ସୌମିତ୍ରି ମେହେର2/09/2023 at 8:42 PM
ବୀରମହାରାଜପୁର : ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବନାଂଚଳ ବଡାଲି ସଂରକ୍ଷିତ ଜଙ୍ଗଲରୁ କାଠ ବଲି ଚୋରାଚାଲାଣ ବେଳେ ଦୁଇ ଜଣଙ୍କୁ ଗିରଫ କରିବାରେ ବନବିଭାଗ ସଫଳ ହୋଇଛି । ଏଥିସହ ସେମାନଙ୍କ ପାଖରୁ ୧୦୦ ଗୋଟି ବଲି ଜବତ କରାଯାଇଥିବା ବେଳେ ଶନିବାର ସନ୍ଧ୍ୟାରେ କୋର୍ଟଚାଲାଣ କରାଯାଇଛି । ସୂଚନା ଅନୁଯାୟୀ ଶୁକ୍ରବାର ରାତି ପ୍ରାୟ ୯ ଟା ସମୟରେ ପଂଚମହଲା ପଂଚାୟତ ଜଗନ୍ନାଥପାଲି ଗ୍ରାମର ମୀନକେତନ ମଲ୍ଲିକ (୪୪) ଏବଂ ରାମରତନ ମଲ୍ଲିକ (୪୧) ବଡାଲି ସଂରକ୍ଷିତ କଙ୍ଗଲରୁ ବଲି କାଟି ଚୋରାଚାଲାଣ କରୁଥିଲେ । ଉକ୍ତ ସମୟରେ ବନବିଭାଗ କର୍ମଚାରୀ ପେଟ୍ରୋଲିଂ କରୁଥିବା ବେଳେ ବଲି ଚୋରାଚାଲାଣ ହେଉଥିବା ଜାଣିବାକୁ ପାଇଥିଲେ । ପରେ ଘଟଣାସ୍ଥଳରେ ଚଢଉ କରି ମୀନକେତନ ଏବଂ ରାମରତନଙ୍କୁ ଗିରଫ କରିଥିଲେ । ଶାଳ ସମେତ ବିଭିନ୍ନ ମୂଲ୍ୟବାନ ଗଛର ୧୦୦ ଟି ବଲି ସେମାନଙ୍କ ପାଖରୁ ଜବତ ହୋଇଛି । ଏନେଇ ଉଲୁଣ୍ଡା ବନାଂଚଳରେ ଏକ ମାମଲା ରୁଜୁ ହୋଇଥିବା ବେଳେ ଅଭିଯୁକ୍ତଙ୍କୁ ଶନିବାର କୋର୍ଟଚାଲାଣ କରାଯାଇଥିଲା । ଜାମିନ ନାମାଞ୍ଜୁର ହେବାରୁ ସେମାନଙ୍କୁ ଜେଲ ହାଜତକୁ ପଠାଇ ଦିଆଯାଇଛି ।