ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ30/01/2024 at 12:09 PM
ନୂଆଦିଲ୍ଲୀ: ପ୍ରବର୍ତନ ନିର୍ଦ୍ଦେଶାଳୟ(ଇଡି) ଝାଡଖଣ୍ଡର ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଦିଲ୍ଲୀ ସ୍ଥିତ ବାସଭବନ ସମେତ ତିନୋଟି ସ୍ଥାନରେ ଚଢାଉ କରାଯାଇଛି । ଜମି ଦୁର୍ନୀତି ମାମଲାରେ ଅଡୁଆରେ ପଡିଥିବା ସୋରେନଙ୍କ ବାସଭବନରେ ଚଢାଉ ପରେ ଯାଂଚ ଏଜେନ୍ସି ନଗଦ, କାର ଓ କାଗଜପତ୍ର ମିଳିଥିବା ଦାବି କରିଛନ୍ତି । କିନ୍ତୁ ଯାଂଚ ଏଜେନ୍ସି ମୁଖ୍ୟମନ୍ତ୍ରୀଙ୍କୁ ଏ ପର୍ଯ୍ୟନ୍ତ ଭେଟି ପାରି ନାହାନ୍ତି । ଇଡି ସୂତ୍ର ଅନୁଯାୟୀ, ସିଏମଙ୍କ ବାସଭବନରୁ ବିଏମଡବ୍ଲ୍ୟୁ କାର ବ୍ୟତୀତ ୩୬ ଲକ୍ଷ ନଗଦ ଜବତ କରାଯାଇଛି ।
ଗତକାଲି ଇଡିର ଟିମ୍ ନୂଆଦିଲ୍ଲୀ ସ୍ଥିତ ତାଙ୍କ ବାସଭବନରେ ଡେରା ପକାଇଥିଲେ ହେଁ ସୋରେନଙ୍କ କୌଣସି ସୂଚନା ମିଳି ପାରି ନ ଥିଲା । ତେବେ ଆଜି ଇଡି ପକ୍ଷରୁ କୁହାଯାଇଛି ଯେ, ଦିଲ୍ଲୀର ଶାନ୍ତି ନିକେତନ ସ୍ଥିତ ସୋରେନଙ୍କ ବାସଭବନରେ ଚଢାଉ ସମୟରେ ୩୬ ଲକ୍ଷ ନଗଦ ମିଳିଛି । ଏହା ସହିତ ହରିୟାଣାର ନମ୍ବର ପ୍ଲେଟ୍ ଥିବା ବିଏମଡବ୍ଲ୍ୟୁ କାର ମିଳିଛି । ଚଢାଉରେ କିଛି ଗୁରୁତ୍ୱପୂର୍ଣ୍ଣ କାଗଜପତ୍ର ମିଳିଥିବା ଯାଂଚ ଏଜେନ୍ସି ପକ୍ଷରୁ କୁହାଯାଇଛି ।
ମୁଖ୍ୟମନ୍ତ୍ରୀ ନିଖୋଜ ଥିବା ବିଜେପିର ଦାବି ପରେ ଝାଡଖଣ୍ଡର ରାଜନୀତି ସରଗରମ ହୋଇ ଉଠିଛି । ଝାଡଖଣ୍ଡ ମୁକ୍ତି ମୋର୍ଚ୍ଚାର ନେତୃତ୍ୱାଧୀନ ସରକାରଙ୍କ ସମସ୍ତ ବିଧାୟକଙ୍କୁ ରାଂଚିରେ ରହିବା ପାଇଁ ଆଦେଶ ଦିଆଯାଇଛି । ଜେଏମଏମ, କଂଗ୍ରେସ ଓ ଆରଜେଡିର ସମସ୍ତ ବିଧାୟକଙ୍କୁ ରାଜଧାନୀ ରାଂଚି ନ ଛାଡିବାକୁ କୁହାଯାଇଛି । ମଙ୍ଗଳବାର ଗୁରୁତ୍ୱପୂର୍ଣ୍ଣ ବୈଠକରେ ଯୋଗ ଦେବାକୁ କୁହାଯାଇଛି ।