ବାଲେଶ୍ବର: ଦୁଇଟି ବାଇକକୁ ଧକ୍କା ଦେବା ପରେ ଓଲଟିଲା ଷଣ୍ଢ ଚାଲଣ ହେଉଥିବା ପିକଅପ୍ ଭ୍ୟାନ୍ । ଫଳରେ ୮ଟି ଷଣ୍ଢଙ୍କ ମୃତ୍ୟୁ ଘଟିଛି । ଘଟଣା ସଦର ଥାନା ଅନ୍ତର୍ଗତ ସୁନ୍ଦୁରୀ ଛକ ନିକଟରେ ଆଜି ସକାଳେ ଘଟିଛି ।
ସାହାସପୁରା ଅଞ୍ଚଳରୁ ଏକ ପିକଅପରେ ୧୫ରୁ ଊର୍ଦ୍ଧ୍ୱ ଷଣ୍ଢ ଚାଲାଣ ହେଉଥିଲା । ବାଲେଶ୍ୱରର ସୁନ୍ଦୁରୀ ଛକ ନିକଟରେ ଦ୍ରୁତ ଗତିରେ ଯାଉଥିବା ଭ୍ୟାନ୍ ସମ୍ମୁଖ ଦିଗରୁ ଆସୁଥିବା ଦୁଇଟି ବାଇକ୍କୁ ଧକ୍କା ଦେଇ ଓଲଟି ପଡିଥିଲା । ଫଳରେ ପିକ୍ଅପ୍ରେ ଥିବା ଷଣ୍ଢମାନେ ରାସ୍ତା ଉପରେ ଛିଟିକି ପଡ଼ିଥିଲେ । ସେମାନଙ୍କ ମଧ୍ୟରୁ ୮ଟି ଷଣ୍ଢଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା ।
ଦୁର୍ଘଟଣା ପରେ ସ୍ଥାନୀୟ ଲୋକେ ଘଟଣାସ୍ଥଳରେ ରୁଣ୍ଡ ହୋଇଥିବା ବେଳେ ପିକ୍ଅପ୍ ଡ୍ରାଇଭର ଓ ହେଲପରଙ୍କୁ କାବୁ କରି ପ୍ରବଳ ମାଡ଼ ଦେଇଛନ୍ତି । ଖବର ପାଇ ପୋଲିସ୍ ଘଟଣା ସ୍ଥଳରେ ପହଞ୍ଚି ଉଭୟଙ୍କୁ ଥାନାକୁ ନେଇ ଅଟକ ରଖିଛି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ପ୍ରକାଶ ପାଇଛି । ପୋଲିସ୍ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି । ବାଲେଶ୍ୱରରେ ସବୁବେଳେ ଗୋରୁ ଚାଲାଣ ରାକେଟ ସକ୍ରିୟ ରହୁଥିବା ବେଳେ ତାହାକୁ ରୋକିବାକୁ ପୋଲିସ୍ କଠୋର ପଦକ୍ଷେପ ଗ୍ରହଣ କରୁ ନଥିବା ଅଭିଯୋଗ ହେଉଛି । ଏଥିଯୋଗୁଁ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।