ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ24/04/2024 at 1:23 PM
କଟକ: ଓଆରଏଚଡିସି ଦୁର୍ନୀତି ମାମଲାରେ ଜାମିନ ପାଇବା ଏବଂ ଗିରଫଦାରୀରୁ ବଡ ଆଶ୍ୱସ୍ତି ମିଳିଥିଲେ ହେଁ ନିର୍ବାଚନ ଲଢି ପାରିବେନି କଟକ-ବାରବାଟୀର କଂଗ୍ରେସ ବିଧାୟକ ମହମ୍ମଦ ମୋକିମ । ତାଙ୍କ ସ୍ଥାନରେ କଂଗ୍ରେସର ପ୍ରାର୍ଥୀ ହୋଇ ପାରନ୍ତି ମୋକିମଙ୍କ ଝିଅ ସୋଫିଆ ଫିର୍ଦ୍ଦୋସ । ଏହାକୁ ନେଇ ଚର୍ଚ୍ଚା ଆରମ୍ଭ ହୋଇ ଯାଇଛି । ଏପରିକି ମୋକିମଙ୍କ ବାସଭବନରେ ଗୁରୁତ୍ୱପୂର୍ଣ୍ଣ ବୈଠକ ବସିଛି ।
ଓଆରଏଚଡିସି ଦୁର୍ନୀତି ମାମଲାରେ ଛନ୍ଦି ହେବାରୁ ମୋକିମଙ୍କ ନିର୍ବାଚନ ଲଢିବା ସମ୍ଭାବନା ଶେଷ ହୋଇ ଯାଇଛି । ଏହା ପରେ ଏବେ ଝିଅକୁ ନେଇ ଅଙ୍କକଷା ଚାଲିଛି । ବୁଧବାର ମୋକିମଙ୍କ ଘରେ ସମର୍ଥକଙ୍କୁ ନେଇ ଗୁରୁତ୍ୱପୂର୍ଣ୍ଣ ବୈଠକ ଚାଲିଛି । ମୋକିମଙ୍କ ଜାଗାରେ ଝିଅ ସୋଫିଆ ଫିର୍ଦ୍ଦୋସଙ୍କୁ ପ୍ରାର୍ଥୀ କରାଯିବାକୁ ନେଇ ସହମତି ପ୍ରକାଶ ପାଇଛି । ଏ ବିଷୟରେ ହାଇକମାଣ୍ଡକୁ ଜଣାଇବାକୁ ବୈଠକରେ ନିଷ୍ପତି ହୋଇଛି । ତେବେ ଏହା ପ୍ରାଥମିକ ବୈଠକ ଥିଲା । ଏହା ପରେ ଆହୁରି ବୈଠକ ବସିବ । ବୁଦ୍ଧିଜୀବୀଙ୍କ ପରାମର୍ଶ ନେବୁ । ଏଥିରୁ ନିଷ୍ପତି ବାହାରିବା ପରେ ଏହାକୁ ହାଇକମାଣ୍ଡଙ୍କ ନିକଟକୁ ପଠାଇବୁ ବୋଲି ମହମ୍ମଦ ମୋକିମ କହିଛନ୍ତି ।
ସୋଫିଆ ଫିର୍ଦ୍ଦୋସ ମେଟ୍ରୋ ଗ୍ରୁପର ନିର୍ଦ୍ଦେଶକ ପଦରେ ଅଛନ୍ତି । ସେ ବେଙ୍ଗାଲୁରୁ ଆଇଆଇଏମରୁ ଉଚ୍ଚ ଶିକ୍ଷା ଗ୍ରହଣ କରିଛନ୍ତି । ମହିଳା ସ୍ୱେଚ୍ଛାସେବୀ ସଂଗଠନରେ କାମ କରିବାର ଅଭିଜ୍ଞତା ମଧ୍ୟ ତାଙ୍କର ରହିଛି ।
ସୂଚନାଯୋଗ୍ୟ, ଗତକାଲି ଓଆରଏଚଡିସି ଦୁର୍ନୀତି ମାମଲାରେ ସୁପ୍ରିମକୋର୍ଟରୁ ମହମ୍ମଦ ମୋକିମଙ୍କୁ ଜାମିନ ମିଳିଥିଲା । ମୋକିମଙ୍କ ଆବେଦନକୁ ଶୁଣାଣି ପାଇଁ ଗ୍ରହଣ କରିବା ସହ ଭିଜିଲାନ୍ସକୁ ନୋଟିସ୍ ଜାରି କରିଛନ୍ତି । କିନ୍ତୁ ଜାମିନା ମିଳିବା ପରେ ମୋକିମ ଆଗାମୀ ନିର୍ବାଚନ ଲଢି ପାରିବେ ନାହିଁ । ମୋକିମଙ୍କ ପକ୍ଷରୁ କେସ୍ ଲଢୁଥିଲେ ସୁପ୍ରିମକୋର୍ଟର ୩ ବରିଷ୍ଠ ଆଇଜନୀବୀ ମୁକୁଲ ରୋହତଗି, ଏସ୍ ମୁରଲୀଧର ଓ ପୀତାମ୍ବର ଆଚାର୍ଯ୍ୟ । ଓଏଚଆରଡିସି ଦୁର୍ନୀତି ମାମଲାରେ ଭିଜିଲାନ୍ସ କୋର୍ଟ ତାଙ୍କୁ ୩ ବର୍ଷ ଜେଲ୍ ଦଣ୍ଡାଦେଶ ଦେଇଥିଲେ । ଏହାକୁ ହାଇକୋର୍ଟରେ ଚ୍ୟାଲେଞ୍ଜ କରିଥିଲେ ହେଁ ମୋକିମଙ୍କୁ ନିରାଶ ହେବାକୁ ପଡିଥିଲା । ହାଇକୋର୍ଟ ଭିଜିଲାନ୍ସର ଦଣ୍ଡାଦେଶକୁ ବଳବତର ରଖିଥିଲେ । ଏହା ପରେ ହାଇକୋର୍ଟଙ୍କ ରାୟକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ ମୋକିମ ।
