ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

15/07/2025 at 12:59 PM

ନୂଆଦିଲ୍ଲୀ: ପ୍ରସିଦ୍ଧ ବୈଦ୍ୟୁତିକ କାର ନିର୍ମାତା ଟେସଲା ଆନୁଷ୍ଠାନିକ ଭାବରେ ଭାରତରେ ପ୍ରବେଶ କରିଛି। ମଙ୍ଗଳବାର ଦିନ ମୁମ୍ବାଇର ବିକେସିରେ ଟେସଲାର ପ୍ରଥମ ଶୋ’ରୁମ୍ ଲଞ୍ଚ ହୋଇଛି। ମୁମ୍ବାଇର ବାନ୍ଦ୍ରା କୁର୍ଲା କମ୍ପ୍ଲେକ୍ସର ମେକର ମ୍ୟାକ୍ସିଟି ମଲରେ ଟେସଲାର ଶୋ’ରୁମ୍ ଖୋଲାଯାଇଛି।

ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଟେସଲାର ଶୋ’ରୁମ୍ ଉଦଘାଟନ କରିଛନ୍ତି। ଏହି ସମୟରେ, ସେ ଦେଶରେ ଟେସଲାକୁ ସ୍ୱାଗତ କରିବା ସହ କହିଥିଲେ ଯେ ‘ଟେସଲା, ୱେଲକମ୍ ଟୁ ଇଣ୍ଡିଆ।’

ତଥାପି କେନ୍ଦ୍ର ଭାରୀ ଶିଳ୍ପ ମନ୍ତ୍ରୀ ଏଚ୍ ଡି କୁମାରସ୍ୱାମୀ ପୂର୍ବରୁ ସ୍ପଷ୍ଟ କରିସାରିଛନ୍ତି ଯେ ଟେସଲା ବର୍ତ୍ତମାନ ଭାରତରେ କାର ଉତ୍ପାଦନ କରିବ ନାହିଁ। ସେ କହିଛନ୍ତି ଯେ ‘ଟେସଲା ବର୍ତ୍ତମାନ ଭାରତରେ ଏହାର କାର ବିକ୍ରି କରିବାକୁ ଚାହୁଁଛି ଏବଂ ଏହା ବ୍ୟତୀତ ସେମାନଙ୍କର ଅନ୍ୟ କୌଣସି ଯୋଜନା ନାହିଁ।’ ଟେସଲା ଏପର୍ଯ୍ୟନ୍ତ ଏହାର ଯୋଜନା ବିଷୟରେ ନୀରବ ରହିଛି। ତେବେ ମିଡିଆ ରିପୋର୍ଟ ଅନୁଯାୟୀ ଟେସଲାର ମଡେଲ୍ ୱାଇ ଇଲେକ୍ଟ୍ରିକ୍ କାର ଭାରତରେ ୬୦ ଲକ୍ଷ ଟଙ୍କାରୁ ଆରମ୍ଭ ହେବ। ଯଦିଓ ଏହି ମଡେଲ୍ ୱାଇ କାରର ମୂଲ୍ୟ ଆମେରିକା ଏବଂ ଚୀନରେ କମ୍।

ସେହିପରି ଦ୍ୱିତୀୟ ଶୋ’ରୁମ୍ ଚଳିତ ମାସ ଶେଷରେ ନୂଆଦିଲ୍ଲୀରେ ଖୋଲିପାରେ। ଟେସଲାର ଭାରତରେ ପ୍ରବେଶ ଏପରି ଏକ ସମୟରେ ହେଉଛି ଯେତେବେଳେ ଟେସଲା ଏହାର ଦୁଇଟି ଗୁରୁତ୍ୱପୂର୍ଣ୍ଣ ବଜାର, ଆମେରିକା ଏବଂ ଚୀନରେ କଠିନ ଚ୍ୟାଲେଞ୍ଜର ସମ୍ମୁଖୀନ ହେଉଛି।