ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

4/08/2024 at 1:37 PM

ସାଗର: ମଧ୍ୟପ୍ରଦେଶର ସାଗରରେ ଏକ ଅଭାବନୀୟ ଦୁଃଖଦାୟକ ଘଟଣା ଘଟିଛି । ମନ୍ଦିରର କାନ୍ଥ ଭାଙ୍ଗି ଯିବାରୁ ତା ତଳେ ଚାପି ହୋଇ ୯ ଜଣ ପିଲାଙ୍କ ମୃତ୍ୟୁ ଘଟିଛି । ମୃତକଙ୍କ ବୟସ ୧୦ରୁ ୧୪ ବର୍ଷ ମଧ୍ୟରେ ହେବ । ଶାହପୁରରେ ମନ୍ଦିର ନିକଟରେ ଶିବ ଲିଙ୍ଗ ତିଆରି କରୁଥିବା ବେଳେ ମନ୍ଦିରର କାନ୍ଥ ଖସିବାରୁ ତା ତଳେ ପିଲାମାନେ ଚାପି ହୋଇ ଯାଇଥିଲେ । ଦୁର୍ଘଟଣା ପରେ ଉଦ୍ଧାର କାର୍ଯ୍ୟ ଜାରି ରହିଛି । ଜିଲ୍ଲା ପ୍ରଶାସନ ଓ ପୋଲିସ ଅଧିକାରୀ ଘଟଣାସ୍ଥଳରେ ଉପସ୍ଥିତ ଅଛନ୍ତି ।

ସୂଚନା ଅନୁଯାୟୀ, ଆଜି ସକାଳ ପ୍ରାୟ ୮ଟା ୩୦ରେ ଏହି ଦୁର୍ଘଟଣା ଘଟିଛି । ୯ ଜଣ ପିଲାଙ୍କ ମୃତ୍ୟୁ ଘଟିବା ସହ ୧୦ରୁ ୧୫ ଜଣ ଆହତ ହୋଇଛନ୍ତି । ଦୁର୍ଘଟଣାସ୍ଥଳରୁ ସମସ୍ତ କାନ୍ଥ ଅତଡା ହଟାଇ ଦିଆଯାଇଛି । ଗତକାଲି ରାତିରୁ ପ୍ରବଳ ବର୍ଷା ଲାଗି ରହିଛି । ଏହି କାରଣରୁ କାନ୍ଥଟି ଭୁଶୁଡି ପଡିଥିବା କୁହାଯାଉଛି ।

ଶ୍ରାବଣ ମାସ ଅବସରରେ ହରଦୟାଲ ମନ୍ଦିରରେ ଧାର୍ମିକ କାର୍ଯ୍ୟକ୍ରମ ଆୟୋଜନ ହୋଇଥିଲା । ଏହି ଉପଲକ୍ଷେ ଶିବଲିଙ୍ଗ ନିର୍ମାଣ କରାଯାଉଥିଲା । ନିର୍ମାଣରେ ଅନେକ ଲୋକ ସହ ଛୋଟ ଛୋଟ ପିଲା ମଧ୍ୟ ସାମିଲ ଥିଲେ । ଏହି ସମୟରେ କାନ୍ଥ ପଡିବାରୁ ୯ ଜଣଙ୍କ ମୃତ୍ୟୁ ଘଟିଛି । ଏହି କାନ୍ଥ ୫୦ ବର୍ଷ ପୁରୁଣା ବୋଲି କୁହାଯାଉଛି । ଦୁର୍ଘଟଣାରେ ସ୍ଥାନୀୟ ଅଞ୍ଚଳରେ ଶୋକର ଲହରି ଖେଳି ଯାଇଛି । ସ୍ଥାନୀୟ ଲୋକଙ୍କ ସହ ମିଶି ଜିଲ୍ଲା ପ୍ରଶାସନ ଓ ପୋଲିସ ଉଦ୍ଧାରକାର୍ଯ୍ୟ କରିଛନ୍ତି ।