ଓଡ଼ିଶା ଡଟ୍ ନ୍ୟୁଜ୍

7/03/2025 at 10:15 AM

ଭୁବନେଶ୍ବର: ଆଜିଠାରୁ ଆରମ୍ଭ ହେଉଛି ବିଧାନସଭା ବଜେଟ ଅଧିବେଶନର ଦ୍ବିତୀୟ ପର୍ଯ୍ୟାୟ । ଏପ୍ରିଲ ୫ ତାରିଖ ପର୍ଯ୍ୟନ୍ତ ଚାଲିବ ଅଧିବେଶନ । ଏହି ପର୍ଯ୍ୟାୟରେ ଖର୍ଚ୍ଚ ଦାବି ନେଇ ଆଲୋଚନା କରାଯିବ । ଏହାସହ ବ୍ୟୟ ମଞ୍ଜୁରୀ ବିଧେୟକ ପାରିତ ହେବାର କାର୍ଯ୍ୟକ୍ରମ ରହିଛି । ଆଜି ବିଭିନ୍ନ ବିଭାଗୀୟ ଷ୍ଟାଣ୍ଡିଂ କମିଟିର ରିପୋର୍ଟ ଉପସ୍ଥାପନ ହୋଇପାରେ । ମାର୍ଚ୍ଚ ୧୦ରୁ ୨୮ ପର୍ଯ୍ୟନ୍ତ ବଜେଟ୍ ଉପରେ ଆଲୋଚନା ହେବ । ତେବେ ପ୍ରଥମ ପର୍ଯ୍ୟାୟରେ ୨୫ କାର୍ଯ୍ୟ ଦିବସରୁ ୨୪ କାର୍ଯ୍ୟ ଦିବସରେ ବିରୋଧୀ ଦଳ ନେତା ତଥା ବିଜେଡି ମୁଖିଆ ଓ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଚୌକି ଫାଙ୍କା ପଡ଼ିଥିଲା । ଏବେ ପ୍ରଶ୍ନ ଉଠୁଛି ଦ୍ବିତୀୟ ପର୍ଯ୍ୟାୟରେ ନବୀନଙ୍କ ଚୌକି କେତେଦିନ ପୂରଣ ହେବ ।

ଅଧିବେଶନର ପ୍ରଥମ ପର୍ଯ୍ୟାୟ ଫେବ୍ରୁଆରୀ ୧୩ରେ ଆରମ୍ଭ ହୋଇଥିଲା । ଫେବ୍ରୁଆରୀ ୧୭ରେ ମୁଖ୍ୟମନ୍ତ୍ରୀ ମୋହନ ମାଝୀ ରାଜ୍ୟ ବଜେଟ୍ ଉପସ୍ଥାପନ କରିଥିଲେ । ୨୦୨୫-୨୬ ଆର୍ଥିକ ବର୍ଷ ପାଇଁ ୨ ଲକ୍ଷ ୯୦ ହଜାର କୋଟି ଟଙ୍କାର ବଜେଟ ଉପସ୍ଥାପନ କରିଥିଲେ ମୁଖ୍ୟମନ୍ତ୍ରୀ । ବିଧାନସଭା ବଜେଟ ଅଧିବେଶନର ପ୍ରଥମ ପର୍ଯ୍ୟାୟ ୨୧ ଫେବ୍ରୁଆରୀ ଯାଏଁ ଚାଲିଥିଲା ।

ତେବେ ବିଧାନସଭା ଅଧିବେଶନରେ ସରକାରଙ୍କ ଭୂମିକା ଠାରୁ ବିରୋଧୀଙ୍କ ଗୁରୁତ୍ବ ଅଧିକ । କାରଣ ଅଧିବେଶନରେ ସରକାରୀ କଳର କାର୍ଯ୍ୟକାରିତା ଓ ଲୋକଙ୍କ ସମସ୍ୟା ଉଠାଇଥାନ୍ତି ବିରୋଧୀ । ଯାହା ଲୋକଙ୍କ ସ୍ବର ହୋଇଥାଏ । ହେଲେ, ନବୀନ ଅଧିକାଂଶ ସମୟରେ ବିଧାନସଭାରେ ନୀରବ ରହୁଛନ୍ତି । ଏପରିକି ବହୁ ସମୟରେ ତାଙ୍କୁ ଦେଖିବାକୁ ବି ମିଳୁନି । ୧୭ ତମ ବିଧାନସଭା ପ୍ରଥମ ଅଧିବେଶନରେ ମୁଖ୍ୟମନ୍ତ୍ରୀ, ବିରୋଧୀ ଦଳ ନେତା ଓ ଉପନେତାଙ୍କ ଉପସ୍ଥିତି ନେଇ ସୂଚନା ଅଧିକାର କର୍ମୀ ମାଗିଥିବା ତଥ୍ୟ କହୁଛି ୨୫ଟି କାର୍ଯ୍ୟଦିବସରୁ ମୁଖ୍ୟମନ୍ତ୍ରୀ ମୋହନ ମାଝୀ ୨୪ଟି କାର୍ଯ୍ୟ ଦିବସରେ ଉପସ୍ଥିତ ଥିଲେ । ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ ୬ ଦିନ ଉପସ୍ଥିତ ଥିଲେ । ହେଲେ ବିରୋଧୀ ଦଳ ନେତା ନବୀନ ପଟ୍ଟନାୟକ ମାତ୍ର ଗୋଟିଏ ଦିନ ଅଧିବେଶନକୁ ଆସିଥିଲେ ।

ବିଜେଡି ଓଡ଼ିଶାବାସୀଙ୍କ ସ୍ବର କହି ଚିତ୍କାର କରୁଥିବା ଦଳର ମୁଖିଆ ତଥା ବିରୋଧୀ ଦଳ ନେତାଙ୍କ ଚୌକି ଫାଙ୍କା ପଡ଼ିବା ପ୍ରାଶ୍ନବାଚୀ ସୃଷ୍ଟି କରୁଛି । ବିଜେଡି ଏନେଇ ମୁହଁ ଖୋଲି ନଥିବା ବେଳେ ନିୟମିତ ବିଧାନସଭା ଆସିବାକୁ ନବୀନ ପଟ୍ଟନାୟକଙ୍କୁ ନିବେଦନ କରିଛନ୍ତି ବିଜେପି ବିଧାୟକ ବାବୁ ସିଂ । ଶୁକ୍ରବାରଠାରୁ ଓଡିଶା ବିଧାନସଭାର ୨ୟ ପର୍ଯ୍ୟାୟ ବଜେଟ ଅଧିବେଶନର ଆରମ୍ଭ ହେବାକୁ ଯାଉଛି । ଏହି ଅଧିବେଶନରେ ଶାସକ ଦଳକୁ ଘେରିବା ପାଇଁ ବିରୋଧୀଙ୍କ ପାଖରେ ଅନେକ ପ୍ରସଙ୍ଗ ରହିଛି । ତେବେ ନବୀନ ପଟ୍ଟନାୟକ ଉପସ୍ଥିତ ରହିବେ ନା ପୂର୍ବ ଭଳି ଚୌକି ପାଙ୍କା ପଡିବ ତା ଉପରେ ରହିଛି ସମସ୍ତଙ୍କର ନଜର ।