ତୁର୍କୀ ସହ ସମ୍ପର୍କ କାଟୁଛନ୍ତି ଭାରତୀୟ ଶିକ୍ଷାନୁଷ୍ଠାନ

ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

ନୂଆଦିଲ୍ଲୀ: ଗତ କିଛି ଦିନ ଧରି ଭାରତରେ ତୁର୍କୀ ବିରୋଧରେ ପ୍ରତିବାଦ କରାଯାଉଛି। ଏଥିପାଇଁ ଭାରତରେ ତୁର୍କୀ ମାର୍ବଲ ଏବଂ ସେଓର ବାଣିଜ୍ୟ ବନ୍ଦ କରିବାକୁ ଘୋଷଣା କରାଯାଇଥିଲା। ଏବେ ଦେଶର ବଡ଼ ବଡ଼ ପ୍ରତିଷ୍ଠାନଗୁଡ଼ିକ ମଧ୍ୟ ତୁର୍କୀ ସହିତ ସେମାନଙ୍କର ବୁଝାମଣାପତ୍ରକୁ ସ୍ଥଗିତ ରଖିବା ନେଇ ଘୋଷଣା କରୁଛନ୍ତି। JNU, ଜାମିଆ ମିଲିଆ ଇସଲାମିଆ ଏବଂ IIT ରୁରକି ସମେତ ଅନେକ ଭାରତୀୟ ଶିକ୍ଷାନୁଷ୍ଠାନ ପୂର୍ବରୁ ଏହି ପଦକ୍ଷେପ ନେଇସାରିଛନ୍ତି।

ଏବେ ଏହି ସିରିଜରେ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଆଇଆଇଟି) ବମ୍ବେର ନାମ ମଧ୍ୟ ସାମିଲ ହୋଇଛି। ଆଇଆଇଟି ବମ୍ବେ X ରେ ପୋଷ୍ଟ କରି ଏମଓୟୁ ସ୍ଥଗିତ ରଖିବା ବିଷୟରେ ସୂଚନା ଦେଇଛି। ଏଥିରେ ଲେଖାଯାଇଥିଲା ଯେ ‘ତୁର୍କୀ ସହ ଜଡିତ ବର୍ତ୍ତମାନର ଭୂରାଜନୈତିକ ପରିସ୍ଥିତି ଯୋଗୁଁ ଆଇଆଇଟି ବମ୍ବେ ପରବର୍ତ୍ତୀ ସୂଚନା ପର୍ଯ୍ୟନ୍ତ ତୁର୍କୀ ବିଶ୍ୱବିଦ୍ୟାଳୟ ସହିତ ଏହାର ଚୁକ୍ତିନାମାକୁ ସ୍ଥଗିତ ରଖିବାକୁ ବିଚାର କରୁଛି।

ସୂଚନାଯୋଗ୍ୟ, ତୁର୍କୀ ଭାରତ ବିରୁଦ୍ଧରେ ପାକିସ୍ତାନକୁ ସମର୍ଥନ ଏବଂ ସାମରିକ ସହାୟତା ଦେଇଥିଲା। ସେବେଠାରୁ ତୁର୍କୀ ସହିତ ସମସ୍ତ ସମ୍ପର୍କ ଛିନ୍ନ କରିବାର ଦାବି ବଢ଼ିଥିଲା। ଏହାକୁ ଦୃଷ୍ଟିରେ ରଖି ତୁର୍କୀ ବିଶ୍ୱବିଦ୍ୟାଳୟ ସହିତ ଏହାର ଚୁକ୍ତିନାମାକୁ ସ୍ଥଗିତ ରଖିବା ପାଇଁ ନିଷ୍ପତ୍ତି ନିଆଯାଇଛି।

ତେବେ ଆଇଆଇଟି ବମ୍ବେ ପୂର୍ବରୁ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (JNU) ଏବଂ ଜାମିଆ ମିଲିଆ ଇସଲାମିଆ (JMI) ଭଳି ପ୍ରମୁଖ ପ୍ରତିଷ୍ଠାନଗୁଡ଼ିକ ତୁର୍କୀ ବିଶ୍ୱବିଦ୍ୟାଳୟ ସହିତ ସମ୍ପର୍କ ସ୍ଥଗିତ ରଖିଛନ୍ତି।