ଓଡ଼ିଶା ଡଟ୍ ନ୍ୟୁଜ୍

30/01/2025 at 12:48 PM

ପିପିଲି: ପିପିଲି ବଜାର ରାସ୍ତା ପରିବର୍ତ୍ତେ ବାଇପାସ୍ ଦେଇ ପଳାଉଛି ବସ୍ । ଯାହାକୁ ନେଇ ଭୁବନେଶ୍ୱର-ପୁରୀ ୩୧୬ ନମ୍ବର ଜାତୀୟ ରାଜପଥ ନୂଆ ଶାସନ ଛକରେ ରାସ୍ତା ଅବରୋଧ କରିଛନ୍ତି ସ୍ଥାନୀୟ ଲୋକେ । ସେମାନଙ୍କ ଦାବି ବାଇପାସ ନୁହେଁ ପିପିଲି ବଜାର ଦେଇ ବସ୍ ଚଳାଚଳ କରୁ । ରାସ୍ତାରୋକ ଫଳରେ ଶତାଧିକ ଗାଡ଼ି ଅଟକି ରହିଛି ।

ସୂଚନାଯୋଗ୍ୟ, ବାରମ୍ବାର ଦାବି ପରେ ଗତ କିଛିଦିନ ହେବ ପିପିଲି ବଜାର ଦେଇ ବସ ଯାଆସ କରିବାକୁ ମାନବାଧିକାର କମିଶନ ନିର୍ଦ୍ଦେଶ ଦେଇଥିଲେ । ହେଲେ ପୂର୍ବ ପରି ବହୁ ବସ୍ ବାଇପାସ୍ ଦେଇ ପୁରୀ ଯାତାୟାତ କରୁଛି । ଏହାର ପ୍ରତିବାଦରେ ଆଜି ସକାଳୁ ସ୍ଥାନୀୟ ଜନସାଧାରଣ ରାସ୍ତା ଅବରୋଧ କରିଥିବା ବେଳେ ପିପିଲି ପୋଲିସ ଘଟଣାସ୍ଥଳରେ ପହଞ୍ଚି ବୁଝାସୁଝା କରିବା ପରେ ରାସ୍ତା ଅବରୋଧ ହଟିଛି ।

ସୂଚନାଯୋଗ୍ୟ, ପିପିଲି ଚାନ୍ଦୁଆ ବିଶ୍ବ ପ୍ରସିଦ୍ଧ । ପୁରୀକୁ ପ୍ରତିଦିନ ଲକ୍ଷ ଲକ୍ଷ ଭକ୍ତ ଆସୁଥିବା ବେଳେ ପିପିଲି ଦେଇ ସେମାନେ ଯାତାୟାତ କରିଥାନ୍ତି । ଏହାଦ୍ବାର ଚାନ୍ଦୁଆ ବେପାର ଭଲ ହେବା ସହ ଲୋକଙ୍କୁ ରୋଜଗାର ବି ମିଳୁଥିଲା । ଆଉ ବସ୍ ବାଇପାସ ଦେଇ ପଳାଇବା ଦ୍ବାରା ପିପିଲିରେ ଥିବା ଯାତ୍ରୀମାନେ ଗାଡ଼ି ଧରିବାରେ ସମସ୍ୟାରେ ପଡୁଛନ୍ତି । ଏମିତି ସ୍ଥିତିରେ ସ୍ଥାନୀୟ ଲୋକେ ବଜାର ରାସ୍ତାରେ ବସ୍ ଚଳାଚଳ କରିବାକୁ ଦାବି କରିଛନ୍ତି । ଏହାଦ୍ବାରା ଯାତ୍ରୀ ସୁବିଧା ପାଇବା ସହ ଚାନ୍ଦୁଆ ବେପାର ବି ହେବ ଓ ଏହା ବିଶ୍ବ ଦରବାରରେ ଆହୁରି ଆଦୃତ ହେବ ବୋଲି କୁହାଯାଉଛି ।