ଓଡ଼ିଶା ଡଟ୍ ନ୍ୟୁଜ୍18/09/2024 at 3:52 PM
ଅନୁଗୁଳ: ସକାଳୁ ସକାଳୁ ଅନୁଗୁଳରେ ଅଘଟଣ । କେନାଲକୁ ଗାଧୋଇ ଯାଇ ଗୋଡ଼ ଖସିଯିବାରୁ ଭାସିଗଲେ ମହିଳା । ଅନୁଗୁଳ ଜିଲ୍ଲା ବଅଁରପାଳ ଥାନା ଅନ୍ତର୍ଗତ ବୁଢ଼ାପଙ୍କ ଗ୍ରାମରେ ଘଟିଛି ଅଘଟଣ । ଭାସିଯାଇ ନିଖୋଜ ହୋଇଥିବା ମହିଳା ଜଣକ ହେଲେ ବୁଢ଼ାପଙ୍କ ଗ୍ରାମ ଗଡ଼ସାହି ବାସିନ୍ଦା ଅଶୋକ ସାମଲଙ୍କ ୨୨ ବର୍ଷୀୟ ସ୍ତ୍ରୀ ପୂର୍ଣିମା ସାମଲ ।
ପୂର୍ଣ୍ଣିମା ନିଜ ସମ୍ପର୍କୀୟଙ୍କ ସହ ସକାଳେ ଗାଧୋଇବା ପାଇଁ କେନାଲକୁ ଯାଇଥିଲେ । ତେବେ ଗାଧୋଇବା ସମୟରେ ଗୋଡ଼ ଖସିଯିବାରୁ ସେ ପାଣି ସ୍ରୋତରେ ଭାସି ଯାଇଥିଲେ । ସମ୍ପର୍କୀୟମାନେ ତାଙ୍କୁ ଲୁଗା ପକାଇ ଚେଷ୍ଟା କରିବା ବେଳେ ଉଦ୍ଧାର କରିବାରେ ସଫଳ ହୋଇ ପାରି ନଥିଲେ ।
ଗ୍ରାମବାସୀ ଅଗ୍ନିଶମ ବିଭାଗକୁ ଖବର ଦେବା ପରେ ଅଗ୍ନିଶମ ବିଭାଗ କର୍ମଚାରୀ ଆସି ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ତେବେ ରିପୋର୍ଟ ଲେଖାଯିବା ପର୍ଯ୍ୟନ୍ତ ତାଙ୍କର କୌଣସି ପତ୍ତା ମିଳି ନଥିବା ଜଣାଯାଇଛି ।