ମହେନ୍ଦ୍ର କୁମାର ସାଇ27/12/2024 at 9:37 PM
ଝାରସୁଗୁଡା ୨୭/୧୨ (ଓଡ଼ିଶା ନ୍ୟୁଜ) ଏନ ଏଚ ୪୯ ଝାରସୁଗୁଡ଼ା ଜିଲ୍ଲା ସ୍ଥିତ ଗୋବିନ୍ଦପୁର ଟୋଲଗେଟ ନିକଟରେ ଆଜି ୭ ଟି ଓଭର ଲୋଡିଂ ପାଉଁଶ ବୋଝେଇ ଟ୍ରକରୁ ୨ ଲକ୍ଷ ୫୩ ହଜାର ୩୮୦ ଟଙ୍କା ଫାଇନ ଆଦାୟ କରା ଯାଇଥିବା ଝାରସୁଗୁଡା ଜିଲ୍ଲା ଆଞ୍ଚଳିକ ପରିବହନ ଅଧିକାରୀ ଦୀନବନ୍ଧୁ ଶୁଣ୍ଡି ସୂଚନା ଦେଇଛନ୍ତି ।
ସୂଚନାନୁଯାୟୀ ସୁନ୍ଦରଗଡ଼ ଏନଟିପିସି ଦଲ୍ଲିପାଲି ପାୱାର ପ୍ଲାଣ୍ଟରୁ ନିର୍ଗତ ବିଷାକ୍ତ ପାଉଁଶକୁ ଶହ ଶହ ସଂଖ୍ୟାରେ ବଡ଼ବଡ଼ ହାଇୱା ଗାଡ଼ିରେ ପ୍ରତ୍ୟେକ ଦିନ ଛତିଶଗଡକୁ ପରିବହନ ହେଉଛି । ଉକ୍ତ ଭାରିଯାନ ମାନଙ୍କରେ ଓଭର ଲୋଡିଂ ଅସୁରକ୍ଷିତ ଭାବେ ପରିବହନ ହେଉଥିବା ଯୋଗୁଁ ରାସ୍ତା ସାରା ପାଉଁଶ ପଡୁଛି । ଫଳରେ ରାଜପଥରେ ଯାତାୟାତ ବେଳେ ଜନ ସାଧାରଣ ନାହିଁ ନ ଥିବା ଅସୁବିଧା ଭୋଗ କରିବା ସହିତ ଦୁର୍ଘଟଣାର ଶିକାର ହୋଇ ଅନେକ ହସଖୁସିର ପରିବାର ନିମିଷକ ମାତ୍ରେ ଛାରଖାର ହୋଇ ଯାଉଛି । ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଆକ୍ରୋସ ଦିନକୁ ଦିନ ବୃଦ୍ଧି ପାଇବାରେ ଲାଗିଛି ଏବଂ ଏହାର ପ୍ରତିଫଳନ ମଧ୍ୟ ଆଜି ହିଁ ଦେଖିବାକୁ ମିଳିଥିଲା । ଆଜି ସକାଳେ ଏନଏଚ ୪୯ ଗୋବିନ୍ଦପୁର ଟୋଲ ଗେଟ ନିକଟରେ ୭ ଟି ଓଭର ଲୋଡିଂ ପାଉଁଶ ବୋଝେଇ ଭାରିଯାନ ଗୁଡିକୁ ସ୍ଥାନୀୟ ଯୁବକ ମାନେ ଅଟକ ରଖି ଜିଲ୍ଲା ପରିବହନ ବିଭାଗକୁ ଖବର ଦେଇଥିଲେ । ଜିଲ୍ଲା ଆଞ୍ଚଳିକ ପରିବହନ ଅଧିକାରୀ ଦୀନବନ୍ଧୁ ଶୁଣ୍ଡି ବିଭାଗୀୟ କର୍ମଚାରୀଙ୍କ ସହ ଘଟଣା ସ୍ଥଳରେ ପହଞ୍ଚି ଉକ୍ତ ଭାରିଯାନ ମାନଙ୍କ କାଗଜପତ୍ର ଯାଞ୍ଚ କରିଥିଲେ । କିନ୍ତୁ ବହୁତ ପରିତାପର ବିଷୟ ଯେ ଗୋଟିଏ ହେଲେ ଗାଡ଼ିରେ ଓଜନ ସ୍ଲିପ ନ ଥିବା ଜଣା ପଡିଥିଲା । ଏହା ପୂର୍ବରୁ ମଧ୍ୟ ପରିବହନ ବିଭାଗ ପକ୍ଷରୁ ଏ ସମ୍ପର୍କରେ ଏନଟିପିସି ଦଲ୍ଲିପାଲି ପ୍ଲାଣ୍ଟ କର୍ତ୍ତୃପକ୍ଷଙ୍କୁ ଅନେକ ଥର ତାଗିଦ କରା ଯାଇଥିବା ସତ୍ବେ ପୁନର୍ବାର ବିନା ଓଜନରେ କିଭଳି ଭାବେ ପାଉଁଶ ଗାଡି ଗୁଡିକୁ ଯିବାପାଇଁ ଅନୁମତି ଦେଉଛନ୍ତି ତାହା ତଦନ୍ତ ସାପେକ୍ଷ ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି । ଜିଲ୍ଲା ପ୍ରଶାସନ ପକ୍ଷରୁ ଯଦି ଓଭର ଲୋଡିଂ ପରିବହନ ଉପରେ ରୋକ ଲଗା ନ ଯାଏ ତାହେଲେ ଆଗାମୀ ଦିନରେ ଅଞ୍ଚଳବାସୀ ରାଜରାସ୍ତାକୁ ଓହ୍ଲାଇ ପାଇଁ ବାଧ୍ୟ ହେବେ ବୋଲି ଚେତାବନୀ ଦେବା ସହ ଯଥା ସମ୍ଭବ ଗୋବିନ୍ଦପୁର ଟୋଲଗେଟ ଠାରେ ଏକ ୱେ ବ୍ରିଜ ସ୍ଥାପନ ନିମନ୍ତେ ମଧ୍ୟ ଦାବି କରିଛନ୍ତି ।