ମହେନ୍ଦ୍ର କୁମାର ସାଇ22/01/2025 at 7:27 PM
ଝାରସୁଗୁଡା ୨୨/୧ (ଓଡ଼ିଶା ନ୍ୟୁଜ) ଭାରିଯାନ ଡ୍ରାଇଭର ମାନଙ୍କ ଦ୍ରୁତଗତି ଓ ବେପରୁଆ ଗାଡ଼ି ଚାଳନା ଯୋଗୁଁ ୪୯ ନଂ ଜାତୀୟ ରାଜପଥ ପାଲଟିଛି ରକ୍ତମୁଖା । ମଙ୍ଗଳବାର ଦିନ ଟ୍ରଲର ଚାପାରେ ପୁଣି ଜଣେ ବାଇକ ଚାଳକଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ମୃତକ ଜଣକ ସୁରଜ ଗଙ୍ଗାଧର (୪୦) ସୁନ୍ଦରଗଡ଼ ଜିଲ୍ଲା ରାଜଗାଙ୍ଗପୁର ଥାନା ଅନ୍ତର୍ଗତ ଫାକ୍ରପଡ଼ାର ମୂଳ ବାସିନ୍ଦା ହୋଇଥିବା ବେଳେ ଗୁରୁତର ଆହତ ଟିଙ୍କୁ ଙ୍କ ପରିଚୟ ଜଣା ପଡ଼ିନାହିଁ । ଖବର ପାଇ ରେଙ୍ଗାଲି ପୁଲିସ ଦୁର୍ଘଟଣା ସ୍ଥଳରେ ପହଞ୍ଚି ଶବକୁ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରା ଯାଇଥିବା ରେଙ୍ଗାଲି ଥାନା ଇନଚାର୍ଜ ସମରେନ୍ଦ୍ର ନାୟକ ସୂଚନା ଦେଇଛନ୍ତି ।
ମୃତ ସୁରଜଙ୍କ ସମ୍ପର୍କୀୟ ସୁରେନ୍ଦ୍ର ତାଣ୍ଡିଙ୍କ ଲିଖିତ ଅଭିଯୋଗ ଅନୁସାରେ ଥାନାରେ ଏକ ମାମଲା ରୁଜୁ କରି ଦୁର୍ଘଟଣା ଘଟାଇଥିବା ଟ୍ରଲର ଓ ବାଇକକୁ ଜବତ କରିବା ସହିତ ଅଭିଯୁକ୍ତ ଟ୍ରଲର ଡ୍ରାଇଭରକୁ ଗିରଫ କରିଥିଲେ । ଝାଡ଼ଖଣ୍ଡ ରାଙ୍କା ଥାନା ଅଞ୍ଚଳର ବାସିନ୍ଦା ଉକ୍ତ ଟ୍ରଲର ଡ୍ରାଇଭର ତନବୀର ଅଂସାରି(୨୫)କୁ ଆଜି କୋର୍ଟ ଚାଲାଣ କରା ଯାଇଥିବା ରେଙ୍ଗାଲି ଥାନା ଇନଚାର୍ଜ ଶ୍ରୀ ନାୟକ ସୂଚନା ଦେଇଛନ୍ତି ।
ପୁଲିସର ତଥ୍ୟ ଅନୁଯାୟୀ ଛତିଶଗଡ଼ ରାୟଗଡ଼ ଜିଲ୍ଲା ଝଲମଲା ଗାଁରେ ଥିବା ଏକ ଇଟା ଭାଟିରେ ମୃତ ସୁରଜ କାମ କରୁଥିଲେ । ମଙ୍ଗଳବାର ସକାଳ ପ୍ରାୟ ୧୦ ଟା ସମୟରେ ସିଜି-୧୩-ସି-୧୧୧୮ ନମ୍ବର ବିଶିଷ୍ଟ ବାଇକରେ ସୁରଜ ଏବଂ ଟିଙ୍କୁ କନକତୋରାକୁ କୌଣସି କାମରେ ଆସୁଥିଲେ । ଦୁର୍ଭାଗ୍ୟ ବଶତଃ ଠିକ ଏହି ସମୟରେ ଝାରସୁଗୁଡା ପଟୁ ଛତିଶଗଡ଼ ଅଭିମୁଖେ ଦ୍ରୁତଗତିରେ ଯାଉଥିବା ସିଜି-୧୩-ଏଜେଡ଼-୧୦୩୫ ଟ୍ରଲରଟି କନକତୋରା ଛକ ଅନତି ଦୂରରେ ଥିବା ଅଜୁ ଢ଼ାବା ନିକଟରେ ବାଇକକୁ ଧକ୍କା ମାରିଥିଲା । ଫଳରେ ସୁରଜ ରାଜରାସ୍ତା ଉପରେ ଛିଟିକି ପଡିବାରୁ ଟ୍ରଲର ଚକ ତାଙ୍କ ମୁଣ୍ଡ ଉପରେ ଚଢ଼ି ଯିବା ଯୋଗୁଁ ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିବା ବେଳେ ବାଇକ ପଛରେ ବସିଥିବା ଟିଙ୍କୁ ଗୁରୁତର ଆହତ ହୋଇଥିଲେ ।
ଝାରସୁଗୁଡ଼ା କନକତୋରା ୪୯ ନଂ ରାଜପଥ ଦେଇ ଶହ ଶହ ସଂଖ୍ୟକ ଭାଇଯାନ ଦ୍ୱାରା ବିଭିନ୍ନ ଶିଳ୍ପସଂସ୍ଥା ମାନଙ୍କୁ ଦିନରାତି କଞ୍ଚାମାଲ ପରିବହନ ହେଉଛି । ହେଲେ ରାଜପଥରେ ଯାତାୟାତ ସମୟରେ ଭାରିଯାନ ଡ୍ରାଇଭର ମାନଙ୍କ ବେପରୁଆ ଦ୍ରୁତଗତିରେ ଗାଡ଼ି ଚାଳନା ଯୋଗୁଁ ଦୁର୍ଘଟଣା ମାନ ଘଟୁଛି ଏବଂ ଅନେକ ନିରୀହ ଲୋକଙ୍କ ଧନଜୀବନ ଅକାଳରେ ଚାଲି ଯାଇ ନିମିଷକ ମାତ୍ରେ ସେମାନଙ୍କ ହସଖୁସିର ପରିବାର ଉଜୁଡ଼ି ଯାଉଛି ।
ପ୍ରକାଶ ଥାଉକି ଏନଏଚ ୪୯ ରେ ପ୍ରାୟ ପ୍ରତ୍ୟେକ ଦିନ ଏଭଳି ଦୁର୍ଘଟଣା ଘଟୁଥିବା ସତ୍ତ୍ୱେ ଜିଲ୍ଲା ଆଞ୍ଚଳିକ ପରିବହନ ବିଭାଗ କିମ୍ବା ଜିଲ୍ଲା ପ୍ରଶାସନ ପକ୍ଷରୁ ଦ୍ରୁତଗତିରେ ଚାଳନା କରୁଥିବା ଡ୍ରାଇଭର ମାନଙ୍କ ବିରୁଦ୍ଧରେ କିମ୍ବା ଭାରିଯାନ ପ୍ରତି ସେଭଳି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ଯାଉନାହିଁ । ଯାହା ଫଳରେ ଡ୍ରାଇଭର ମାନେ ନିର୍ଭୟରେ ବେପରୁଆ ଭାବେ ଗାଡ଼ି ଚାଳନା କରୁଥିବା ଅଭିଯୋଗ ହେଉଛି । ତେଣୁ ଜନ ସାଧାରଣଙ୍କ ସୁରକ୍ଷାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ଏଥିପ୍ରତି ରୋକ ଲଗାଇବା ପାଇଁ ଅଞ୍ଚଳବାସୀ ଦାବି କରୁଛନ୍ତି ।