଛି । ପିତାତଳି ଘଟଣା ପରେ ଘଟଣାସ୍ଥଳକୁ ପ୍ରବେଶନ ଆଇପିଏସ ଅଫିସର ଅଙ୍କିତ ବର୍ମା,ସଦର ଏସଡିପିଓ ଶିବ ଶଙ୍କର ମହାପାତ୍ର ଓ ଗୋଳନ୍ଥରା ଆଇଆଇସି ବିବେକାନନ୍ଦ ମହନ୍ତ ପହଂଚି ଘଟଣାର ତଦନ୍ତ ଆରମ୍ଭ କରିଛନ୍ତି । ପିତାତଳି ଗାଁରେ ଦୁଇ ପ୍ଲାଟୁନ ଫୋର୍ସ ମୃତୟନ ହୋଇଥିବା ଏବଂ ଘଟଣାରେ ପୁଲିସ ୩ ଜଣଙ୍କୁ ଥାନାରେ ଅଟକ ଥିବା ଏସଡିପିଓ ସୂଚନା ଦେଇଛନ୍ତି । ଆକ୍ରମଣ ର ଶିକାର ହୋଇଥିବା ବ୍ୟକ୍ତିଙ୍କ ସ୍ତ୍ରୀ ଏସ.ସୁନିତାଙ୍କ ପକ୍ଷରୁ ୨୦ ଜଣଙ୍କ ନାମରେ ଏତଲା ଦେଇଥିବା ପୋଲିସ କହିଛି । ଅନ୍ୟ ପଟେ ବ୍ରହ୍ମପୁର ଆରକ୍ଷୀ ଅଧିକ୍ଷକ ଡ଼ ଏସ ଶ୍ରବଣ ବିବେକ ମଧ୍ୟ ପିତାତଳି ରେ ପହଞ୍ଚି ପରିସ୍ଥିତି ନେଇ ଅନୁଧ୍ୟାନ କରିବା ସହ ଗାଁ ରେ ଶାନ୍ତି ବଜାୟ ରଖିବାକୁ ଲୋକଙ୍କୁ ନିବେଦନ କରିଛନ୍ତି