ଓଡ଼ିଶା ଡଟ୍ ନ୍ୟୁଜ୍

12/09/2024 at 1:51 PM

କଟକ: ବିଘ୍ନରାଜ ଜଗାନନଙ୍କ ଚାନ୍ଦିର ମୁକୁଟ ଚୋରି କରି ଧରା ପଡ଼ିଗଲେ ଯୁବକ । ସିଲିଭର ସିଟି କଟକରେ ଘଟିଛି ଏହି ଘଟଣା । କଟକ ହରିପୁର ଜଗନ୍ନାଥ କ୍ଲବରେ ପୂଜା ପାଉଥିବା ଗଣେଶଙ୍କ ମୂର୍ତ୍ତିରେ ଲାଗିଛି ଚାନ୍ଦି ମୁକୁଟ । ମୁକୁଟ ଚୋରି କରିଥିବା ଯୁବକଙ୍କୁ ଧରିବା ସହ ଚାନ୍ଦିର ମୁକୁଟକୁ ଉଦ୍ଧାର କରିଛି ଲାଲବାଗ ଥାନା ପୋଲିସ୍‌ ।

ଗଜାନନଙ୍କ ମୁଣ୍ଡରେ ଚାନ୍ଦିର ମୁକୁଟ ଶୋଭା ପାଉଥିବା ଦେଖି ଅଭିଯୁକ୍ତ ଜଣକ ତାହାକୁ ଚୋରି କରିବାକୁ ଯୋଜନା କରିଥିଲେ । ଏହାପରେ ସୁଯୋଗ ଦେଖି ସେ ମୁକୁଟକୁ ନେଇ ଫେରାର ହୋଇଥିଲେ । କ୍ଲବ ସଦସ୍ୟ ଏହା ଜାଣିବା ପରେ ଏହି ଖବର ଚାରିଆଡ଼େ ବ୍ୟାପିଗଲା । ଏନେଇ କ୍ଲବ ପକ୍ଷରୁ ପୋଲିସ୍‌କୁ ସୂଚନା ଦିଆଯାଇଥିବା ବେଳେ ଆରମ୍ଭ ହୋଇଗଲା ଖୋଳତାଡ଼ ।

ତଦନ୍ତ ପରେ ପଟ୍ଟାପୋଲ ଅଞ୍ଚଳର ଜଣେ ଯୁବକ ମୁକୁଟ ଚୋରି କରିଥିବା ସୂଚନା ମିଳିଥିଲା । ଯୋଜନା ମୁତାବକ ସମ୍ପୃକ୍ତ ଅଭିଯୁକ୍ତ ଯୁବକଙ୍କୁ ଅଟକ ରଖି ପଚରାଉଚରା କରିବାରୁ ସେ ମୁକୁଟ ଚୋରି କରିଥିବା ସ୍ୱୀକାର କରିଥିଲେ । ପୋଲିସ୍‌ ତାଙ୍କ ନିକଟରୁ ଚାନ୍ଦିର ମୁକୁଟଟିକୁ ଜବତ କରିଥିବା ବେଳେ ତାହା ସୁରକ୍ଷିତ ଥିବା ଜଣାଯାଇଛି । ଲାଲବାଗ ପୋଲିସ ଯୁବକଙ୍କୁ ଥାନାକୁ ନେଇ ଅଧିକ ପଚରାଉଚରା କରୁଛି ।