ଓଡ଼ିଶା ଡଟ୍ ନ୍ୟୁଜ୍

3/08/2024 at 12:28 PM

ଖଲ୍ଲିକୋଟ: ପୁଣି ଶିବ ଭକ୍ତ ଦୁର୍ଘଟଣା ସମ୍ମୁଖୀନ । ଟ୍ରମ ମାଡ଼ି ଯିବାରୁ ଦୁଇ ଜଣ କାଉଡ଼ିଆଙ୍କ ସମେତ ଚାଲିଗଲା ତିନି ଜଣଙ୍କ ଜୀବନ । ଦୁର୍ଘଟଣା ଘଟିଛି ଗଞ୍ଜାମ ଜିଲ୍ଲା ଖଲ୍ଲିକୋଟ ଡିମିରିଆ ଗାଁ ଛକ ୧୬ ନମ୍ବର ଜାତୀୟ ରାଜପଥରେ । ମୃତ କାଉଡ଼ିଆଙ୍କ ମଧ୍ୟରୁ ଜଣଙ୍କ ନାଁ ରଞ୍ଜି ନାୟକ ହୋଇଥିବା ବେଳେ ଅନ୍ୟ ଜଣଙ୍କର ପରିଚୟ ମିଳିପାରି ନାହିଁ । ଉଭୟ ବାଣପୁର ଅଞ୍ଚଳର । ଅନ୍ୟ ଜଣେ ମୃତକ ହେଲେ ଏ. ବନମାଳି ପାତ୍ର । ସେ ସ୍ଥାନୀୟ ଅଞ୍ଚଳର ଜଣେ ଶ୍ରମିକ ।

ମିଳିଥିବା ସୂଚନା ଅନୁସାରେ, ରଞ୍ଜି ଏବଂ ତାଙ୍କ ଅନ୍ୟ କାଉଡ଼ିଆ ସାଥୀ ଋଷିକୁଲ୍ୟା ନଦୀରୁ ପାଣି ଉଠାଇ ବାଣପୁର ଅଭିମୁଖେ ଯାଉଥିବା ବେଳେ ଦୁର୍ଘଟଣା ଘଟିଥିଲା । ଘଟଣାସ୍ଥଳରେ ହିଁ ଉଭୟଙ୍କ ମୃତ୍ୟୁ ହୋଇଯାଇଥିଲା । ଅନ୍ୟପକ୍ଷରେ ଏ. ବନମାଳି ପାତ୍ରଙ୍କୁ ଖଲ୍ଲିକୋଟ ଡାକ୍ତରଖାନାରେ ଡାକ୍ତର ମୃତ ଘୋଷଣା କରିଥିଲେ ।

୩ ଜଣଙ୍କ ଉପରେ ମାଡ଼ିଯିବା ପରେ ଟ୍ରକ୍‌ଟି ଭାରସାମ୍ୟ ହରାଇ ଓଲଟି ପଡ଼ିଥିଲା । ଦୁର୍ଘଟଣା ଟ୍ରକ ଡ୍ରାଇଭରଙ୍କୁ ଖଲ୍ଲିକୋଟ ପୋଲିସ ଅଟକ ପଚରାଉଚରା କରୁଛି । ଟ୍ରକ୍‌ଟି ଆନ୍ଧ୍ର ପ୍ରଦେଶରୁ ଭୁବନେଶ୍ୱର ଯାଉଥିଲା ବୋଲି ସୂଚନା ମିଳିଛି ।