ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ2/02/2024 at 1:30 PM
ରାଂଚି: ଝାଡଖଣ୍ଡରେ ହେମନ୍ତ ସୋରେନଙ୍କ ଇସ୍ତଫା ପରେ ରାଜ୍ୟରେ ଉତ୍ପନ ରାଜନୈତିକ ସଙ୍କଟର ଅନ୍ତ ଘଟିଛି । ଚମ୍ପାଇ ସୋରେନ ରାଜ୍ୟର ୧୨ତମ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି । ତାଙ୍କ ସହ ଆଲମଗୀର ଓ ସତ୍ୟାନନ୍ଦ ଭୋକ୍ତା ମଧ୍ୟ ଶପଥ ନେଇଛନ୍ତି । ଏବେ ଚମ୍ପାଇଙ୍କୁ ୧୦ ଦିନ ଭିତରେ ବିଧାନସଭାରେ ବହୁମତ ସାବ୍ୟସ୍ତ କରିବାକୁ ପଡିବ । ଅନ୍ୟପଟେ ମହାମେଂଟର ୩୫ ବିଧାୟକଙ୍କୁ ହାଇଦ୍ରାବାଦ ପଠାଯିବ । ବିଶେଷଜ୍ଞଙ୍କ ମତରେ ବହୁମତ ପାଇଁ ୧୦ ଦିନର ସମୟ ଦିଆଯାଇଛି । ଏମିତିରେ ବିଧାୟକଙ୍କୁ ଭଙ୍ଗା ଯାଇ ମଧ୍ୟ ପାରିବ ।
ଚମ୍ପାଇ ସୋରେନ ମୁଖ୍ୟମନ୍ତ୍ରୀ ପଦରେ ଶପଥ ନେବା ପୂର୍ବରୁ ଶିବୁ ସୋରେନଙ୍କ ଆଶୀର୍ବାଦ ନେଇଥିଲେ । ନିଜ ଗୁରୁଙ୍କ ଆଶୀର୍ବାଦ ନେବା ପରେ ଚମ୍ପାଇ କହିଛନ୍ତି, ମୁଁ ଶପଥ ନେବା ପୂର୍ବରୁ ଗୁରୁଙ୍କ ଆଶୀର୍ବାଦ ନେବାକୁ ଆସିଥିଲି । ମୁଁ ଝାଡଖଣ୍ଡ ଆନ୍ଦୋଳନ ସମୟରେ ତାଙ୍କ ସହ ଜଡିତ ଥିଲି । ସେ ଆମର ଆଦର୍ଶ, ଏଥିପାଇଁ ତାଙ୍କ ନିକଟକୁ ଆସିଥିଲି । ଆମେ ଖୁବ୍ ଶୀଘ୍ର ବହୁମତ ସାବ୍ୟସ୍ତ କରିବୁ ବୋଲି ଚମ୍ପାଇ କହିଛନ୍ତି ।
ସୂଚନାଯୋଗ୍ୟ, ଗୁରୁବାର ବିଳମ୍ବିତ ରାତିରେ ରାଜ୍ୟପାଳ ସିପି ରାଧାକୃଷ୍ଣନ ମହାମେଂଟର ବିଧାୟକ ଦଳ ନେତା ଚମ୍ପାଇ ସୋରେନଙ୍କୁ ସରକାର ଗଠନ ପାଇଁ ଆମନ୍ତ୍ରଣ କରିଥିଲେ । ଏହା ପୂର୍ବରୁ ଚମ୍ପାଇ ରାଜ୍ୟପାଳଙ୍କୁ ଭେଟିଥିଲେ । ତା ପୂର୍ବରୁ ଗୁରୁବାର ଝାଡଖଣ୍ଡ ରାଜନୀତିରେ ମହାଡ୍ରାମା ଦେଖିବାକୁ ମିଳିଥିଲା । କାରଣ ରାଜ୍ୟପାଳଙ୍କୁ ଭେଟିଥିଲେ ମଧ୍ୟ ରାଜ୍ୟପାଳ ସରକାର ଗଠନ କରିବାକୁ ଆମନ୍ତ୍ରଣ କରୁ ନ ଥିଲେ ।
ଅନ୍ୟପଟେ ହେମନ୍ତ ସୋରେନଙ୍କ ଭାଉଜ ତଥା ଜେଏମଏମର ବିଧାୟିକା ସୀତା ସୋରେନଙ୍କ ସହ ୪ ବିଧାୟକ ବିଦ୍ରୋହ ଆଭିମୁଖ୍ୟ ଆପଣେଇଥିଲେ । ଏହି ଚାରି ବିଧାୟକ ସମର୍ଥନ ପତ୍ରରେ ଦସ୍ତଖତ କରି ନ ଥିଲେ । ଫଳରେ ମହାମେଂଟର ବିଧାୟକଙ୍କ ମଧ୍ୟରେ ଫାଟ ସୃଷ୍ଟି ହେବାର ଆଶଙ୍କା ରହିଥିଲା । ସମସ୍ତଙ୍କୁ ହାଇଦ୍ରାବାଦ ପଠାଯିବା ପାଇଁ ବନ୍ଦୋବସ୍ତ ହୋଇଥିଲା । କିନ୍ତୁ ଘନକୁହୁଡି ଯୋଗୁଁ ବିମାନ ବାତିଲ ହେବାରୁ ବିମାନ ବନ୍ଦରରୁ ବିଧାୟକ ସର୍କିଟ୍ ହାଉସ ଫେରି ଆସିଥିଲେ ।