ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

23/05/2025 at 2:49 PM

ନୂଆଦିଲ୍ଲୀ: ୨୧ ମଇରେ ବଜ୍ରପାତ ଯୋଗୁଁ ଦିଲ୍ଲୀରୁ ଶ୍ରୀନଗର ଯାଉଥିବା ଏକ ଇଣ୍ଡିଗୋ ବିମାନ ଟର୍ବୁଲଂସ୍ ସମ୍ମୁଖୀନ ହୋଇଥିଲା। ଏହି ସମୟରେ ପାଇଲଟ ପାକିସ୍ତାନକୁ ତାର ଏୟାରସ୍ପେସ୍ ବ୍ୟବହାର କରିବାକୁ ଅନୁମତି ମାଗିଥିଲେ। କିନ୍ତୁ ପାକିସ୍ତାନ ମନା କରିଦେଇଥିଲା। ଯେତେବେଳେ ଇଣ୍ଡିଗୋ ବିମାନଟି ଅମୃତସର ଉପରେ ଅତିକ୍ରମ କରୁଥିଲା, ପାଇଲଟ୍ ସାମାନ୍ୟ ସମସ୍ୟା ଅନୁଭବ କରିଥିଲେ। ସେ ଲାହୋର ଏୟାର ଟ୍ରାଫିକ୍ କଣ୍ଟ୍ରୋଲ୍ (ATC) ସହିତ ଯୋଗାଯୋଗ କରିଥିଲେ ଏବଂ ଖରାପ ପାଗକୁ ଏଡାଇବା ପାଇଁ ପାକିସ୍ତାନୀ ଆକାଶ ସୀମାରେ ପ୍ରବେଶ କରିବାକୁ ଅନୁମତି ମାଗିଥିଲେ। ଲାହୋର ATC ପାଇଲଟଙ୍କୁ ସ୍ପଷ୍ଟ ଭାବରେ ମନା କରିଦେଇଥିଲା, ଯାହା ଫଳରେ ବିମାନକୁ ତାର ନିର୍ଦ୍ଧାରିତ ରୁଟରେ ଆଗକୁ ବଢ଼ିବାକୁ ପଡିଥିଲା।

ପରେ, ବିମାନଟି ପ୍ରବଳ ଟର୍ବୁଲଂସ୍ ସମ୍ମୁଖୀନ ହୋଇଥିଲା। ଫଳରେ ବିମାନଟି ଜୋରରେ ଥରିବାକୁ ଲାଗିଥିଲା। ବିମାନରେ ୨୨୭ ଜଣ ଲୋକ ଥିଲେ। ପ୍ରବଳ କମ୍ପନ ଯୋଗୁଁ ସମସ୍ତେ ଚିତ୍କାର କରିବାକୁ ଲାଗିଥିଲେ। ପାଇଲଟ୍ ଶ୍ରୀନଗର ATCକୁ ସୂଚନା ଦେଇଥିଲେ ଏବଂ ବିମାନର ଜରୁରୀକାଳୀନ ଅବତରଣ କରିଥିଲେ। ଅବତରଣ କରିବା ପରେ ଦେଖାଗଲା ଯେ ବିମାନର ସମ୍ମୁଖ ଭାଗ (ନାକ କୋନ୍) ଭାଙ୍ଗି ଯାଇଛି।

ବିମାନ ଭିତରର ଅନେକ ଭିଡିଓ ସୋସିଆଲ ମିଡିଆରେ ସେୟାର ହୋଇଛି, ଯେଉଁଥିରେ ଲୋକମାନେ ନିଜ ଜୀବନ ବଞ୍ଚାଇବା ପାଇଁ ପ୍ରାର୍ଥନା କରୁଥିବାର ଦେଖିବାକୁ ମିଳୁଛି। ପିଲାମାନଙ୍କ କାନ୍ଦର ଶବ୍ଦ ମଧ୍ୟ ଶୁଣିବାକୁ ମିଳିଥିଲା।

ତେବେ ସମ୍ପୂର୍ଣ୍ଣ ମାମଲାଟି ଡିଜିସିଏ ଦ୍ୱାରା ତଦନ୍ତ କରାଯାଉଛି।