ଓଡ଼ିଶା ଡଟ୍ ନ୍ୟୁଜ୍23/06/2024 at 11:48 AM
ନୂଆଦିଲ୍ଲୀ: ନିଟ୍ ପରୀକ୍ଷାକୁ ନେଇ ବିବାଦ ଲାଗି ରହିଥିବା ବେଳେ ଗ୍ରେସ୍ ମାର୍କ ପାଇଥିବା ୧୫୬୩ ପିଲା ଆଜି ପୁଣି ଥରେ ପରୀକ୍ଷା ଦେବାକୁ ଯାଉଛନ୍ତି । ଦେଶର ୬ ସହରରେ ଏହି ପରୀକ୍ଷା ହେବ । ଅପରାହ୍ନ ୨ଟାରୁ ୫ଟା ୨୦ ପର୍ଯ୍ୟନ୍ତ କରୀକ୍ଷା ଚାଲିବ । ପରୀକ୍ଷା ସମୟରେ ଜାତୀୟ ପରୀକ୍ଷା ଏଜେନ୍ସି (ଏନଟିଏ) ଓ କେନ୍ଦ୍ର ଶିକ୍ଷା ମନ୍ତ୍ରଣାଳୟର ଅଧିକାରୀମାନେ ମଧ୍ୟ ପରୀକ୍ଷା କେନ୍ଦ୍ରରେ ଉପସ୍ଥିତ ରହିବେ। ଯେଉଁମାନେ ଏହି ପରୀକ୍ଷାରେ ଗ୍ରେସ୍ ମାର୍କ ପାଇଥିଲେ କେବଳ ସେହି ପରୀକ୍ଷାର୍ଥୀମାନେ ହିଁ NEET-UG ପୁନଃ ପରୀକ୍ଷାରେ ସାମିଲ ହେବେ।
ସୂଚନାଯୋଗ୍ୟ, ମେ’ ୫ ତାରିଖରେ NEET UG ପରୀକ୍ଷା ହୋଇଥିଲା । ଏହି ପରୀକ୍ଷାରେ ପେପର୍ ଲିକ୍ ହୋଇଥିବା କଥା ସାମ୍ନାକୁ ଆସିଛି । ମାମଲା ସୁପ୍ରିମକୋର୍ଟରେ ବିଚରାଓୀନ ରହିଛି । ଗତଥରର ପରୀକ୍ଷାରେ ମିଳିଥିବା ଗ୍ରେସ୍ ମାର୍କକୁ ରଦ୍ଦ କରାଯିବା ପରେ ପୁଣି ଡାକ୍ତରୀ ପ୍ରବେଶିକା ପରୀକ୍ଷା ଆଜି ଆୟୋଜିତ କରାଯାଉଛି। ତେବେ ନିଟ୍-ୟୁଜି କାଉନସେଲିଂ ରଦ୍ଦ କରିବାକୁ ସୁପ୍ରିମକୋର୍ଟ ମନା କରିଦେଇଛନ୍ତି ।
NEET UG ରେ ୭୨୦ମାର୍କ ମଧ୍ୟରୁ ମୋଟ ୬୭ ଛାତ୍ରଛାତ୍ରୀ ୭୨୦ ମାର୍କ ରଖି ଟପ୍ପର ହୋଇଥିଲେ । ସେଥିମଧ୍ୟରୁ ୬ ଜଣ ଛାତ୍ର ଗୋଟିଏ ହିଁ ସେଣ୍ଟରର ଥିଲେ । ଏହା ପରେ ଏହି ପରୀକ୍ଷାରେ ହେରଫେର ହୋଇଥିବା ଅଭିଯୋଗ ଆସିଥିଲା । ଏହାକୁ ନେଇ ଚାରିଆଡେ ବର୍ତ୍ତମାନ ବିରୋଧ ଜାରି ରହିଛି । ଏହି ପେପର୍ ଲିକ୍ ମାମଲାରେ ୧୦ରୁ ୧୫ ଜଣ ଗିରଫ ହୋଇ ସାରିଲାଣି ।
ସେପଟେ ଶନିବାର ବିଳମ୍ବିତ ରାତିରେ କେନ୍ଦ୍ର ସରକାର ଆଜି ଅନୁଷ୍ଠିତ ହେବାକୁ ଥିବା NEET-PG ପରୀକ୍ଷାକୁ ସ୍ଥଗିତ ରଖିଛନ୍ତି। ଖୁବ ଶୀଘ୍ର ନୂତନ ତାରିଖ ଘୋଷଣା କରାଯିବ ବୋଲି ସରକାର କହିଛନ୍ତି। ଛାତ୍ରଛାତ୍ରୀଙ୍କ ହିତ ତଥା ପରୀକ୍ଷାର ସ୍ୱଚ୍ଛତା ବଜାୟ ରଖିବା ପାଇଁ ଏହି ନିଷ୍ପତ୍ତି ନିଆଯାଇଛି ବୋଲି ସରକାର କହିଛନ୍ତି।