ସୌମିତ୍ରି ମେହେର27/08/2023 at 1:18 PM
ବୀରମହାରାଜପୁର : ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଅନ୍ତର୍ଗତ ସୁବଳୟା ଠାରେ ଶନିବାର ପବିତ୍ର ଶ୍ରାବଣ ମାସର ଶୁକ୍ଳ ପକ୍ଷ ଦଶମୀ ତିଥି ଠାରୁ ପ୍ରସିଦ୍ଧ ଝୁଲଣ ଯାତ୍ରା ଆରମ୍ଭ ହୋଇଛି । ଏଠାକାର ଏହି ଯାତ୍ରା ୧୧୫ ବର୍ଷ ପୁରୁଣା । ଅପରାହ୍ନରେ ବିଭିନ୍ନ ସ୍ଥାନରେ ଏଥିପାଇଁ କଳସ ଶୋଭାଯାତ୍ରା ଅନୁଷ୍ଠିତ ହୋଇଥିଲା । ଚଳିତ ବର୍ଷ ଆସନ୍ତା ୧ ତାରିଖରେ ନଗର ପରିକ୍ରମା ସହ ଯାତ୍ରା ଉଦଯାପିତ ହେବ ବୋଲି ଜଣାଯାଇଛି । ଯାତ୍ରା ଅବସରରେ ପ୍ରଭୁ ରାଧାକୃଷ୍ଣ ସୁବଳୟାର ବିଭିନ୍ନ ସ୍ଥାନରେ ସୁସଜ୍ଜିତ ଝୁଲଣ ଗାଦିରେ ଅଧିଷ୍ଠିତ ହୋଇଥାନ୍ତି । ସେଠାରେ ପୂଜାର୍ଚ୍ଚନା ସହ ସଙ୍କୀର୍ତ୍ତନ ଆଦି ପରିବେଷିତ ହୋଇଥାଏ । ଶ୍ରାବଣ ପୂର୍ଣ୍ଣିମା ଦିନ ଆଡ଼ମ୍ବର ସହକାରେ ବିଭିନ୍ନ ମେଢରେ ରାଧାକୃଷ୍ଣ ବିଜେ ପୂର୍ବକ ନଗର ପରିକ୍ରମାରେ ବାହାରି ଥାନ୍ତି । ଚଳିତ ବର୍ଷ ନଗର ପରିକ୍ରମା ସମୟରେ ପଶ୍ଚିମ ଓଡ଼ିଶାର ବିଭିନ୍ନ ସ୍ଥାନରୁ ଲୋକପ୍ରିୟ ହୋଇଥିବା ଉଭୟ ପୁରୁଷ ଓ ମହିଳା ସଙ୍କୀର୍ତ୍ତନ ମଣ୍ଡଳୀ ଯୋଗ ଦେବାର କାର୍ଯ୍ୟକ୍ରମ ରହିଛି । ସେହିଭଳି ସମ୍ବଲପୁରୀ ମେଲୋଡି ଓ ରେକର୍ଡ ନୃତ୍ୟ ଆଦି ଯାତ୍ରାର ଅନ୍ୟତମ ଆକର୍ଷଣ ଥିବା ଜଣାପଡ଼ିଛି । ସୁବଳୟାର ବଳଦେବ କ୍ଲବ, ସାନଦାଣ୍ଡର ଶ୍ରୀରାମଚନ୍ଦ୍ର କ୍ଳବ୍, ବଡ଼ଦାଣ୍ଡର ବୀର ବଜରଙ୍ଗ କ୍ଲବ୍, ଧୀବରପଡ଼ାର ବାବା ଅବଧୂତ କ୍ଳବ୍, ଗଡଭିତରର ଭଗବତ କ୍ଳବ୍ ଆଦି ବିଭିନ୍ନ କ୍ଲବ ଏଥିରେ ଅଂଶଗ୍ରହଣ କରିଥାନ୍ତି । ଯାତ୍ରାରେ ଶାନ୍ତି ଶୃଙ୍ଖଳା ରକ୍ଷା ଓ ସୁପରିଚାଳନା ସକାଶେ ଏହା ମଧ୍ୟରେ ସୁବଳୟା ଥାନା ପରିସରରେ ଏକ ପ୍ରସ୍ତୁତି ବୈଠକ ମଧ୍ୟ ଅନୁଷ୍ଠିତ ହୋଇଥିବାର ଜଣାଯାଇଛି ।