ପୁଞ୍ଚରେ ଗୁରୁଦ୍ୱାର ଉପରେ ଆକ୍ରମଣ, ନିନ୍ଦା କଲେ ମୁଖ୍ୟମନ୍ତ୍ରୀ
ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ସୀମାରେ ଉତ୍ତେଜନା ଜାରି ରହିଛି। ସୀମା ଆରପାରିରୁ ପାକିସ୍ତାନୀ ସେନା ଗୁଳିମାଡ଼ ଏବଂ ଗୁଳିବର୍ଷା କରୁଛି। ଏପରି ପରିସ୍ଥିତିରେ ଭାରତୀୟ ସେନା ମଧ୍ୟ ଏହାର ଉଚିତ ଜବାବ ଦେଉଛି।
ଗତ ବୁଧବାର ଦିନ ଭାରତ, ପାକିସ୍ତାନରେ ଲୁଚି ରହିଥିବା ଆତଙ୍କବାଦୀ ଶିବିର ଉପରେ କ୍ଷେପଣାସ୍ତ୍ର ଆକ୍ରମଣ କରିଥିଲା, ଯେଉଁଥିରେ ୧୦୦ରୁ ଅଧିକ ଆତଙ୍କବାଦୀ ନିହତ ହୋଇଥିଲେ। ଏହି ସମୟରେ ପୁଞ୍ଚର ଏକ ଗୁରୁଦ୍ୱାର ଉପରେ ପାକିସ୍ତାନ ଆକ୍ରମଣ କରିଥିଲା, ଯାହାକୁ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ ନିନ୍ଦା କରିଥିଲେ।
ଗୁରୁଦ୍ୱାର ଉପରେ ହୋଇଥିବା ଏହି ଆକ୍ରମଣରେ ୪ ଜଣ ଶିଖଙ୍କ ମୃତ୍ୟୁ ହୋଇଥିଲା। ବୁଧବାର ଦିନ ଜମ୍ମୁ ଓ କାଶ୍ମୀରର ନିୟନ୍ତ୍ରଣ ରେଖା ନିକଟସ୍ଥ ଗ୍ରାମଗୁଡ଼ିକ ଉପରେ ପାକିସ୍ତାନୀ ସୈନ୍ୟଙ୍କ ପ୍ରବଳ ଗୁଳିମାଡ଼ ଏବଂ ମୋର୍ଟାର ମାଡ଼ ଯୋଗୁଁ ଚାରି ଶିଶୁ ସମେତ ଅନ୍ୟୂନ ୧୨ ଜଣଙ୍କର ମୃତ୍ୟୁ ଘଟିଛି। ଏଥିରେ ୫୭ ଜଣ ଆହତ ହୋଇଛନ୍ତି।
ଉଲ୍ଲେଖଯୋଗ୍ୟ, ଦକ୍ଷିଣ କାଶ୍ମୀରର ପହଲଗାମରେ ୨୨ ଏପ୍ରିଲରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣଙ୍କର ମୃତ୍ୟୁ ହୋଇଥିଲା। ମୃତ୍ୟୁବରଣ କରିଥିବା ଲୋକଙ୍କ ମଧ୍ୟରୁ ଅଧିକାଂଶ ପର୍ଯ୍ୟଟକ ଥିଲେ। ଭାରତ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀର (ପିଓକେ)ରେ ୯ଟି ଆତଙ୍କବାଦୀ ଆଡ୍ଡା ଉପରେ କ୍ଷେପଣାସ୍ତ୍ର ଆକ୍ରମଣ କରିବା ପରେ ସୀମା ପାରରୁ ପ୍ରବଳ ଗୁଳିବର୍ଷା ପରେ ଏହି ଆକ୍ରମଣ ହୋଇଥିଲା। ଅଧିକାରୀ ମାନେ କହିଛନ୍ତି ଯେ ପାକିସ୍ତାନୀ ଗୁଳିମାଡ଼ରେ ପୁଞ୍ଚ ଜିଲ୍ଲା ସର୍ବାଧିକ କ୍ଷତି ସହିଛି ଏବଂ ମୃତ ସମସ୍ତ ସାଧାରଣ ନାଗରିକ ଏହି ଜିଲ୍ଲାର। ସେ କହିଛନ୍ତି ଯେ ୪୨ ଜଣ ଆହତ ହୋଇଛନ୍ତି ଏବଂ ସେମାନଙ୍କ ମଧ୍ୟରୁ କିଛି ଜଣଙ୍କ ଅବସ୍ଥା ଗୁରୁତର ରହିଛି।
