ଓଡ଼ିଶା ଡଟ୍ ନ୍ୟୁଜ୍2/01/2025 at 11:39 AM
ବାଲେଶ୍ବର: ଗୁହାଳେ ଲାଗିଥିଲା ମଶାଧୂପ । କୌଣସି କାରଣରୁ ଏହା ଘରେ ବ୍ୟାପି ଯିବା ସହ ଗୁହାଳ ସମେତ ଅନ୍ୟ ଘରେ ଲାଗି ଯାଇଥିଲା ନିଆଁ । ଫଳରେ ନିଆଁରେ ପୋଡ଼ି ପାଉଁଶ ହୋଇଯାଇଛି ଲକ୍ଷାଧିକ ଟଙ୍କାର ସାମଗ୍ରୀ । ଘଟଣା ଘଟିଛି ବାଲେଶ୍ଵର ଜିଲ୍ଲା ସିମୁଳିଆ ଥାନା ବଙ୍ଗାଳପୁର ପଞ୍ଚାୟତ ଇଶାଣ ଗାଁରେ ।
ଗତକାଲି ବିଳମ୍ବିତ ରାତିରେ ଗାଁର ଧିରେନ ମଲ୍ଲିକଙ୍କ ଗୁହାଳେ ଲଗାଯାଇଥିବା ମଶାଧୂପରୁ ଘରେ ନିଆଁ ଲାଗିଯାଇଥିଲା l ବିଲ ମଝିରେ ଘର ଥିବାରୁ ଏକୁଟିଆ ନିଆଁକୁ ଆୟତ୍ତ କରିପାରି ନଥିଲେ l ପରେ ସେ ଗାଁ ଲୋକଙ୍କୁ ଡାକି ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ । ଏହାସହ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବାହିନୀ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଥିଲେ । ଅଗ୍ନିକାଣ୍ଡରେ ଏବେ ଅମଳ ହୋଇ ଘରେ ଥିବା ୧୦ କୁଇଣ୍ଟାଲ ଧାନ ସମେତ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଯାଇଛି ।