ଦିଲଜିତଙ୍କ ସପକ୍ଷରେ ବାହାରିଲେ ଇମତିଆଜ୍ ଅଲି
ମୁମ୍ବାଇ: ନିକଟର ମୁକ୍ତିଲାଭ କରିଥିବା ଫିଲ୍ମ ‘ସର୍ଦ୍ଦାରଜୀ 3’ ଯୋଗୁଁ ବିବାଦରେ ଫସିଛନ୍ତି ଦିଲଜିତ। ଯେଉଁଥିରେ ପାକିସ୍ତାନୀ ଅଭିନେତ୍ରୀ ହାନିଆ ଆମିର ମଧ୍ୟ ଅଭିନୟ କରିଛନ୍ତି। ତାଙ୍କର ସଦ୍ୟତମ ଫିଲ୍ମ ହୁଏତ ଭାରତୀୟ ଥିଏଟରରେ ମୁକ୍ତିଲାଭ କରିନାହିଁ, କିନ୍ତୁ ଏହା ପାକିସ୍ତାନରେ ଚର୍ଚ୍ଚାରେ ରହିଛି। ଏହା ନେଇ ଅନଲାଇନରେ ଟ୍ରୋଲିଂର ସମ୍ମୁଖୀନ ହେଉଛନ୍ତି ସେ। ଏପରିକି ଲୋକମାନେ ତାଙ୍କୁ ‘ଦେଶଦ୍ରୋହୀ’ ବୋଲି କହୁଛନ୍ତି।
ଭାରତ-ପାକିସ୍ତାନ ଉତ୍ତେଜନାର ସମ୍ବେଦନଶୀଳତାକୁ ସମ୍ମାନ ନ ଦେବା ପାଇଁ ତାଙ୍କୁ ସମାଲୋଚନା କରୁଛନ୍ତି। ଏହି ସମାଲୋଚନା ମଧ୍ୟରେ ଚଳଚ୍ଚିତ୍ର ନିର୍ମାତା ଇମତିଆଜ୍ ଅଲି ଦିଲଜିତଙ୍କ ସମର୍ଥନରେ ଠିଆ ହୋଇଛନ୍ତି। ଏପରି ପରିସ୍ଥିତିରେ ପ୍ରସିଦ୍ଧ ନିର୍ଦ୍ଦେଶକ ଇମତିଆଜ୍ ଅଲି ତାଙ୍କ ସପକ୍ଷରେ ଏକ ବଡ଼ ବୟାନ ଦେଇଛନ୍ତି। ସ ତାଙ୍କୁ ଜଣେ ଦେଶପ୍ରେମୀ ବୋଲି ମଧ୍ୟ କହିଛନ୍ତି।
ଏକ ସାକ୍ଷାତକାରରେ ଅଲି ‘ଅମର ସିଂହ ଚମକିଲା’ ଷ୍ଟାର ଦିଲଜିତ୍ ଦୋସାଞ୍ଜଙ୍କ ପକ୍ଷରେ ବାହାରିଛନ୍ତି ଏବଂ ତାଙ୍କୁ ‘ମାଟିର ପୁଅ’ ବୋଲି କହିଛନ୍ତି। ସେ କହିଛନ୍ତି, ‘ମୁଁ ବିବାଦ ଉପରେ ଅଧିକ କିଛି କହିପାରିବି ନାହିଁ, ଯେହେତୁ ମୁଁ ଦିଲଜିତଙ୍କୁ ଜାଣେ, ମୁଁ କହିପାରିବି ଯେ ସେ ଦେଶପ୍ରେମରେ ପରିପୂର୍ଣ୍ଣ। ସେ ମାଟିର ପୁଅ। ଆପଣ ତାଙ୍କର ସମସ୍ତ କନସର୍ଟରେ ଦେଖିପାରିବେ, ସେ ଭାରତୀୟ ପତାକା ସହିତ ଦେଖାଯାଆନ୍ତି।”ଜବ୍ ୱି ମେଟ୍’ ନିର୍ଦ୍ଦେଶକ ଆହୁରି କହିଛନ୍ତି ଯେ ଦିଲଜିତ ଏପରି ଜଣେ ବ୍ୟକ୍ତି ନୁହଁନ୍ତି ଯିଏ ଧ୍ୟାନ ଆକର୍ଷଣ କରିବା ପାଇଁ ନକଲି କାମ କରିବେ। ଭାରତ ପ୍ରତି ତାଙ୍କର ପ୍ରେମର ପ୍ରଶଂସା କରି ଅଲି କହିଛନ୍ତି, ‘ସେ ଏପରି ବ୍ୟକ୍ତି ନୁହଁନ୍ତି ଯେ ନକଲି କାମ କରନ୍ତି। ସେ ନକଲି ଭାବରେ କିଛି କରନ୍ତି ନାହିଁ। କେହି ତାଙ୍କୁ ଏହା କରିବାକୁ କହି ନାହାଁନ୍ତି। ତାଙ୍କର ସମସ୍ତ କନସର୍ଟ ଶେଷରେ, ସେ ଭାରତୀୟ ପତାକା ସହିତ କୁହନ୍ତି, ମୁଁ ପଞ୍ଜାବରୁ। ସେ ଜଣେ ଭଲ ବ୍ୟକ୍ତି। ସେ ନକଲି ନୁହଁନ୍ତି।’
