ଚିତ୍ରୋତ୍ପଳା ମହିଳା ମହାସଂଘ ସାତ ଦିନରେ ତିଆରିଲେ ଦଶ ହଜାର ଜାତୀୟ ପତାକା

ସୌମିତ୍ରି ମେହେର

ବୀରମହାରାଜପୁର : ଆସନ୍ତା ୧୫ ତାରିଖରେ ଭାରତ ରେ ପାଳନ ହେବ ୭୭ତମ ସ୍ବାଧିନତା ଦିବସ । ସମସ୍ତ ସରକାରୀ ଓ ବେସରକାରୀ କାର୍ଯ୍ୟାଳୟରେ ଉତ୍ତୋଳନ ହେବ ଜାତୀୟ ତ୍ରିରଙ୍ଗା ପତାକା । ହର ଘର ତ୍ରୀରଙ୍ଗା ମାଧ୍ୟମରେ ପ୍ରତି ଘରେ ଫରଫର ହୋଇ ଉଡିବ ତ୍ରୀରଙ୍ଗା । ଏଥିପାଇଁ ଜାତୀୟ ପତାକା ପ୍ରସ୍ତୁତି ଯୋରସୋର ରେ ଚାଲିଛି । ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ର ମିଶନଶକ୍ତି ମହିଳା ମାନେ ସାତ ଦିନରେ ତିଆରି କରିଛନ୍ତି ପ୍ରାୟ ଦଶ ହଜାର ଜାତୀୟ ପତାକା । ଜାତୀୟ ପତାକା ତିଆରି କରି ନିଜେ ରୋଜଗାର କରିବା ସହିତ ତାଙ୍କ ତିଆରି ତ୍ରୀରଙ୍ଗା ଘରେ ଘରେ ଉଡିବା ନେଇ ସେମାନେ ଗର୍ବିତ ବୋଲି କହିଛନ୍ତି । ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଚିତ୍ରୋତ୍ପଳା ମହିଳା ମହାସଙ୍ଘ ର ଏହି ପ୍ରଚେଷ୍ଟା କୁ ଏବେ ସାଧାରଣରେ ପ୍ରଶଂସା କରାଯାଉଛି । ୧୧ଜଣ ସଦସ୍ୟା ଥିବା ଉକ୍ତ ସଂଘର ସଦସ୍ୟା ମାନେ ସକାଳୁ ସନ୍ଧ୍ୟା ପର୍ଯ୍ୟନ୍ତ ପରିଶ୍ରମ କରି ସାତ ଦିନରେ ତିଆରି କରିଛନ୍ତି ୧୦ ହଜାର ଜାତିୟ ପତାକା । ଜିଲ୍ଲା ପ୍ରଶାସନର ତରଫରୁ ଉକ୍ତ ମହାସଙ୍ଘ କୁ ଦିଆଯାଇଥିଲl ଉକ୍ତ ଦାୟିତ୍ବ । ସଙ୍ଘ ଙ୍କୁ ଜାତୀୟ ପତାକା ପ୍ରତି ୨୪ ରୁ ୨୫ ଟଙ୍କା ଲେଖାଏଁ ଦିଆଯାଇ ଥିବା ଜଣାପଡ଼ିଛି । ମହିଳା ମିସନ ଶକ୍ତି ର ସଦସ୍ୟା ମାନେ ଏହାକୁ ପ୍ରସ୍ତୁତ କରି ୨୫ଶହ ଜାତୀୟ ପତାକା କୁ ସୁବର୍ଣ୍ଣ ଶିଖା ଡିଏଲଏଫ କୁ ଏବଂ ୭ ହଜାର ୫ଶହ ଜାତୀୟ ପତାକା କୁ ବ୍ଲକ ପ୍ରଶାସନ କୁ ଦେଇଛି। ଉକ୍ତ ପତକା କୁ ପ୍ରତି ପଞ୍ଚାୟତ ର ବିଭିନ୍ନ ଗ୍ରାମକୁ ଦିଆଯାଇ ପ୍ରତି ଘରେ ତ୍ରୀରଙ୍ଗା ଉଡାଯିବlର ଲକ୍ଷ୍ୟ ରଖାଯାଇଛି । ବୀରମହାରାଜପୁର ବ୍ଲକ ପ୍ରୋଜେକ୍ଟ କୋର୍ଡିନେଟର ଶାନ୍ତନୁ ମେହେର ଓ ବିପିଏସିଏ ଦୀପିକା ରାଣୀ ମିଶ୍ର ଙ୍କ ପ୍ରତ୍ୟକ୍ଷ ତତ୍ବାବଧାନରେ ମହାସଙ୍ଘର ସଭାନେତ୍ରୀ ସସ୍ମିତା ଦାଶ ଓ ସମ୍ପାଦିକ ମମତା ସାହୁ ଏହାର ନେତୃତ୍ବ ନେଇଥିଲେ । ମହାସଙ୍ଘର ସଦସ୍ୟା ମମତା ମଲ୍ଲିକ , ଅହଲ୍ୟା ଚାନ୍ଦ , କେତକି ମେଣ୍ଡିଲି , ମିନତି ଗୁଦୁରିଆ , କାଦମ୍ବିନି ବେହେରା , ଅନିତା ପଧାନ , କୌଶଲ୍ୟା ଆଡଜାନୀ , ଜଶବନ୍ତି ବିଶ୍ବାଳ ଓ ବନିତା ପଧାନ ପ୍ରମୁଖ ଏହି ଜାତୀୟ ପତାକା ତିଆରି କରିଛନ୍ତି । ନିଜେ ନିଜେ କପଡା କାଟି ମେସିନ ସାହାର୍ଯ୍ୟରେ ସିଲେଇ କରିଛନ୍ତି ଜାତୀୟ ପତାକା । ଜାତୀୟ ପତାକା ତିଆରି ପାଇଁ ଆମକୁ ଯେତେବେଳେ ପ୍ରଶାସନ ଦାୟିତ୍ବ ଦେଲା ଆମେ ବେଶ ଉତ୍ସାହିତ ହୋଇ ପଡିଥିଲୁ । ଏହା ଆମପାଇଁ ଏକ ଗର୍ବର ବିଷୟ ଥିଲା । ଦେଶ ଓ ଜାତୀର ଗୌରବ ତ୍ରୀରଙ୍ଗା ତିଆରି ରେ ଆମେ ଦିନରାତି ଏକ କରିଦେଇ କାମ କରିଥିଲୁ । ଆମେ ଏତେ ଉତ୍ସାହିତ ଥିଲୁ ଯେ କଷ୍ଟ ବି ଜାଣି ପାରି ନ ଥିଲୁ । ଯେଉଁ ପତାକା କୁ ଆମେ କିଣି କରି ଉଡାଉ ଥିଲୁ ତାହାକୁ ଆମେ ତିଆରି କରି ଗର୍ବୀତ ବୋଲି ମହାସଙ୍ଘର ସଭାନେତ୍ରୀ ସସ୍ମିତା ଦାଶ ପ୍ରକାଶ କରିଛନ୍ତି । ତେବେ ସରକାର ମହିଳାମାନଙ୍କୁ ରୋଜଗାରକ୍ଷମ କରିବାକୁ ବିଭିନ୍ନ ଯୋଜନାରେ ସାମିଲ କରୁଥିବା ବେଳେ ଉକ୍ତ ମହାସଙ୍ଘର ଏହି ପ୍ରଚେଷ୍ଟା ଅନ୍ୟମାନଙ୍କ ପାଇଁ ଉଦାହରଣ ହେବ ବୋଲି ସାଧାରଣରେ ମତ ପ୍ରକାଶ ପାଇଛି।