ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ13/07/2025 at 9:56 AM
ଜେରୁଜେଲମ: ଇସ୍ରାଏଲୀ ସେନା ଗାଜାକୁ ଖାଦ୍ୟ ପାଇଁ ଯାଉଥିବା ପାଲେଷ୍ଟାଇନ ମାନଙ୍କ ଉପରେ ଗୁଳି ଚଳାଇଛନ୍ତି। ଏହି ଘଟଣାରେ ୨୪ ଜଣ ଲୋକ ପ୍ରାଣ ହରାଇଛନ୍ତି ଏବଂ ଡଜନରୁ ଅଧିକ ଆହତ ହୋଇଛନ୍ତି। ଏହି ଘଟଣା ରାଫା ସହରରେ ଘଟିଥିଲା ଏବଂ ଗୁଳିକାଣ୍ଡର ଶିକାର ହୋଇଥିବା ଲୋକମାନେ ଖାଦ୍ୟ ସାମଗ୍ରୀ ବଣ୍ଟନ କରୁଥିବା ଆମେରିକୀୟ ସଂଗଠନ GHFର କେନ୍ଦ୍ର ଆଡ଼କୁ ଯାଉଥିଲେ।
ତେବେ ଶୁକ୍ରବାର ଦିନ ହିଁ ଜାତିସଂଘ ରିପୋର୍ଟ କରିଥିଲା ଯେ ଗାଜାରେ ଖାଦ୍ୟ ସାମଗ୍ରୀ ପାଇଁ ଆସିଥିବା ଲୋକଙ୍କ ଉପରେ ଗୁଳିଚାଳନା ଘଟଣାରେ ୭୯୮ ଜଣ ମହିଳା, ପୁରୁଷ ଏବଂ ଶିଶୁ ପ୍ରାଣ ହରାଇଛନ୍ତି। ଏହା ବ୍ୟତୀତ ଶନିବାର ଗାଜାରେ ଇସ୍ରାଏଲୀ ସେନା ଦ୍ୱାରା ଅନ୍ୟ ଆକ୍ରମଣରେ ୨୮ ଜଣ ପ୍ରାଣ ହରାଇଛନ୍ତି। ଗାଜାରେ ଯୁଦ୍ଧବିରତି ପାଇଁ ପ୍ରୟାସ ମଧ୍ୟରେ ଇସ୍ରାଏଲୀ ସେନା ଦ୍ୱାରା ଆକ୍ରମଣ ଜାରି ରହିଛି।
ଶନିବାର ଏୟାର ଷ୍ଟ୍ରାଇକରେ ଚାରି ଜଣ ଶିଶୁ ସମେତ ୨୮ ଜଣ ପ୍ରାଣ ହରାଇଥିବା ଜଣାପଡ଼ିଛି। ଦେଇର ଅଲ-ବାଲାହ ସହରରେ ୧୩ ଜଣ ପ୍ରାଣ ହରାଇଥିବା ବେଳେ ଖାନ ୟୁନିସରେ ୧୫ ଜଣ ପ୍ରାଣ ହରାଇଛନ୍ତି। ଇସ୍ରାଏଲୀ ସେନା କହିଛି ଯେ ଦୁଇ ଦିନରେ ପ୍ରାୟ ୨୫୦ ଲକ୍ଷ୍ୟସ୍ଥଳକୁ ଟାର୍ଗେଟ କରିଛି। ହମାସ ଇସ୍ରାଏଲୀ ସେନା ଉପରେ ଆକ୍ରମଣ କରିବା ପାଇଁ ଏହି ଆଡ୍ଡାଗୁଡ଼ିକୁ ବ୍ୟବହାର କରିଥିଲା ଏବଂ ସେମାନଙ୍କ ମଧ୍ୟରୁ କିଛିରେ ବିଦ୍ରୋହୀ ଲୁଚି ରହିଥିଲେ।