ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ1/06/2024 at 12:31 PM
କୋଲକାତା: ଲୋକସଭା ନିର୍ବାଚନର ସପ୍ତମ ପର୍ଯ୍ୟାୟରେ ପଶ୍ଚିମବଙ୍ଗର ଦକ୍ଷିଣ ୨୪ ପ୍ରଗଣା ଜିଲ୍ଲାର କୁଲତଲି ଗାଁରେ ମତଦାନ ବେଳେ ତୁମୁଳକାଣ୍ଡ ଘଟିଛି। ଉତ୍ତେଜିତ ଭିଡ ମତଦାନ କେନ୍ଦ୍ରରେ ପଶି ଇଭିଏମକୁ ନେଇ ନିକଟ ପୋଖରୀରେ ଫିଙ୍ଗିଛନ୍ତି । ଫଳରେ ପୋଲିଂ ବାଧାପ୍ରାପ୍ତ ହୋଇଛି । କିଛି ଲୋକଙ୍କୁ ପୋଲିଂ ବୁଥ ଭିତରକୁ ଯିବାକୁ ରୋକିବାରୁ ଏମିତି ଘଟଣା ଘଟିଛି ।
ଲୋକଙ୍କୁ ମତଦାନ କେନ୍ଦ୍ର ଭିତରକୁ ଯିବାକୁ ମନା କରିବାରୁ ଲୋକେ କ୍ରୋଧିତ ହୋଇ ଉଠିଥିଲେ ଏବଂ ବଳପୂର୍ବକ କେନ୍ଦ୍ର ଭିତରେ ପଶିଥିଲେ । ଭେରିଫାଏଡ ପେପର ଅଡିଟ୍ ଟ୍ରେଲରୁ ଇଭିଏମକୁ କାଢି ନେଇ ପୋଖରୀରେ ଫିଙ୍ଗି ଦେଇଛନ୍ତି । ଏହାର ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ୍ ହେବାରେ ଲାଗିଛି ।
ପଶ୍ଚିମବଙ୍ଗ ମୁଖ୍ୟ ନିର୍ବାଚନ ଅଧିକାରୀ ସୂଚନା ଦେଇ କହିଛନ୍ତି, ୧୨୯-କୁଲତଲି ଗାଁରେ ବେନିମାଧପୁର ଏଫପି ସ୍କୁଲ ନିକଟସ୍ଥ ଏକ ମତଦାନ କେନ୍ଦ୍ରରୁ ରିଜର୍ଭ ଇଭିଏମ ଓ କାଗଜପତ୍ର ଲୁଟପାଟ୍ ହୋଇଛି । ଭିଭିପାଟ ମେସିନକୁ ପୋଖରୀରେ ଫିଙ୍ଗିଦେଇଛନ୍ତି ଦୁର୍ବୃତ୍ତ । ଅଧିକାରୀଙ୍କ ଦ୍ୱାରା ଏଫଆଇଆର ରୁଜୁ କରାଯାଇ କାର୍ଯ୍ୟାନୁଷ୍ଠାନ ଆରମ୍ଭ କରାଯାଇଛି । ଉକ୍ତ ବୁଥକୁ ନୂଆ କାଗଜପତ୍ର ଓ ଇଭିଏମ ଯୋଗାଇ ଦିଆଯାଇଛି । ବାକି ସମସ୍ତ ୬ଟି ବୁଥରେ ଶାନ୍ତି ଶୃଙ୍ଖଳାର ସହ ମତଦାନ ଚାଲିଛି ।