ପଞ୍ଚାୟତ ରୁ ପି ଡି ଏସ୍ ଚାଉଳ ଚୋରା ଚାଲାଣ ଉଦ୍ୟମ ବିଫଳ
ବୀରମହାରାଜପୁର : ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଲକ ଅନ୍ତର୍ଗତ କ୍ଷେମାଲୋଏ ପଞ୍ଚାୟତରୁ ବୁଧବାର ପିଡିଏସ୍ ଚାଉଳ କୁ ପ୍ଲାଷ୍ଟିକ ପ୍ଯାକେଟ ରେ ଭର୍ତ୍ତି କରି ଚୋରା ଚାଲାଣ କରିବା ପାଇଁ ଉଦ୍ଯମ କରୁଥିବା ସନ୍ଦେହ କରି ପଞ୍ଚାୟତରେ ଉତ୍ତେଜନା ଦେଖାଦେଇଛି । ଅଭିଯୋଗ ମୁତାବକ ଆଜି ସକାଳ ୮ ଘଣ୍ଟା ସମୟରେ ପଞ୍ଚାୟତ ଗୋଦାମ ଘର ଭିତରେ ୩ ଜଣ ବ୍ଯକ୍ତି ପିଡିଏସ ଚାଉଳ ପ୍ଯାକେଟ ରୁ ପ୍ଲାଷ୍ଟିକ ପ୍ଯାକେଟ ରେ ଭର୍ତ୍ତି କରୁଥିବା ପଞ୍ଚାୟତ କୁ ଚାଉଳ ନେବାକୁ ଆସିଥିବା ହିତାଧିକାରୀ ମାନେ ଦେଖିଥିଲେ । ମାତ୍ର ହିତାଧିକାରୀଙ୍କୁ ଚାଉଳ ଦେବା ବଦଳରେ ଚାଉଳ ଗୋଦାମରେ ଚାଉଳ ପ୍ଲାଷ୍ଟିକ ପ୍ଯାକେଟ ଭର୍ତ୍ତି କରିବାରେ ଲାଗିଥିଲେ । ତେବେ ସେହି ସମୟରେ ଯୋଗାଣ ସହାୟକ ପଞ୍ଚାୟତ ରେ ପହଞ୍ଚି ଥିବାରୁ ତାଙ୍କୁ ସ୍ଥାନିୟ ଲୋକେ କଣ ପାଇଁ ଚାଉଳ ପ୍ଲାଷ୍ଟିକ ପ୍ଯାକେଟ ରେ ଭର୍ତ୍ତି କରାଯାଉଛି ବୋଲି ପ୍ରଶ୍ନ କରିବାରୁ ସେ ସନ୍ତୋଷ ଜନକ ଉତ୍ତର ଦେଇ ନ ପାରି ଯାହା କରିବା କଥା କର ବୋଲି କହିଥିବା ଜଣାପଡିଛି । ତେବେ ପଞ୍ଚାୟତରୁ ପିଡିଏସ ଚାଉଳ ଚୋରା ଚାଲାଣ ଉଦ୍ଯମ କରୁଥିବା ସନ୍ଦେହ ରେ ପଞ୍ଚାୟତ ରେ ଉତ୍ତେଜନା ବଢିଥିଲା । ଖବର ପାଇ ଘଟଣା ସ୍ଥଲକୁ ଯୋଗାଣ ସହାୟତା ଅଧିକାରୀ ରାଜକିଶୋର ନାୟକ ପହଞ୍ଚି ପ୍ଲାଷ୍ଟିକ ପ୍ଯାକେଟ ରେ ଭର୍ତ୍ତି ହୋଇଥିବା ୪୪ ପ୍ଯାକେଟ ଚାଉଳ ଜବତ କରିବା ସହିତ ଅଧିକ ତଦନ୍ତ କରୁଥିବା ଜଣାପଡିଛି।
