ଓଡ଼ିଶା ଡଟ୍ ନ୍ୟୁଜ୍6/10/2024 at 11:35 AM
କେନ୍ଦୁଝର: ଆନନ୍ଦପୁର ସହରରେ ଗଣେଶ ମୂର୍ତ୍ତି ଭସାଣ ବେଳେ ଉତ୍ତେଜନା । ଶୋଭାଯାତ୍ରା ବେଳେ ମୁହାଁ ମୁହିଁ ହେଲେ ଦୁଇ ଗୋଷ୍ଠୀ। ଏପରିକି ଶୋଭାଯାତ୍ରା ଉପରକୁ ହେଲା ଢେଲା ମାଡ । ଯାହାକୁ ନେଇ ଉତ୍ତେଜନା ଆହୁରି ଉଗ୍ର ହୋଇଥିଲା । ବିଳମ୍ବିତ ରାତି ପର୍ଯ୍ୟନ୍ତ ଉତ୍ତେଜନା ଲାଗି ରହିଥିବା ବେଳେ ବ୍ୟାପକ ପୋଲିସ୍ ଫୋର୍ସ ମୁତୟନ ହୋଇଛନ୍ତି । ଉଭୟ ପକ୍ଷରୁ ଥାନାରେ ଅଭିଯୋଗ ହୋଇଛି । ଫଳରେ ଅଧାରେ ଭସାଣି ବନ୍ଦ ରହିଥିବା ବେଳେ ବିନା ରୋଶଣିରେ ମୂର୍ତ୍ତି ବିସର୍ଜନ କରିଛି ପୋଲିସ୍ ।
ଗଣେଶ ପୂଜା ସରିବାର ପ୍ରାୟ ମାସେ ବିତି ସାରିଥିବା ବେଳେ ଏଯାଏଁ ଆନନ୍ଦପୁରରେ ଭସାଣି ହୋଇ ନଥିଲା । ଗତ ରାତିରେ ଶୋଭାଯାତ୍ରା ଆନନ୍ଦପୁର ଥାନା ନିକଟରେ ଯାଉଥିବା ବେଳେ ହଠାତ୍ ଢେଲା ମାଡ଼ ହୋଇଥିଲା । ଫଳରେ ଲୋକେ ଛତ୍ରଭଙ୍ଗ ଦେଇ ଚାରିଆଡ଼େ ଦୌଡ଼ିବାକୁ ଲାଗିଲେ ।
ଧାଁଦୌଡ଼ ଯୋଗୁଁ ଶତାଧିକ ମହିଳା, ଶିଶୁ ସମସ୍ୟାର ସମ୍ମୁଖୀନ ହୋଇଥିଲେ । ସ୍ଥିତିକୁ ନିୟନ୍ତ୍ରଣକୁ ଆଣିବାକୁ ସେଠାରେ ଉପସ୍ଥିତ ପୋଲିସ୍ ମୃଦୁ ଲାଠି ଚାଳନା କରିଥିଲା । ଫଳରେ ରାତି ସାରା ଉତ୍ତେଜନା ଲାଗି ରହିଥିଲା ।
ବିଳମ୍ବିତ ରାତିରେ ବିନା ରୋଶଣିରେ ପୋଲିସ୍ ଠାକୁରଙ୍କୁ ବିସର୍ଜନ କରିଥିବା ଜଣାଯାଇଛି । ଉଭୟ ପକ୍ଷରୁ ଏନେଇ ଥାନାରେ ଅଭିଯୋଗ ହୋଇଛି । ଆନନ୍ଦପୁରରେ ଦୁଇ ପ୍ଲାଟୁନ ଫୋର୍ସ ମୁତୟନ ହୋଇଛନ୍ତି ।
ତେବେ ଗଣେଶ ପୂଜା ସରିବାର ପ୍ରାୟ ମାସେ ପରେ ମଧ୍ୟ ଆନନ୍ଦପୁରରେ କାହିଁକି ବିସର୍ଜନ ସମାପ୍ତ ହୋଇ ପାରୁନି ତାହା ପ୍ରଶ୍ନବାଚୀ ସୃଷ୍ଟି କରିଛି । ଏନେଇ ପ୍ରଶାସନ ପକ୍ଷରୁ ଲଟେରୀ ଉଠାଯାଇ ବିଭିନ୍ନ କ୍ଲବମାନଙ୍କର ଭସାଣି ତାରିଖ ନିର୍ଦ୍ଧାରଣ କରାଯାଏ । ତେବେ ଏହାକୁ ସୀମିତ ସମୟ ମଧ୍ୟରେ ନ ସାରି କାହିଁକି ଲମ୍ବା ଯାଉଛି ତାହାକୁ ନେଇ ଉଦ୍ବେଗ ପ୍ରକାଶ ପାଇଛି ।