‘ଆମ ଓଡ଼ିଶା ନବୀନ ଓଡ଼ିଶା’କୁ ଅପରାଜିତାଙ୍କ କଟାକ୍ଷ, କହିଲେ- ନୂଆ ବୋତଲରେ ପୁରୁଣା ମଦ ଭଳି କାର୍ଯ୍ୟକ୍ରମ
ଭୁବନେଶ୍ଵର: ‘ଆମ ଓଡ଼ିଶା ନବୀନ ଓଡ଼ିଶା’କୁ ସାଂସଦ ଅପରାଜିତା ଷଡ଼ଙ୍ଗୀ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି ୨୩ ବର୍ଷ ପରେ ବିଜେଡି ନୂଆ ବୋତଲରେ ପୁରୁଣା ମଦ ଭଳି କାର୍ୟ୍ୟକ୍ରମ କରୁଛି। ଏଭଳି ଦଳୀୟ ଭିତ୍ତିରେ କାର୍ୟ୍ୟକ୍ରମ କରିବା ହାସ୍ୟାସ୍ପଦ ଭଳି ମନେ ହେଉଛି। ପ୍ରଥମେ ମୁଖିଆ ନିଜ ଦଳର ଉତ୍ତରୀୟ ଓ ବ୍ୟାଚକୁ ନେଇ ଗର୍ଭ ଅନୁଭବ କରନ୍ତୁ। ଯେବେ ଗର୍ବ ଅନୁଭବ କରିବେ ନାହିଁ, ଯେତେ କାର୍ଯ୍ୟକ୍ରମ କଲେ ବି ଲାଭ ନାହିଁ।
ଉଲ୍ଲେଖନୀୟ ବିଜେଡିର ଏକ ଦଳୀୟ କାର୍ଯ୍ୟକ୍ରମରେ ଦଳର ସଭାପତି ନବୀନ ପଟ୍ଟନାୟକଙ୍କୁ ଶ୍ରୀମୟୀ ମିଶ୍ର ବ୍ୟାଚ୍ ଲଗାଇ ଦେଇଥିବା ବେଳେ ସୁଲତା ଦେଓ ଉତ୍ତରୀୟ ଲଗାଇଥିଲେ। ଯାହାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପସନ୍ଦ କରି ନ ଥିଲେ। ତୁରନ୍ତ ଉତ୍ତରୀୟ ଓ ବ୍ୟାଚ୍ କାଢି ନେବାକୁ ତାଙ୍କର ବ୍ୟକ୍ତିଗତ ସୁରକ୍ଷାକର୍ମୀଙ୍କୁ କହିଥିଲେ। ଏହି ଘଟଣାର ଦୃଶ୍ୟ ସାମାଜିକ ଗଣମାଧ୍ୟମରେ ଖୁବ୍ ଭାଇରାଲ୍ ହୋଇଛି। ଆଉ ଯାହାକୁ ନେଇ ଆଜି ଭୁବନେଶ୍ଵର ସାଂସଦ ଅପରାଜିତ ଷଡ଼ଙ୍ଗୀ ବିଜେଡିକୁ କଟାକ୍ଷ କରିଛନ୍ତି।
ଏପଟେ ଆମ ଓଡ଼ିଶା ନବୀନ ଓଡ଼ିଶା ବିଜ୍ଞାପନରେ ଶଙ୍ଖ ଚିହ୍ନ ସ୍ଥାନିତ ପ୍ରସଙ୍ଗରେ ରାଜନୀତି ସରଗରମ ହୋଇଛି। ରାଜ୍ୟ ସରକାରଙ୍କ ଏହି କାର୍ଯ୍ୟକୁ ବିରୋଧୀ ଦଳ ନିନ୍ଦା କରିଛନ୍ତି। ମୁଖ୍ୟ ବିରୋଧୀ ଦଳ ବିଜେପି ଏନେଇ କୋର୍ଟ ଯିବାକୁ ଚେତାବନୀ ଦେଇଛି। ମଙ୍ଗଳବାର ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ ଏହା କହିଛନ୍ତି।
ମୋହନ ମାଝୀ କହିଛନ୍ତି, ଭୋଟ୍ ବ୍ୟାଙ୍କ ବୃଦ୍ଧି ପାଇଁ ରାଜ୍ୟ ସରକାର ଏମିତି ହୀନ କାମ କରୁଛି। ଏହାକୁ କୋର୍ଟରେ ଚ୍ୟାଲେଞ୍ଜ କରାଯିବ। ଶଙ୍ଖ ଦଳୀୟ ଚିହ୍ନ, ସରକାରୀ କାର୍ଯ୍ୟକ୍ରମରେ କିଭଳି ବ୍ୟବହାର ହେବ ବୋଲି ସେ ପ୍ରଶ୍ନ କରିଛନ୍ତି। ଶାସକ ଦଳକୁ ହାରିବାର ଭୟ ରହିଛି। ତେଣୁ ଶଙ୍ଖ ଚିହ୍ନ ବ୍ୟବହାର କରାଯାଉଛି। ଏହାକୁ ବରଦାସ୍ତ କରାଯିବନି। ଏହି ଯୋଜନା ପାଇଁ ଜନ ପ୍ରତିନିଧିଙ୍କ ଠାରୁ ପ୍ରସ୍ତାବ ନିଆଯାଉନି ବୋଲି ମୋହନ ମାଝୀ
ବିଜେପିର ଅଭିଯୋଗ ଉପରେ ମନ୍ତ୍ରୀ ଅତନୁ ସବ୍ୟସାଚୀ ନାୟକ ପ୍ରତିକ୍ରିୟା ଦେଇ କହିଛନ୍ତି, ଶଙ୍ଖ ପବିତ୍ରତାର ପ୍ରତୀକ। ଗ୍ରାମାଞ୍ଚଳର ବିକାଶ ପାଇଁ ସରକାର ଧ୍ୟାନ ଦେଇଛନ୍ତି। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଛି। ଲୋକଙ୍କ ପାଖରୁ ଅନୁରୋଧ ଆସିବା ପରେ ଆର୍ଥିକ ବ୍ୟବସ୍ଥା କରାଯାଉଛି। ନିର୍ଦ୍ଧିଷ୍ଟ ସମୟ ସୀମା ମଧ୍ୟରେ କାମ ସରିବ। ବିଜେପି ଆପତ୍ତି କରିବାରେ କିଛି ସମସ୍ୟା ନାହିଁ ବୋଲି ଅତନୁ କହିଛନ୍ତି।
