ଓଡ଼ିଶା ଡଟ୍ ନ୍ୟୁଜ୍

16/09/2024 at 11:36 AM

ନୟାଗଡ଼: କୌଣସି ସ୍ଥାନକୁ ଯିବାକୁ ବସକୁ ଅପେକ୍ଷା କରିଥିଲେ ଜଣେ ମହିଳା । ହେଲେ ସେ ବସ ଆସିବା ଆଗରୁ ଆଉ ଏକ ବସ ଆସିଲା ଓ ମହିଳାଙ୍କ ଉପରେ ଚଢ଼ିଗଲା । ଫଳରେ ଘଟଣା ସ୍ଥଳରେ ହିଁ ମହିଳାଙ୍କ ଜୀବନ ଚାଲିଯାଇଛି । ଏପରି ଘଟଣା ଘଟିଛି ନୟାଗଡ଼ ଜିଲ୍ଲା କରଡାପଲ୍ଲୀ ଛକରେ । ମୃତ ମହିଳା ଜଣକ ହେଲେ କରଡ଼ାପଲ୍ଲୀ ଗ୍ରାମର ହୁଲ୍ଲାସୀ ବେହେରା ।

ହୁଲ୍ଲାସୀ ବେହେରା ଆଜି ସକାଳେ ବସ୍‌କୁ ଅପେକ୍ଷା କରି କରଡାପଲ୍ଲୀ ଛକରେ ଛିଡ଼ା ହୋଇଥିଲେ । ଏହି ସମୟରେ ବାଘମାରିରୁ ଖଣ୍ଡପଡା ଅଭିମୁଖେ ଯାଉଥିବା ‘କୁମାର’ ନାମକ ଘରୋଇ ବସ୍‌ ତାଙ୍କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ହିଁ ତାଙ୍କ ମୃତ୍ୟୁ ଘଟିଥିଲା ।

ଖବର ପାଇ ଉତ୍ତ୍ୟକ୍ତ ଗ୍ରାମବାସୀ ଘଟଣାସ୍ଥଳରେ ରୁଣ୍ଡ ହୋଇଥିଲେ । ଏହାପରେ କ୍ଷତିପୂରଣ ଦାବିରେ ଉତ୍ତ୍ୟକ୍ତ ଲୋକେ କରଡ଼ାପଲ୍ଲୀ ଛକରେ ରାସ୍ତା ଅବରୋଧ କରିଛନ୍ତି । ଯାହା ଫଳରେ ରିପୋର୍ଟ ଲେଖା ହେବା ପର୍ଯ୍ୟନ୍ତ ଯାତାୟତ ସମ୍ପୂର୍ଣ ଠପ ହେବା ସହ ରାସ୍ତାର ଦୁଇ ପାର୍ଶ୍ଵରେ ଅନେକ ଗାଡି ଛିଡା ହୋଇଛି । ଏହାକୁ ନେଇ ଘଟଣାସ୍ଥଳରେ ପ୍ରବଳ ଉତ୍ତେଜନା ଦେଖାଦେଇଛି । ଖବର ପାଇ ଘଟଣା ସ୍ଥଳରେ ଫତେଗଡ ପୋଲିସ ପହଞ୍ଚି ଶବକୁ ଜବତ କରିବା ସହିତ ବସ୍‌ ଡ୍ରାଇଭରକୁ ଅଟକ ରଖି ତଦନ୍ତ କରୁଛି ।