ଓଡ଼ିଶା ଡଟ୍ ନ୍ୟୁଜ୍1/01/2025 at 2:47 PM
କେନ୍ଦ୍ରାପଡ଼ା: ନୂଆବର୍ଷ ଭୋଜି ପାଇଁ ଆସି ଘରୁ ଡାକି ନେଲେ । ଆଜି ସକାଳୁ ପୋଖରୀରୁ ମିଳିଲା ମୃତଦେହ । ଏପରି ଘଟଣା ଘଟିଛି କେନ୍ଦ୍ରାପଡ଼ା ଜିଲ୍ଲା ସଦର ଥାନା ଅନ୍ତର୍ଗତ ବିରସୋତୀ ଗାଁରେ । ମୃତକ ହେଲେ କାହ୍ନୁଚରଣ ନାଥ । ତାଙ୍କୁ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି ।
ମୃତକଙ୍କ ପରିବାର ପକ୍ଷରୁ ମିଳିଥିବା ସୂଚନା ଅନୁଯାୟୀ, ଗତକାଲି ସନ୍ଧ୍ୟା ସମୟରେ କାହ୍ନୁ ଚିକେନ ଧରି ଘରକୁ ଫେରିଥିଲେ । ନିଜେ ରୋଷେଇ କରି ପରିବାର ଲୋକଙ୍କୁ ଖାଇବାକୁ ଦେଇଥିଲେ । ଏହାପରେ ସମସ୍ତେ ଶୋଇ ପଡ଼ିଥିଲେ ।
ରାତି ପ୍ରାୟ ୧୧ଟା ପରେ ଭୋଜି ହେଉଛି କହି କିଛି ବନ୍ଧୁ ଘରୁ ଡାକି ନେଇଥିଲେ l ମାତ୍ର ବିଳମ୍ବିତ ରାତି ପର୍ଯ୍ୟନ୍ତ କାହ୍ନୁ ଆଉ ଘରକୁ ଫେରି ନଥିଲେ । ପରିବାର ଲୋକେ ଫୋନ୍ ବାରମ୍ବାର କରିଥିବା ବେଳେ ସେ ଆଉ ଫୋନ୍ ଉଠାଇ ନଥିଲେ । ଏହାପରେ ଖୋଜାଖୋଜି କରିବାରୁ ତାଙ୍କ ଲୁଙ୍ଗି, ଗାମୁଛା ଓ ମୋବାଇଲ ଫୋନ୍ ପାଇଥିଲେ ବି କାହ୍ନୁଙ୍କ ସନ୍ଧାନ ପାଇ ନଥିଲେ ।
ଆଜି ସକାଳେ ବିରସୋତୀ ଗାଁରେ ଥିବା ପାଟ ପୋଖରୀରେ କାହ୍ନୁଙ୍କ ମୃତଦେହ ଭାସୁଥିବା ଅବସ୍ଥାରେ ପରିବାର ଲୋକେ ଦେଖିବାକୁ ପାଇଥିଲେ । ଖବର ପାଇ ପରିବାର ଲୋକେ ଓ ପୋଲିସ୍ ଘଟଣାସ୍ଥଳରେ ପହଞ୍ଚିଥିଲା । ପୋଲିସ୍ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ।
ଏହା ଏକ ହତ୍ୟା ଘଟଣା ଓ ଷଡଯନ୍ତ୍ର କରି ସ୍ୱାମୀଙ୍କୁ କେହି ମାରି ଦେଇଥିବା କାହ୍ନୁଙ୍କ ପତ୍ନୀ ଅଭିଯୋଗ କରିଛନ୍ତି । ତେବେ କିଏ ଓ କାହିଁକି କାହ୍ନୁକୁ ମାରିଛି ଓ ଏହା ପଛର ରହସ୍ୟ କ’ଣ ତାହାର ତଦନ୍ତ ଆରମ୍ଭ କରିଛି ପୋଲିସ୍ ।