ଓଡ଼ିଶା ଡଟ୍ ନ୍ୟୁଜ୍

4/10/2024 at 4:07 PM

ସମ୍ବଲପୁର: ସମସ୍ୟାର ସମାଧାନ କରିବାକୁ ଯାଇଥିଲେ ପୋଲିସ ବାବୁ । ହେଲେ ଖଣ୍ଡାରେ ହେଲା ଆକ୍ରମଣ । ଛିଡିଗଲା ପୋଲିସ ବାବୁଙ୍କ ହାତର ପାପୁଲି । ଏମିତି ଘଟଣା ଘଟିଛି ସମ୍ବଲପୁର ଜିଲ୍ଲା ବୁର୍ଲା ଥାନା ଅନ୍ତର୍ଗତ ଝରାପାଲି ଗାଁରେ । ଆହତ କନଷ୍ଟେବଳ ହେଲେ ସରୋଜ ଭୋଇ । ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ବୁର୍ଲା ମେଡିକାଲରେ ଭର୍ତ୍ତି କରାଯାଇଛି । ତାଙ୍କର ୩ଟି ଆଙ୍ଗୁଳିରେ ମଧ୍ୟ ଗୁରୁତର ଭାବରେ ଆଘାତ ଲାଗିଛି ।
ଝରାପାଲି ଗାଁରେ ଏକ ଘରେ ସ୍ବାମୀ ଓ ସ୍ତ୍ରୀଙ୍କ ମଧ୍ୟରେ ପାରିବାରିକ କଳହ ଲାଗିଥିଲା । ଏନେଇ ଥାନାରେ ଅଭିଯୋଗ ହୋଇଥିଲା । ଅଭିଯୋଗ ପାଇବା ପରେ ସମସ୍ୟାର ସମାଧାନ ପାଇଁ ସରୋଜଙ୍କ ସହ କିଛି ପୋଲିସ କର୍ମଚାରୀ ଦମ୍ପତିଙ୍କ ଗାଁକୁ ଯାଇଥିଲେ । ଉଭୟଙ୍କୁ ବୁଝାଶୁଝା କରିବା ସହ ସମସ୍ୟାର ଆପୋଷ ସମାଧାନ ପାଇଁ ପୋଲିସ ଚେଷ୍ଟା କରିଥିଲେ । ଏହ ସମୟରେ ଜଣେ ବ୍ୟକ୍ତି ଧାରୁଆ ଅସ୍ତ୍ରରେ ସରୋଜଙ୍କୁ ଆକ୍ରମଣ କରିଥିଲେ ।
ସରୋଜଙ୍କ ପାପୁଲି ଅଧା କଟି ଯାଇଥିଲା । ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ବୁର୍ଲା ଡାକ୍ତରଖାନାରେ ଭର୍ତ୍ତି କରାଯାଇଥିଲା । ପ୍ରାଥମିକ ଚିକିତ୍ସା ପରେ କନଷ୍ଟେବଲଙ୍କୁ କଟକ ସ୍ଥାନାନ୍ତର କରାଯାଇଛି । ଆକ୍ରମଣ ପରେ ଅଭିଯୁକ୍ତ ଫେରାର ହୋଇଯାଇଛି । ତାକୁ ଧରିବାକୁ ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି ।