ଓଡ଼ିଶା ଡଟ୍ ନ୍ୟୁଜ୍

12/09/2024 at 3:57 PM

କେନ୍ଦୁଝର: କଲେଜ ନୁହେଁ କି ହଷ୍ଟେଲ ନୁହେଁ, ନବୋଦୟ ବିଦ୍ୟାଳୟରେ ରାଗିଂ । ତାହା ପୁଣି ଜଣେ ୯ମ ଶ୍ରେଣୀ ଛାତ୍ରଙ୍କୁ । କିଛି ଅଣ ଓଡ଼ିଆ ଛାତ୍ର ପୀଡ଼ିତଙ୍କୁ ରାଗିଂ କରିଥିବା ନେଇ ଥାନାରେ ଅଭିଯୋଗ ହୋଇଛି । ଏପରି ଅଭିଯୋଗ ଆସିଛି କେନ୍ଦୁଝର ଜିଲ୍ଲା ହଦଗଡ଼ ନବୋଦୟ ବିଦ୍ୟାଳୟରୁ । ଅଣ ଓଡ଼ିଆ ଛାତ୍ରମାନେ ସମ୍ପୃକ୍ତ ଛାତ୍ରଙ୍କୁ ନିସ୍ତୁକ ମାଡ଼ କରିଥିବା ସୋସ ଥାନାରେ ଅଭିଯୋଗ ହୋଇଛି । ଏନେଇ ପରିବାର ଲୋକେ ସ୍କୁଲ କର୍ତ୍ତୃପକ୍ଷଙ୍କୁ ଅବଗତ କରିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନଥିବା ପରିବାର ଲୋକେ ସେମାନଙ୍କ ଅଭିଯୋଗ ଦର୍ଶାଇଛନ୍ତି ।

ସ୍କୁଲରୁ ନିରାଶ ହେବା ପରେ ଛାତ୍ରଙ୍କ ପରିବାର ଲୋକେ ଗତକାଲି ସନ୍ଧ୍ୟାରେ ଥାନାରେ ଅଭିଯୋଗ କରିଛନ୍ତି । ପୂର୍ବରୁ ମଧ୍ୟ ସମ୍ପୃକ୍ତ ଛାତ୍ରକୁ ରାଗିଂ କରାଯାଇଥିବା ଓ ଏନେଇ ଅଭିଯୋଗ ପରେ ସ୍କୁଲ କର୍ତ୍ତୃପକ୍ଷ ସୋସ ପୋଲିସ ଉପସ୍ଥିତିରେ ଆପୋସ ବୁଝାମାଣ କରିଥିବା ସୂଚନା ରହିଛି । ଘଟଣାକୁ ନେଇ ପୋଲିସ କିମ୍ବା ବିଦ୍ୟାଳୟ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିପାରିନାହିଁ। 

ଅଭିଯୋଗକାରୀ ଛାତ୍ର କହିଛନ୍ତି, ମୋତେ ଖରାପ କଥା ଲେଖିକି ଦେବା ପାଇଁ ସେମାନେ କହିଲେ । ମୁଁ ନଦେବାରୁ ସେମାନେ ମୋତେ ମାଡ଼ ମାରିଥିଲେ ।

ଛାତ୍ରଙ୍କ ବାପା କହିଛନ୍ତି, ମୋ ପୁଅକୁ ପୂର୍ବରୁ ସ୍କୁଲରେ ରାଗିଂ କରାଯାଇଥିଲା । ଏନେଇ ମୁଁ ପ୍ରିନ୍ସପାଲ ସାରଙ୍କୁ  ଜଣାଇଥିଲି, ହେଲେ ସେ କିଛି ବୁଝିଲେ ନାହିଁ । କିଛି ଦିନ ତଳେ ମୋ ପୁଅର ମଶାରୀ ସେମାନେ ଚିରି ଦେଇଥିଲେ । ପୁଅ ମୋତେ ଜଣାଇବା ପରେ ସ୍କୁଲକୁ ବୁଝିବାକୁ ଯାଇଥିବା ବେଳେ ପୁଅ କାନ୍ଦି କାନ୍ଦି ଆସିଥିଲା ଓ ତାକୁ ପିଲାମାନେ ମାଡ଼ ମାରିଥିବା କହିଥିଲା । ମୁଁ ଏନେଇ ଥାନାରେ ଅଭିଯୋଗ କରିଛି ।