ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ25/03/2024 at 2:33 PM
ଭୁବନେଶ୍ୱର: ୨୦୨୪ ଲୋକସଭା ନିର୍ବାଚନ ପାଇଁ ବିଜେପି ଗତକାଲି ପଂଚମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିଛି । ଏଥିରେ ଓଡିଶା ପାଇଁ ୨୧ ଲୋକସଭା ଆସନରୁ ୧୮ଟିରେ ପ୍ରାର୍ଥୀ ଘୋଷଣା କରିଛି । ଏଥର ଛଅ ଜଣ ନୂଆଁ ମୁହଁ ଥିବା ବେଳେ ୧୨ଟି ଆସନରେ ଦଳ ପ୍ରାର୍ଥୀଙ୍କୁ ରିପିଟ୍ କରିଛି । ୪ ଜଣ ସାଂସଦ ଟିକେଟ୍ କଟିଥିବା ବେଳେ ୪ ଜଣ ସାଂସଦଙ୍କୁ ଟିକେଟ୍ ମିଳିଛି । ଆଉ ଗତଥର ପରାଜିତ ୮ ପ୍ରାର୍ଥୀଙ୍କ ଉପରେ ଦଳ ପୁନର୍ବାର ଭରସା ପ୍ରକଟ କରିଛି ।
ଟିକେଟ୍ କଟିଥିବା ୪ ସାଂସଦ ହେଉଛନ୍ତି ସମ୍ବଲପୁରରୁ ନୀତେଶ ଗଙ୍ଗଦେବ, ମୟୂରଭଞ୍ଜରୁ ବିଶ୍ୱେଶ୍ୱର ଟୁଡୁ, ବରଗଡରୁ ସୁରେଶ ପୂଜାରୀ ଓ କଳାହାଣ୍ଡିରୁ ବସନ୍ତା ପଣ୍ଡାଙ୍କ ନାଁ ସାମିଲ । ଛଅ ଜଣ ନୂଆ ଚେହେରା ହେଉଛନ୍ତି ସମ୍ବଲପୁରରୁ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବରଗଡରୁ ପ୍ରଦୀପ ପୁରୋହିତ , ମୟୂରଭଞ୍ଜରୁ ନବ ଚରଣ ମାଝୀ, କଳାହାଣ୍ଡିରୁ ମାଳବିକା କେଶରୀ ଦେଓ, କୋରାପୁଟରୁ କାଲେରାମ ମାଝୀ ଓ ବ୍ରହ୍ମପୁରରୁ ପ୍ରଦୀପ ପାଣିଗ୍ରାହୀ ।
ସେହିପରି ବିଜେପି ତାଲିକା ଅନୁସାରେ କେନ୍ଦୁଝରର ଲୋକସଭା ନିର୍ବାଚନ ମଣ୍ଡଳୀରେ ଅନନ୍ତ ନାଏକ, ଭଦ୍ରକରେ ଅଭିମନ୍ୟୁ ସେଠୀ, ଢେଙ୍କାନାଳରୁ ରୁଦ୍ର ନାରାୟଣ ପାଣି, ନରରଙ୍ଗପୁରରୁ ବଳଭଦ୍ର ମାଝୀ, କେନ୍ଦ୍ରାପଡାରେ ବୈଜୟନ୍ତ ପଣ୍ଡା, ଜଗତସିଂପୁରରେ ବିଭୁ ପ୍ରସାଦ ତରାଇ, ପୁରୀରେ ସମ୍ବି ପାତ୍ର ଓ ଆସ୍କାରେ ଅନିତା ଶୁଭଦର୍ଶିନୀଙ୍କୁ ଦଳ ଟିକେଟ୍ ଦେଇଛି । ଗତଥର ଏହିମାନେ ପ୍ରାର୍ଥୀ ହୋଇ ପରାଜିତ ହୋଇଥିଲେ ହେଁ ଏଥର ଏହି ୮ ଜଣଙ୍କୁ ପୁଣି ବିଜେପି କେନ୍ଦ୍ରୀୟ ନେତୃବୃନ୍ଦ ଭରସା କରିଛନ୍ତି ।
କୁହାଯାଉଛି ଟିକେଟ୍ କଟିଥିବା ସାଂସଦ ସୁରେଶ ପୂଜାରୀଙ୍କୁ ବିଧାନସଭା ନିର୍ବାଚନରୁ ପ୍ରାର୍ଥୀ କରିପାରେ ଦଳ । କନ୍ଧମାଳ ଓ ଯାଜପୁରରୁ ସିଟରୁ କାହାକୁ ଦଳ ପ୍ରାର୍ଥୀ କରିବ ତାହା ସ୍ପଷ୍ଟ ହୋଇ ନାହିଁ । ସେପଟେ ଟିକେଟ୍ ନ ମିଳିବାରୁ ବାଲେଶ୍ୱରରୁ ସ୍ୱାଧୀନ ଭାବେ ନିର୍ବାଚନ ଲଢିବାକୁ ଘୋଷଣା କରିଛନ୍ତି ଐରଖାରବେଳ ସ୍ୱାଇଁ । ତାଙ୍କୁ ଗତ ଥର କନ୍ଧମାଳରୁ ଟିକେଟ୍ ଦେଇଥିଲା ଦଳ ।