ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ14/04/2025 at 11:25 AM
କାଠମାଣ୍ଡୁ: ହନୁମାନ ଜୟନ୍ତୀ ଅବସରରେ କେବଳ ଭାରତରେ ନୁହେଁ ନେପାଳରେ ମଧ୍ୟ ହିଂସା ଦେଖାଦେଇଥିଲା। ପରିସ୍ଥିତି ଏପରି ହେଲା ଯେ ପ୍ରଶାସନକୁ ନେପାଳର ବୀରଗଞ୍ଜ ବଜାରରେ କର୍ଫ୍ୟୁ ଲାଗୁ କରିବାକୁ ପଡିଥିଲା। କୁହାଯାଉଛି ଯେ ନେପାଳର ପାରସା ଜିଲ୍ଲାର ବୀରଗଞ୍ଜ ପୌରପାଳିକାରେ ହନୁମାନ ଜୟନ୍ତୀ ଅବସରରେ ଆୟୋଜିତ ଶୋଭା ଯାତ୍ରା ସମୟରେ ହିଂସାତ୍ମକ ସଂଘର୍ଷ ଘଟିଥିଲା। ଏହା ପରେ ଶନିବାର କର୍ଫ୍ୟୁ ଜାରି କରାଯାଇଥିଲା।
କାଠମାଣ୍ଡୁ ପୋଷ୍ଟ ଅନୁଯାୟୀ, ଏଥିରେ ଅତି କମରେ ୪୦ ଜଣଙ୍କୁ ଗିରଫ କରାଯାଇଛି। ଧାର୍ମିକ କାର୍ଯ୍ୟକ୍ରମ ପାଇଁ ଏକତ୍ରିତ ହୋଇଥିବା ଲୋକଙ୍କ ଉପରେ ପଥର ମାଡ଼ ହୋଇଥିବା ଜଣାପଡ଼ିଛି, ଯାହା ଫଳରେ ଗୋଷ୍ଠୀ ସଂଘର୍ଷ ହୋଇଥିଲା। ଏହି ଘଟଣାରେ ଅନେକ ପୋଲିସ କର୍ମଚାରୀ ଏବଂ ସ୍ଥାନୀୟ ବାସିନ୍ଦା ଆହତ ହୋଇଥିଲେ। ଜିଲ୍ଲା ପ୍ରଶାସନ କାର୍ଯ୍ୟାଳୟ ଭାରତୀୟ ସୀମାନ୍ତ ସହର ରକ୍ସୌଲ (ବିହାର) ନିକଟରେ ଅବସ୍ଥିତ ବୀରଗଞ୍ଜର ମଧ୍ୟଭାଗରେ ଶନିବାର ସନ୍ଧ୍ୟା ୬ଟା ୩୦ମି.ରୁ ରବିବାର ମଧ୍ୟାହ୍ନ ପର୍ଯ୍ୟନ୍ତ କର୍ଫ୍ୟୁ ଜାରି କରିଛି। ଜିଲ୍ଲା ପ୍ରଶାସନ କାର୍ଯ୍ୟାଳୟ ଏକ ନୋଟିସ ଜାରି କରି କହିଛି ଯେ, “ହନୁମାନ ଜୟନ୍ତୀ ପାଳନ ସମୟରେ ଉତ୍ତେଜନା ବୃଦ୍ଧି ପାଇବା ହେତୁ ‘ବୀରଗଞ୍ଜ ମହାନଗର’ର ୱାର୍ଡ ନମ୍ବର ୧୪, ୧୫, ୧୬ ଏବଂ ୨୫ରେ କର୍ଫ୍ୟୁ ଜାରି କରିବାକୁ ନିର୍ଦ୍ଦେଶ ଦିଆଯାଇଥିଲା।”