ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ13/05/2025 at 7:21 AM
ଅମୃତସର: ଗତ ସୋମବାର ରାତି ୯ଟାରେ ପଞ୍ଜାବର ଅମୃତସରରେ ହଠାତ୍ ବ୍ଲାକଆଉଟ୍ ହେବା ଯୋଗୁଁ ଫେରିଆସିଲା ଇଣ୍ଡିଗୋ ବିମାନ।
ଇନ୍ଦିରା ଗାନ୍ଧୀ ଅନ୍ତର୍ଜାତୀୟ (IGI) ବିମାନବନ୍ଦରରୁ ଅମୃତସର ଯାଉଥିବା ଇଣ୍ଡିଗୋ ଏୟାରଲାଇନ୍ସର ଏକ ବିମାନ (6E 2045)କୁ ମଝି ରାସ୍ତାରେ ପରିବର୍ତ୍ତନ କରି IGI ବିମାନବନ୍ଦରକୁ ଫେରାଇ ଅଣାଯାଇଥିଲା। ବିମାନଟି ରାତି ୮ଟା ୨୬ରେ ଦିଲ୍ଲୀରୁ ଉଡ଼ାଣ ଆରମ୍ଭ କରିଥିଲା ଏବଂ ରାତି ୯ଟା ୧୦ରେ ଅମୃତସରର ଶ୍ରୀ ଗୁରୁ ରାମଦାସ ଜୀ ଅନ୍ତର୍ଜାତୀୟ ବିମାନବନ୍ଦରରେ ଅବତରଣ କରିବାର ଥିଲା, କିନ୍ତୁ ସୁରକ୍ଷା କାରଣରୁ ଏହାକୁ ଦିଲ୍ଲୀ ଫେରାଇ ଅଣାଯାଇଥିଲା।
ସୂଚନା ଅନୁଯାୟୀ, ଭାରତ-ପାକିସ୍ତାନ ସୀମାରେ ଡ୍ରୋନ କାର୍ଯ୍ୟକଳାପ ଯୋଗୁଁ ପଞ୍ଜାବର ଅମୃତସର, ହୋସିଆରପୁର ଏବଂ ଜଳନ୍ଧର ଭଳି ଜିଲ୍ଲାରେ ବ୍ଲାକଆଉଟ୍ ଲାଗୁ କରାଯାଇଥିଲା। ଅମୃତସରରେ, ରାତି 8:51 ସମୟରେ, ଲୋକଙ୍କୁ ହଠାତ୍ ଲାଇଟ୍ ବନ୍ଦ କରିବାକୁ, ଝରକା ପାଖରୁ ଦୂରରେ ରହିବାକୁ ଏବଂ ନୀରବତା ବଜାୟ ରଖିବାକୁ କୁହାଯାଇଥିଲା। ଏହା ପରେ ଜଳନ୍ଧରରେ ବିଦ୍ୟୁତ୍ କାଟ କରାଯାଇଥିଲା।