ଖୁବଶୀଘ୍ର ଡାକ ବିଭାଗରେ ବନ୍ଦ ହୋଇଯିବ ଏହି ସେବା
ନୂଆଦିଲ୍ଲୀ: ଭାରତୀୟ ଡାକ ବିଭାଗ ଏକ ବଡ଼ ଘୋଷଣା କରିଛି। ଯାହା ଅନୁଯାୟୀ ବିଭାଗ ରେଜିଷ୍ଟର୍ଡ ଡାକ ସେବାକୁ ବନ୍ଦ କରିବାକୁ ଯୋଜନା କରୁଛି। ଏହି ନିଷ୍ପତ୍ତି ସେପ୍ଟେମ୍ବର ୧, ୨୦୨୫ରୁ କାର୍ଯ୍ୟକାରୀ ହେବ। ଭାରତୀୟ ଡାକ ବିଭାଗର ରେଜିଷ୍ଟର୍ଡ ଡାକ ସେବା ୫୦ ବର୍ଷରୁ ଅଧିକ ସମୟ ଧରି ଚାଲିଛି।
ବିଭାଗ ଏହି ସେବାକୁ ସ୍ପିଡ୍ ପୋଷ୍ଟ ସହିତ ମିଶ୍ରଣ କରିବାକୁ ଯୋଜନା କରୁଛି। ଡାକ ବିଭାଗ ଏହାର କାର୍ଯ୍ୟକୁ ଦ୍ରୁତ, ଟ୍ରାକ୍ କରିବାକୁ ସହଜ ଏବଂ ଆଧୁନିକ କରିବା ଲକ୍ଷ୍ୟରେ ଏହି ନିଷ୍ପତ୍ତି ନେଇଛି। ଡାକ ବିଭାଗ ସମସ୍ତ ସରକାରୀ ବିଭାଗ, କୋର୍ଟ, ବିଶ୍ୱବିଦ୍ୟାଳୟ ଏବଂ ଅନ୍ୟାନ୍ୟ ପ୍ରତିଷ୍ଠାନକୁ ସେପ୍ଟେମ୍ବର ୧ ପୂର୍ବରୁ ସେମାନଙ୍କର ସେବାକୁ ସ୍ପିଡ୍ ପୋଷ୍ଟକୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦେଇଛି।
ଡାକ ବିଭାଗ ଅନୁଯାୟୀ, ରେଜିଷ୍ଟର୍ଡ ଡାକର ଚାହିଦାରେ ନିରନ୍ତର ହ୍ରାସ ଘଟିଛି। ଡିଜିଟାଲ୍ ସେବା, ଇ-ମେଲ୍ ଏବଂ ଘରୋଇ କୋରିଅର୍ କମ୍ପାନୀଗୁଡ଼ିକର ବର୍ଦ୍ଧିତ ବ୍ୟବହାର ଯୋଗୁଁ ଲୋକମାନେ ଏବେ ପାରମ୍ପରିକ ଡାକ ସେବାକୁ କମ୍ ବ୍ୟବହାର କରୁଛନ୍ତି। ସରକାରୀ ତଥ୍ୟ ଅନୁଯାୟୀ, ୨୦୧୧-୧୨ ବର୍ଷରେ ରେଜିଷ୍ଟର୍ଡ ଡାକ ଦ୍ୱାରା ପଠାଯାଇଥିବା ପାର୍ସଲ ସଂଖ୍ୟା ୨୪.୪୪ କୋଟି ଥିଲା। ଯାହା ୨୦୧୯-୨୦ ସୁଦ୍ଧା ୧୮.୪୬ କୋଟିକୁ ହ୍ରାସ ପାଇଛି। ଏହି ହ୍ରାସକୁ ଦୃଷ୍ଟିରେ ରଖି ଡାକ ବିଭାଗ ରେଜିଷ୍ଟର୍ଡ ପୋଷ୍ଟକୁ, ସ୍ପିଡ୍ ପୋଷ୍ଟ ସହିତ ମିଶ୍ରଣ କରିବାକୁ ନିଷ୍ପତ୍ତି ନେଇଛି।
