ସୀମାରେ ନିୟୋଜିତ ହେବ ଏଣ୍ଟି-ଡ୍ରୋନ୍ ସିଷ୍ଟମ
ନୂଆଦିଲ୍ଲୀ: ପାକିସ୍ତାନ ସହିତ ଆନ୍ତର୍ଜାତୀୟ ସୀମାରେ ଡ୍ରୋନ୍ ମାଧ୍ୟମରେ ଅସ୍ତ୍ରଶସ୍ତ୍ର ଏବଂ ଡ୍ରଗ୍ସର ଚୋରା ଚାଲାଣ ରୋକିବା ପାଇଁ ପଞ୍ଜାବ ସରକାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି।
ରାଜ୍ୟ ସରକାର ନିଷ୍ପତ୍ତି ନେଇଛନ୍ତି ଯେ ସୀମାନ୍ତ ଅଞ୍ଚଳରେ ଅତ୍ୟାଧୁନିକ ଡ୍ରୋନ୍ ପ୍ରତିରୋଧୀ ପ୍ରଣାଳୀ ନିୟୋଜିତ କରାଯିବ। ଏହି ସିଷ୍ଟମ ଅନୁପ୍ରବେଶକାରୀ ପାକିସ୍ତାନୀ ଡ୍ରୋନଗୁଡ଼ିକୁ ତୁରନ୍ତ ଟ୍ରାକ ଏବଂ ନଷ୍ଟ କରିପାରିବ। ଯାହା ଦ୍ଵାରା ଚୋରା ଚାଲାଣ ଏବଂ ଆତଙ୍କବାଦୀ ଯୋଜନାକୁ ରୋକାଯାଇପାରିବ। ଗତ କିଛି ବର୍ଷ ମଧ୍ୟରେ ପଞ୍ଜାବ ସଂଲଗ୍ନ ଭାରତ-ପାକ୍ ସୀମାରେ ଡ୍ରୋନ୍ ମାଧ୍ୟମରେ ଅସ୍ତ୍ରଶସ୍ତ୍ର ଗୁଳିଗୋଳା ଏବଂ ଡ୍ରଗ୍ସ ଚୋରା ଚାଲାଣ ବୃଦ୍ଧି ପାଇଛି।
ଗୁଇନ୍ଦା ସଂସ୍ଥାଗୁଡ଼ିକର ରିପୋର୍ଟ ଅନୁଯାୟୀ, ପାକିସ୍ତାନ ସମର୍ଥିତ ଚୋରା ଚାଲାଣକାରୀ ଏବଂ ଆତଙ୍କବାଦୀ ସଂଗଠନଗୁଡ଼ିକ ଡ୍ରୋନ୍ ବ୍ୟବହାର କରି ପଞ୍ଜାବରେ ଅସ୍ଥିରତା ସୃଷ୍ଟି କରିବାକୁ ଚେଷ୍ଟା କରୁଛନ୍ତି। ଏହି ଡ୍ରୋନଗୁଡ଼ିକର ଉଚ୍ଚତା କମ୍ ଏବଂ ଆକାର ଛୋଟ ହୋଇଥିବାରୁ ସୁରକ୍ଷା ଏଜେନ୍ସିଗୁଡ଼ିକ ପାଇଁ ସେଗୁଡ଼ିକୁ ଧରିବା ଏକ ଚ୍ୟାଲେଞ୍ଜ ହୋଇଛି। ପଞ୍ଜାବ ସରକାରଙ୍କ ଦ୍ୱାରା ନିୟୋଜିତ ହେବାକୁ ଥିବା ଡ୍ରୋନ୍ ପ୍ରତିରୋଧୀ ପ୍ରଣାଳୀ ଅତ୍ୟାଧୁନିକ ପ୍ରଯୁକ୍ତିବିଦ୍ୟାରେ ସଜ୍ଜିତ ହେବ। ଏହି ସିଷ୍ଟମ ରାଡାର, ରେଡିଓ ଫ୍ରିକ୍ୱେନ୍ସି ଜାମର୍ ଏବଂ ଲେଜର-ଆଧାରିତ ପ୍ରଯୁକ୍ତିବିଦ୍ୟା ବ୍ୟବହାର କରି ଡ୍ରୋନଗୁଡ଼ିକୁ ଟ୍ରାକ୍, ଜାମ୍ ଏବଂ ନଷ୍ଟ କରିପାରିବ।
ପଞ୍ଜାବ ପୋଲିସ ଏବଂ କେନ୍ଦ୍ରୀୟ ସୁରକ୍ଷା ଏଜେନ୍ସି ସହିତ ସମନ୍ୱୟ ରଖି ଏହି ସିଷ୍ଟମକୁ ଅମୃତସର, ତରନତାରନ, ଗୁରୁଦାସପୁର, ପଠାନକୋଟ ଏବଂ ଫିରୋଜପୁର ଭଳି ସୀମାନ୍ତ ଜିଲ୍ଲାଗୁଡ଼ିକରେ ପ୍ରାଥମିକତା ଭିତ୍ତିରେ ନିୟୋଜିତ କରାଯିବ ବୋଲି ଜଣାପଡ଼ିଛି।
