କାହିଁକି ଜଗନ୍ନାଥ ହନୁମାନଙ୍କୁ ଶିକୁଳିରେ ବାନ୍ଧି ରଖିଛନ୍ତି, ଜାଣନ୍ତୁ ପୁରୀ ବେଡି ହନୁମାନ ମନ୍ଦିରର ରହସ୍ୟ
ପୁରୀ: ପୁରୀ ସମୁଦ୍ରକୂଳରେ ବେଡି ହନୁମାନ ମନ୍ଦିର ଅଛି। କଣ ଆପଣମାନେ ଜାଣିଛନ୍ତି କି ସେହି ମନ୍ଦିରରେ ପ୍ରଭୁ ହନୁମାନ ସୁନାର ବେଡ଼ିରେ ବନ୍ଧା ହୋଇଛନ୍ତି ? ଯେଉଁ ଭଗବାନଙ୍କୁ ସ୍ୱୟଂ ରାବଣ ମଧ୍ୟ ବନ୍ଦୀ କରିପାରିନଥିଲା ତାଙ୍କୁ କିଏ ଏବଂ କିପରି ବନ୍ଦୀ କରିଛି ଏବଂ କାହିଁକି ? ଆସନ୍ତୁ ଜାଣିବା…
ସ୍ଥାନୀୟ କିମ୍ବଦନ୍ତୀ ଏବଂ ପୁରାଣ ପରମ୍ପରା ଅନୁଯାୟୀ, ସମୁଦ୍ର ଦେବତା ନିଜର ଭକ୍ତିକୁ ଦର୍ଶାଇବା ପାଇଁ ନିଜର ସମସ୍ତ ବଳ ପ୍ରୟୋଗ କରି ସେ ପୁରୀର କ୍ଷତି ଘଟାଇ ଜଗନ୍ନାଥଙ୍କ ପାଦ ସ୍ପର୍ଶ କରିବାକୁ ଯାଉଥିଲେ| ଯାହାଫଳରେ କି ସେଠିକାର ବାସିନ୍ଦା ମାନଙ୍କର ଧନ ଜୀବନ ନଷ୍ଟ ହେଉଥିଲା | ଲୋକମାନଙ୍କର ଏହି ଦୁଃଖକୁ ଦେଖି ପ୍ରଭୁ ଜଗନ୍ନାଥ ସ୍ୱୟଂ ହନୁମାନଙ୍କୁ ଏହି ପବିତ୍ର ନଗରୀର ରକ୍ଷଣାବେକ୍ଷଣ ପାଇଁ ଏବଂ ସମୁଦ୍ର ଦେବ ଯେପରି ପୁରୀ ଅଂଚଳରେ ପଶି ଲୋକଙ୍କ ଧନ ଏବଂ ଜୀବନ ନଷ୍ଟ ନ କରିବେ ସେଥିପାଇଁ ତାଙ୍କୁ ନିୟୋଜିତ କରିଥିଲେ | ପ୍ରଭୁ ହନୁମାନ ମଧ୍ୟ ତାଙ୍କର କଥା ମାନି ସେଠାରେ ରହି ସ୍ଥାନୀୟ ଲୋକମାନଙ୍କୁ ସୁରକ୍ଷା ପ୍ରଦାନ କରୁଥିଲେ | କିନ୍ତୁ ଗୋଟିଏ ସମସ୍ୟା ଥିଲା ଯେତେବେଳେ ବି ପୁରୀ ନଗରୀ ମଧ୍ୟରେ କେଉଁଠି ଶ୍ରୀ ରାମଙ୍କ ନାମ କୀର୍ତ୍ତନ ହେଲେ ପ୍ରଭୁ ହନୁମାନ ସେଠାକୁ ପାଳନ୍ତି ଏବଂ ସେତେବେଳେ ଶକ୍ତିଶାଳୀ ସମୁଦ୍ର ଦେବତା ବରୁଣ ତାଙ୍କ ଅନୁପସ୍ଥିତିର ସୁଯୋଗ ନେଇ ପୁରୀକୁ ବନ୍ୟାରେ ବୁଡ଼ାଇ ଦିଅନ୍ତି।
ଯେତେବେଳେ ପ୍ରଭୁ ଜଗନ୍ନାଥ ଏହି ଧ୍ୱଂସ ଦେଖିଲେ ସେ ହନୁମାନଙ୍କୁ ତାଙ୍କର ଅନୁପସ୍ଥିତିରେ ଘଟିଥିବା ଅଘଟଣ ବିଷୟରେ କହିଥିଲେ। ଅନୁତାପରେ ପୂର୍ଣ୍ଣ ହୋଇ ହନୁମାନ ଆଉ କେବେ ତାଙ୍କ କର୍ତ୍ତବ୍ୟରେ ଅବହେଳା କରିବେ ନାହିଁ ବୋଲି ପ୍ରତିଜ୍ଞା କରିଥିଲେ। ଏହା ସୁନିଶ୍ଚିତ କରିବା ପାଇଁ ପ୍ରଭୁ ଜଗନ୍ନାଥ ନିଜେ ହନୁମାନଙ୍କୁ ଏକ ବେଡି ଦ୍ୱାରା ବାନ୍ଧି ଏହି ପବିତ୍ର ନଗରୀକୁ ରକ୍ଷା କରିବା ପାଇଁ ସ୍ଥାୟୀ ଭାବରେ ତାଙ୍କୁ ଉପକୂଳ ନିକଟରେ ଅବସ୍ଥାପିତ କରିଥିଲେ।
ସେହି ଦିନଠାରୁ ଏଠାରେ ଥିବା ଦେବତା “ବେଡି ହନୁମାନ” ନାମରେ ପରିଚିତ ହେଲେ, ଯାହାର ଅର୍ଥ “ବନ୍ଧା ହନୁମାନ”। ମନ୍ଦିର ଭିତରେ ମୂର୍ତ୍ତି ଚାରିପାଖରେ ଦୃଶ୍ୟମାନ ଶୃଙ୍ଖଳ ଜଗନ୍ନାଥ ଏବଂ ପୁରୀ ନଗର ପ୍ରତି ସର୍ବଦା ସତର୍କ ଏବଂ ବିଶ୍ୱସ୍ତ ରହିବା ପାଇଁ ତାଙ୍କର ପ୍ରତିଜ୍ଞାକୁ ପ୍ରତିଫଳିତ କରେ।
