ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ30/01/2024 at 1:34 PM
ଭୁବନେଶ୍ୱର: ପୂର୍ବତନ ସ୍ୱାସ୍ଥ୍ୟ ମନ୍ତ୍ରୀ ନବ ଦାସଙ୍କ ହତ୍ୟାକାଣ୍ଡକୁ ଏକ ବର୍ଷ ପୂରିଛି । ବ୍ରଜରାଜ ନଗର ଗାନ୍ଧୀ ଛକରେ ଘଟିଥିବା ଏହି ଗୁଳିକାଣ୍ଡକୁ ୧୨ ମାସ ବିତି ଯାଇଛି । ହେଲେ ଏବେ ମଧ୍ୟ ଅନେକ ଅସମାହିତ ପ୍ରଶ୍ନ ରହିଛି, ଯାହାର ଉତର କାହା ପାଖରେ ନାହିଁ । କାହିଁକି ନବଙ୍କୁ ଗୁଳି କରାଗଲା ? ଏହି ହତ୍ୟାକାଣ୍ଡ ପଛର ଉଦ୍ଦେଶ୍ୟ କଣ ? ଜବତ ଗୁଳି କୁଆଡେ ଗଲା ? ତଦନ୍ତ ପ୍ରକ୍ରିରୟା କେତେ ଦୂର ଗଲା ? କଣ ଗୋପାଳ ଏକ ମାତ୍ର ଦୋଷୀ ? ଏମିତି ଅନେକ ପ୍ରଶ୍ନ ଜନସାଧାରଣ ଲୋକଙ୍କ ମନରେ ଏବେ ବି ଉଙ୍କି ମାରୁଛି । ତେବେ ସବୁଠୁ ବଡ କଥା ନବ ଦାସଙ୍କ ପରିବାର ଏହି ମାମଲାରେ ପୁରା ନିବର ରହିଛନ୍ତି । ନବଙ୍କ ଝିଅ ତଥା ଝାରସୁଗୁଡାର ବିଧାୟିକା ଦୀପାଳି ଦାସ ମଧ୍ୟ ଚୁପ୍ ।
ସରକାର କହି ଆସିଛନ୍ତି ଆଇନ ତା ବାଟରେ କାମ କରିବ । କିନ୍ତୁ ୧୨ ମାସ ବିତିଗଲା ନବଙ୍କୁ କାହିଁକି ଗୁଳି କରାଗଲା ତାର କାରଣ ଏ ପର୍ଯ୍ୟନ୍ତ ସ୍ପଷ୍ଟ କରାଗଲା ନାହିଁ । କେବଳ ଗୋପାଳ ଦାସଙ୍କୁ ହାଜତରେ ଭର୍ତି କରାଯାଇ ସେ ହିଁ ଏକମାତ୍ର ଦୋଷୀ ସଜାଇ ଦିଆଗଲା । ଗୋପାଳ ନବଙ୍କୁ କାହିଁକି ଗୁଳି କଲା, ଏହା ପଛର କାରଣ କଣ ତାହା ବି ସ୍ପଷ୍ଟ କରାଯାଉ ନାହିଁ । ଘଟଣାରେ ଚାର୍ଜସିଟ୍ ମଧ୍ୟ ଦାଖଲ ହୋଇ ସାରିଛି । ସେଥିରେ ୨୦୧୦ରୁ ନେଇ ୨୦୨୨ ଯାଏ ଗୋପାଳଙ୍କ ସଂପର୍କିତ ଘଟଣାବଳୀ ଦର୍ଶାଯାଇଛି । କୁଆଡେ ଗୋପାଳ ନବ ଦାସଙ୍କ ଗାଡି ଅଟକାଇବା ନେଇ ଉଭୟଙ୍କ ମଧ୍ୟରେ ବିବାଦ ଆରମ୍ଭ ହୋଇଥିଲା । ଏସବୁ କେତେ ଦୂର ପ୍ରମାଣିତ ହେବ ତାହା ମଧ୍ୟ ଏକ ବଡ ପ୍ରଶ୍ନ । ସବୁଠୁ ବଡ କଥା ନବଙ୍କ ପରିବାର ମଧ୍ୟ ଏହି ପୁରା ଘଟଣାରେ ନିରବ । ବିଧାୟିକା ଦୀପାଳି ଦାସ ମଧ୍ୟ ପୁରା ଚୁପ୍ । ସେ କେବଳ କହୁଛନ୍ତି ଆଇନ ତା ବାଟରେ ଯିବ ।
ସୂଚନାଯୋଗ୍ୟ, ଗତ ବର୍ଷ ଜାନୁଆରୀ ୩୦ ତାରିଖରେ ଏକ ଦଳୀୟ କାର୍ଯ୍ୟକ୍ରମରେ ଯୋଗ ଦେବାକୁ ଯିବା ସମୟରେ ବ୍ରଜରାଜ ନଗର ଗାନ୍ଧୀ ଛକରେ ଗାଡିରୁ ଓହ୍ଲାଇବା ସମୟରେ ନବଦାସଙ୍କ ଉପରେ ଗୁଳିମାଡ ହୋଇଥିଲା । ଆଉ ଦିବଙ୍ଗତ ସ୍ୱାସ୍ଥ୍ୟ ମନ୍ତ୍ରୀ ସେଠାରେ ଟଳି ପଡିଥିଲେ । ତାଙ୍କୁ ତୁରନ୍ତ ଝାରସୁଗୁଡା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଥିଲା । ତେବେ ଉନ୍ନତ ଚିକିତ୍ସା ପାଇଁ ଏୟାର ଆମ୍ବୁଲାନ୍ସ ଜରିଆରେ ଭୁବନେଶ୍ୱର ଆପୋଲ ହସ୍ପିଟାଲରେ ଭର୍ତି କରାଯାଇଥିଲା । କିନ୍ତୁ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା । ଘଟଣାରେ ପୋଲିସ ଏଏସଆଇ ଗୋପାଳ ଦାସଙ୍କୁ ଗିରଫ କରିଥିଲା । ମାମଲାର କ୍ରାଇମବ୍ରାଂଚ ତଦନ୍ତ କରିଥିଲା । ଆଉ ଏବେ ଚୌଦ୍ୱାର ଜେଲରେ ଗୋପାଳ ବନ୍ଦୀ ଅଛନ୍ତି ।