ସୌମିତ୍ରି ମେହେର

28/12/2024 at 2:47 PM

ଉଲୁଣ୍ଡା : (ସୌମିତ୍ରି ମେହେର) ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଲକ ତଥା ବୀରମହାରାଜପୁର ଥାନା ହିକୁଡି ପୁଲିସ ଫାଣ୍ଡି ଅନ୍ତର୍ଗତ ପଲାସ ଛକ ନିକଟରେ ଗତକାଲି ବିଳମ୍ବିତ ରାତି କାର ଓ ବାଇକ ମୁହାଁମୁହିଁ ଧକ୍କା ହୋଇଥିବା ବେଳେ ଜଣେ ପ୍ରାଣ ହରାଇଛନ୍ତି ଏବଂ ଆଉ ଜଣେ ଗୁରୁତର ଆହତ ଥିବା ଜଣାପଡିଛି । ଦୁର୍ଘଟଣା ପରେ କାର ଚାଳକ ଘଟଣାସ୍ଥଳରୁ ଫେରାର ହୋଇଯାଇଛି । ସୂଚନା ଅନୁଯାୟୀ ବୌଦ୍ଧ ଜିଲ୍ଲା କାକୁଡିଚିରା ଗ୍ରାମର ଗୋପିନାଥ ଦଲେଇ ଏବଂ ରବୀନ୍ଦ୍ର ଦଲେଇ ଏକ ବାଇକ ରେ ସୋନପୁର ପଟକୁ ଯାଉଥିବା ବେଳେ ବିପରୀତ ଦିଗରୁ ଦୃତଗତୀରେ ଆସୁଥିବା ଏକ କାର ଭାରସାମ୍ୟ ହରାଇ ବାଇକକୁ ଧକ୍କା ଦେଇଥିଲା । ଦୁର୍ଘଟଣାରେ ଉଭୟ କାର ଏବଂ ବାଇକ ରାସ୍ତା ପାଶ୍ୱର୍ ଏକ ଜମି ଭିତରକୁ ପଶି ଯାଇଥିଲା । ଦୁର୍ଘଟଣା ଗ୍ରସ୍ତଙ୍କୁ ସ୍ଥାନୀୟ ଲୋକ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିବା ବେଳେ ଗୋପୀନାଥଙ୍କୁ ଡାକ୍ତର ମୃତ ଘୋଷଣା କରିଥିଲେ । ରବୀନ୍ଦ୍ରଙ୍କ ଉଚ୍ଚତର ଚିକିତ୍ସା ପାଇଁ ବୁର୍ଲା ସ୍ଥାନାନ୍ତର କରାଯାଇଥିଲା । ଏନେଇ ମୃତକଙ୍କ ପରିବାର ହିକୁଡି ଫାଣ୍ଡିରେ ଅଭିଯୋଗ କରିବା ପରେ ପୋଲିସ ଏକ ମାମଲା ରୁଜୁ କରି ତଦନ୍ତ କରୁଥିବା ଜଣାପଡିଛି । ମୃତକ ଗୋପିନାଥ ଙ୍କ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।