ଓଡ଼ିଶା ଡଟ୍ ନ୍ୟୁଜ୍

26/11/2024 at 1:09 PM

ଅନୁଗୋଳ: ଦୁର୍ଘଟଣାରେ ଚାଲିଗଲା ଜଣଙ୍କ ଜୀବନ । ଆଉ ରାତିରେ ତାଙ୍କରି ଘରେ ପଶି ସବୁ ସଫା କରିଦେଲେ ଡକାୟତ । ଏମିତି ଘଟଣା ଅନୁଗୋଳ ଜିଲ୍ଲା ହଣ୍ଡପା ଥାନା ଅନ୍ତର୍ଗତ ବାଲିଆମ୍ବ ଗାଁରେ ଘଟିଛି । ମୃତ ବ୍ୟକ୍ତି ଜଣଙ୍କ ହେଲେ ବିଜୟ ସାହୁ ।

ସୂଚନା ଅନୁସାରେ, ବାଗଡ଼ିଆ ହାଟକୁ ବିଜୟ ପରିବା ବିକ୍ରି କରିବା ପାଇଁ ଯାଇଥିଲେ । ଗତକାଲି ରାତିରେ ହାଟରୁ ଟ୍ରାକ୍ଟର ଯୋଗେ ଘରକୁ ଫେରୁଥିଲେ । ବରସାହି ନିକଟରେ ଟ୍ରାକ୍ଟରଟି ହଠାତ୍ ହମ୍ପସ ଉପରେ ଚଢ଼ିଯିବାରୁ ସେ ଭାରସାମ୍ୟ ହରାଇ ତଳେ ଛିଟିକି ପଡ଼ି ଯାଇଥିଲେ । ଟ୍ରାକ୍ଟରଟି ବିଜୟଙ୍କ ମୁଣ୍ଡ ଉପରେ ଚଢ଼ିଯାଇଥିଲା । ତାଙ୍କୁ ଗୁରୁତର ଅବସ୍ଥାରେ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

ବିଜୟଙ୍କ ମୃତ୍ୟୁ ଖବର ପାଇ ତାଙ୍କ ପତ୍ନୀ ଓ ସମ୍ପର୍କୀୟ ଛେଣ୍ଡିପଦା ପହଞ୍ଚିଥିଲେ । ପରେ ବିଳମ୍ବିତ ରାତିରେ ତାଙ୍କ ସ୍ତ୍ରୀ ଓ କିଛି ସମ୍ପର୍କୀୟ ଘରକୁ ଫେରିଥିଲେ । ଘରେ ପହଞ୍ଚିବାର ମାତ୍ର କିଛି ମିନିଟ ମଧ୍ୟରେ ପ୍ରାୟ ୭ରୁ ୮ ଜଣ ଲୁଟେରା ମୃତ ବିଜୟଙ୍କ ଘରେ ପଶିଥିଲେ । ଖଣ୍ଡା, ଭୁଜାଲି ଓ ବନ୍ଧୁକ ଦେଖାଇ ପରିବାର ଲୋକଙ୍କୁ ଭୟବୀତ କରାଇଥିଲେ । ପରେ ଟଙ୍କା ଓ ସୁନା ଲୁଟି ନେଇ ଚମ୍ପଟ ମାରିଥିବା ଅଭିଯୋଗ ହୋଇଛି । ବିଜୟଙ୍କ ମୃତ୍ୟୁ ପରେ ପରିବାରରେ ଶୋକର ଛାୟା ଖେଳିଯାଇଥିବା ବେଳେ ଲୁଟକୁ ନେଇ ଅସନ୍ତୋଷ ପ୍ରକାଶ ପାଇଛି ।