ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ30/01/2024 at 11:11 AM
ରାଂଚି: ଜମି ଦୁର୍ନୀତି ମାମଲାରେ ଝାଡଖଣ୍ଡର ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ମୁସ୍କିଲ ବଢିବାରେ ଲାଗିଛି । ଗତକାଲି ଇଡିର ଟିମ୍ ନୂଆଦିଲ୍ଲୀ ସ୍ଥିତ ତାଙ୍କ ବାସଭବନରେ ଡେରା ପକାଇଥିଲେ ହେଁ ସୋରେନଙ୍କ କୌଣସି ସୂଚନା ମିଳି ପାରି ନ ଥିଲା । ମୁଖ୍ୟମନ୍ତ୍ରୀ ନିଖୋଜ ଥିବା ବିଜେପିର ଦାବି ପରେ ଝାଡଖଣ୍ଡର ରାଜନୀତି ସରଗରମ ହୋଇ ଉଠିଛି । ଝାଡଖଣ୍ଡ ମୁକ୍ତି ମୋର୍ଚ୍ଚାର ନେତୃତ୍ୱାଧୀନ ସରକାରଙ୍କ ସମସ୍ତ ବିଧାୟକଙ୍କୁ ରାଂଚିରେ ରହିବା ପାଇଁ ଆଦେଶ ଦିଆଯାଇଛି । ଜେଏମଏମ, କଂଗ୍ରେସ ଓ ଆରଜେଡିର ସମସ୍ତ ବିଧାୟକଙ୍କୁ ରାଜଧାନୀ ରାଂଚି ନ ଛାଡିବାକୁ କୁହାଯାଇଛି । ମଙ୍ଗଳବାର ଗୁରୁତ୍ୱପୂର୍ଣ୍ଣ ବୈଠକରେ ଯୋଗ ଦେବାକୁ କୁହାଯାଇଛି ।
ଏହି ବୈଠକ ଏମିତି ସମୟରେ ଡକାଯାଇଛି, ଯେତେବେଳେ ଦିଲ୍ଳୀରେ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ତିନୋଟି ଠିକଣାରେ ଇଡି ଟିମ୍ ପହଁଚିଥିଲା । ହେଲେ କୌଣସି ସ୍ଥାନରେ ମୁଖ୍ୟମନ୍ତ୍ରୀ ହେମନ୍ତ ସୋରେନ ମିଳି ନ ଥିଲେ । ଏହା ପରେ ବିଜେପି ଦାବି କରିଥିଲା ଯେ, ମୁଖ୍ୟମନ୍ତ୍ରୀ ପଳାତକ ହୋଇଗଲେ । ତେବେ ମଙ୍ଗଳବାର ମୁଖ୍ୟମନ୍ତ୍ରୀଙ୍କ ବାସଭବନରେ ବିଧାୟକଙ୍କ ବୈଠକ ଡକାଯାଇଛି । ରାଜ୍ୟର ସାଂପ୍ରତିକ ସ୍ଥିତି ଓ ମୁଖ୍ୟମନ୍ତ୍ରୀଙ୍କୁ ଇଡିର ପ୍ରସ୍ତାବିତ ଆଲୋଚନା ବିଷୟରେ ଆଲୋଚନା ପାଇଁ ବିଧାୟକମାନଙ୍କୁ ଡକାଯାଇଛି ।
ଜେଏମଏମର ସାଧାରଣ ସଂପାଦକ ତଥା ମୁଖପାତ୍ର ବିନୋଦ କୁମାର ସିଂ କହିଛନ୍ତି, ସମସ୍ତ ବିଧାୟକଙ୍କୁ ରାଂଚିରେ ରହିବାକୁ କୁହାଯାଇଛି । ମଙ୍ଗଳବାର ଆଗାମୀ ଯୋଜନା ବିଷୟରେ ଆଲୋଚନା କରାଯିବ । କ୍ଷମତାସୀନ ଦଳର ଅନେକ ନେତା ଓ ବିଧାୟକ ସୋମବାର ବିଳମ୍ବିତ ରାତି ଯାଏ ମୁଖ୍ୟମନ୍ତ୍ରୀ ବାସଭବନରେ ଉପସ୍ଥିତ ଥିଲେ ।
ଜେଏମଏମକୁ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଗିରଫଦାରୀର ଭୟ ମଧ୍ୟ ଘାରିବାରେ ଲାଗିଛି । କୁହାଯାଉଛି ପାର୍ଟି ଏଥିପାଇଁ ଯୋଜନା ପ୍ରସ୍ତୁତ କରିଛି । ଗତ ଦିନରେ ଚର୍ଚ୍ଚା ଜୋର ଧରିଥିଲା ଯେ, ଯଦି ହେମନ୍ତ ସୋରେନଙ୍କୁ ଗିରଫ କରାଯାଏ ତେବେ ତାଙ୍କ ପତ୍ନୀ କଳ୍ପନା ସୋରେନଙ୍କୁ ମୁଖ୍ୟମନ୍ତ୍ରୀ ପଦ ଦେଇ ପାରନ୍ତି ।