ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

21/06/2024 at 5:02 PM

ଭୁବନେଶ୍ୱର: ପାଗ ଅନୁକୂଳ ହେବାରୁ ମୌସୁମୀ ବାୟୁ ଅଗ୍ରସର ହୋଇ ଓଡିଶାର ୨୪ ଜିଲ୍ଲାକୁ ଛୁଇଁଛି । ଦକ୍ଷିଣ ପଶ୍ଚିମ ମୌସୁମୀ ବାୟୁ ପ୍ରଭାବରେ ବିଭିନ୍ନ ଜିଲ୍ଲାରେ ବର୍ଷା ହୋଇଛି । ତେବେ ମୌସୁମୀ ବାୟୁ ବାକି ୬ ଜିଲ୍ଲା ଛୁଇଁବାକୁ ପାଗ ଅନୁକୂଳ ରହିଛି । ଆଗାମୀ କିଛି ଘଣ୍ଟାରେ ମୌସୁମୀ ସାରା ରାଜ୍ୟକୁ ଅଗ୍ରସର କରିବ ।

ମୌସୁମୀ ବାୟୁ ପ୍ରଭାବରେ ବିଭିନ୍ନ ଜିଲ୍ଲାରେ ବର୍ଷା ହୋଇଛି । ଫଳରେ ଲୋକଙ୍କୁ ଭୀଷଣ ଗରମ ଓ ଗୁଳୁଗୁଳିରୁ ଆଶ୍ୱସ୍ତି ମିଳିଛି । ଜୁନ ଦ୍ୱିତୀୟ ସପ୍ତାହ ଆରମ୍ଭରୁ ମୌସୁମୀ ମାଲକାନଗିରି ଦେଇ ଓଡିଶା ଛୁଇଁ ସାରିଥିଲେ ମଧ୍ୟ ପାଗ ଅନୁକୂଳ ନ ହେବାରୁ ଆଗକୁ ଅଗ୍ରସର ହୋଇ ପାରି ନ ଥିଲା । ଏପରିକି ରଜ ସରିବା ପରେ ବି ମୌସୁମୀ ବର୍ଷା ହୋଇ ନ ଥିଲା । ତେବେ ଗତ ଦୁଇରୁ ତିନି ଦିନ ହେବ ମୌସୁମୀ ଆଗକୁ ବଢିଛି । ଏହାର ପ୍ରଭାବରେ ବର୍ଷାର ପରିମାଣ ବଢିବ । ପାରଦ ଆହୁରି କମିବ ବୋଲି ଆଞ୍ଚଳିକ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି ।

ସୂଚନାଯୋଗ୍ୟ, ଏଥର ମୌସୁମୀ ବାୟୁ ଆଗୁଆ ଅର୍ଥାତ ମେ ୩୦ ତାରିଖରେ କେରଳ ଛୁଇଁଥିଲା । ଆଉ ଓଡିଶାରେ ୧୦ ତାରିଖ ପୂର୍ବରୁ ପ୍ରବେଶ କରିଥିଲା ମୌସୁମୀ । କିନ୍ତୁ ପୁରା ରାଜ୍ୟରେ ଅଗ୍ରସର ହେବାକୁ ୧୦ ଦିନ ସମୟ ଲାଗିଗଲା ।